Acts 4:15-36

¹⁵Damanina babada si wonisi wai kona gawarina si kasibau taveyei, ba kosi wata si sisiya.

¹⁶Ba si toiruba, “Mekabage nikosi sebasebare tana wosisi? Ba pipiya ereonowasi Jerusalem kamonai si kuira roboi kata kosi wai kiyakiyaya si wosei, ba kega rubana tana kwaruma.

¹⁷Saba mekabage niko wose tani gesei, kata kega pipiya kamosi yai ina rakata wai, sebasebaresi tana kaomainimanisi sina kuiri kata kega meyana Iesu kana wabai pipiya kurisi sini sisiya.”

¹⁸Damanina si yore meyisi si riu ba si kaotuneisi kata kega muri yai Iesu kana wabai siti sisiya kona siti beyebeyena mena.

¹⁹Saba Peter ba John si kaobeyisi, “Nikona wai komi wata koi buibuiyena meyimi, kata mekona wai wose totorina God matanai, komi kana bosisirimi kona God kana bosisiri.

²⁰Kona kairavina kega rubarubana awaika ka kinani ba ka nonori wai bi sisiyina kana boterei.”

²¹Saba babada si kao binaganagarisi ba si boterisi si nae. Ba kega rubana bagibagi padapadana sita berisi, kairavina pipiya ereonowasi awaika kamosi yai i tupuwa si kinani wai God si bokabakabari.

²²Ba sebarena kiyakiyaya i tupuwa kurina ba i yawasa wai, kana bodu 40 ba yogina i tupasairei.

²³Maranai Peter ba John si boterisi si nae wai mekabage priest kaikaposi ba magumagura si wonisi wai, turaturasi si wara berisi.

²⁴Ba maranai bigeruwana biyisi niko sisiya si nonori wai ereonowasi si kesanisi, ba God kurina gamosi kaikaponai si rupari. “Aeee, Bada ama Taupauma,” si wona, “Kom sapama ba dobu ba enaga ku wose, ba yebo awaika ereonowana kamonai yabata kom ku wose.

²⁵Ba kom Kanuma Kaobaisiyenai kui sisiya am saibisaibirina tamakai David kurina ku wona, ‘Awaika kairavina nikosi dam te biyagisi ba nota momosisi te wosewose?

²⁶Ba dobu kasi tautaupauma te bobunaga abiya kairavina ba babada tebi kesanisi Bada baibaiyawasina kaobaisiyena te gebeyei ba ana Bibigairenina te biabiyei.’

²⁷Nikona wai bisuwona kata Herod ba Pontius Pilate, ba Israel biyisi, ba Rome biyisi, meyaga kaikaponai si panapanana ba bibuni yai sisiya si popoi kata am saibisaibirina kaobaisiyena Iesu am binebinena te biabiyei.

²⁸Ba awaika si wosei wai matapa wata kom am maragata, ba am waina nununai wai nanakasike i tupuwa.

²⁹Ba karaku Bada, asi kao binaganagara ke nonori, ba am saibisaibirisi ki baisikai, kata kani tepatora ba waram kani sisiyei.

³⁰Ba yarom Kaobaisiyena ke kotoi kuni yawasa, kata kiyakiyaya ba matakira ba kituruba am saibisaibirina, Kaobaisiyena Iesu kana waba ke wose.”

³¹Ba si rupari i kakaba murinai wai, memena sibi dugu wai gawarina i gusu. Ba Kanuma Kaobaisiyena i bonuvisi wai, si dagui God wonana ere tepatorasi si raumamarei.

³²Ba bigeruwana biyisi ereonowasi, asi nota ba nuwanuwasi si kesani, ba kega kesana kotoi ana sawara karinai ba i mataisiga, saba asi sawara ereonowana kosi wata kamosi yai sibi kodei.

³³Kata God apostle, maragata kaikapona i berisi wai, Bada Iesu ana bomsiri menina sibi mamatarei, ba God ana bigairena i utusewai ereonowasi kurisi.

³⁴Ba asi duvu kamonai wai kega kotoi moyamoyakina, kairavina iyabosi tano ba yove karisi yai wai si gimona ba manesi si yuyauna si botubotu,

³⁵ba apostle si berisi wai pipiya asi waina nununai si bi yabei.

³⁶Ba Joseph wai kona Levi biyina, ana kupura wai Cyprus, saba apostle kana waba si yorei Barnabas. Ba Barnabas basuna wai kaobinuwatora biyina.