Hechos 4:15-36

¹⁵Tume tunajatu cuinanashacuare tunaja yacua juque Pedro, Juan, echachaneque jadya. Tuna cuinanahuaju tuna cacuejaticuare:

¹⁶—¿Eje bucha rique ecuana riyaque ecuita ecatse eau? “Tumeque ecuitatu chacha ama” jadya ni ecuana ejuu, ecuita cuanatu etsau ecuana tsehue. Dutya jujeri Jerusalénju cuanaque tuna bahue tatsera ejeque ecuitaja ataquique ama achineque, yuneridya tumeque ecuita chacha juchineque. Tehuataqui ama tuque ecuanaja.

¹⁷Dyaquedya jutidya tatsejatu Jesusja casa cuejaajeya. ¿Eje bucha cuejamerejacae jatsu tuque ecuana ecatse eau? Neihuaramerenucara ecatse; rehua ecatse pajenuca. Jidama aana ecatse neara. “Necuejajacacue Jesusja quisarati. Ecuanara metse dyaque nerecaturaya, metsera Jesusja quisarati cuejajacayaque ama juatsu”, jadya ecatse neara, —jadya tuna cacuejaticuare.

¹⁸Tume tunajatu ihuaratsu ecatse jadya acuare: —Necuejanucaume ni ejeque buchique Jesusja quisarati. Nebahuityanucaume ni ejeque buchique, —jadya tunajatu acuare Pedro, Juan jadya.

¹⁹Tatsera tuna acuare: —Yusura cuitadya yatse cuadishahua Jesusja quisarati cueja ishu. Icuenetu Yusura cuatsashaya eque jutaqui, micuanara cuatsashaya eque ama.

²⁰Yatsera cuitadyatu bahua tuque eje bucha juyaque. Yatsera cuitadyatu yatseja ijaca tsehue bacahua tura bahuityayaque. Jadya tibu tuque yatse cuejajacanime ama tuja quisarati, —jadya tuna Pedrora acuare.

²¹Tume tatse huaraji cuanara jidama aana acuare. Nereda tunajatu ecatse acuare. Jadya aana aatsu tunajatu ecatse inajacamerecuare. Ecuita cuanatu jucuare: —¡Dyaque jida, casada jadya taa Yusu, ruduruduque chachanehua tibu! Tumetu huaraji cuanara nerecaturacuare ama Pedro, Juan jadya. “Ecuanara ni ecatse enerecaturau, ecuita cuanatu dyaque ecahuaitiu ecuana tsehue”, jadya tunajatu inime jucuare.

²²Ecuita Yusuja casa tsehue chachanetanahuajatu anicuare pushi tunca mara bare.

²³Tunara inajacahuajutu Pedro, Juan jadya cuacuare Jesús queja ecatyati cuana queja. Tuhua junatitsu tatsejatu ecana cuejanaticuare dutya tatse eje bucha atanachineque. Cacuejaticuare ecatse pae cuanaja huaraji cuanara, emuiba cuanara jadya ahuaque.

²⁴Jadya bacatsu tuna dutya quisaraticuare Yusu tsehue: —Ecuana Cuatsashaquique, miquemi Yusu. Miquemi Dutya Iyaquique. Miratu iyacuare barepa, yahua, cueri cuana jadya. Dutya aniyaque tu mira iyahuaque.

²⁵Micue Espíritu eque tuquemi micue mere puji David queja huenemerecuare: “¿Eje bucha juatsutu israelita ama cuanaque dyaque ecahuaiti? ¿Eje bucha juatsutu ecuita cuanara inime tupuqui aya aishu jidaque ama?

²⁶Ecuari cuana tuna casitatiya epu juque huaraji cuana tsehue. Dutyara tupu inime tuputsu Ecuana Cuatsashaquique jidama aishu. Bajejeya tuna inime Mesías Yusuja Emepeque ijahue ijahue aishu”, jadyatu Davidra huenecuare beru.

²⁷“Tumebae cuitadyatu judadichine, Tata. Huaraji cuanatu casitatichine riyaque epu ebari juque. Herodes, Poncio Pilato jadya tatse israelita cuana tsehue, israelita ama cuana tsehue jadya casitatichine, micue Bacua Jesús jidama ijahue ijahue aishu. Arepa tuque juchama neri juhua ama bucha, arepa tuque mique merequi juhua ama bucha, taa ecana casitatichine micue Emepeque Mesías ujeu baatsu.

²⁸Dutya tuna eje bucha juchinequetu mira icueneta iya inime achine equedya judadichine.

²⁹Tata, miquemi bahuedya huaraji cuana ecuana tsehue dyaque cahuaitiyaque. Nerecaturacara tunara ecuana aya. Ecuana ecuana mique merequi cuanaque. Tsahuacue ecuana micue quisarati bajida tsehue ama cuejajaca ishu ama.

³⁰Casaturacue ecuana micue casa tsehue ujejeda cuanaque chachane ishu. Tyacue ecuana micue casa ejeque ecuitaja ataquimaque aishu, ecuita cuanaja mique ecuana tsehueque adeba ishu. Amerecue ecuana Mique Merequi juchama nerija casa eque, —jadya tunajatu Yusu acuare.

³¹Tuna Yusu tsehue quisaratijacahuaju tuna ecaradati jarijutu Yusuja casara etare bucucushacuare, Yusuja Espíritu tuna queja buteyaju. Tuna peadya peadya quejatu junacuare. Tura tuna casaturacuare Jesusja quisarati bajida tsehue ama cuejajaca ishu ama.

³²Jesús queja ecatyati cuanaque tuna dutya jida dutya tupu cabatie jucuare. Arepa jetima jucuare ama bucha peadya camadya inime tupu bucha ai acaraque jadya tuna jucuare. Inijeda ama tuna jucuare. Yurameta catyatie tuna jucuare tunaja ai aniyaque peya cuana tsehue.

³³“Ecuana Cuatsashaquiquetu chacha netitsuranucachine. Ecuanaradyatu bachine Jesús emajuque chacha enetitsuranucaque”. Riyaque quisaratitu Jesúsja ecuadisha cuanara cuejajacacuare ama. Yusura tuna dyaque casa tyacuare tuque mere ishu. Tuquetu dyaque jida jujacacuare ama Jesús queja dutya ecatyati cuana tsehue.

³⁴Ni ejejadya jutidya tunajatu ai aijama jucuare ama. Yahua, jadya ama juatsu etare tuna catyati caticuare. Tume cuanaque catyati aatsu chipiru inatsu tunajatu Jesusja ecuadisha cuana queja duju bahue jucuare.

³⁵Jesusja ecuadisha cuanajatu tumeque chipiru nerecada cuanaque tyabahue jucuare. Tunara sareya tupu tunajatu jaquetsu tyabahue jucuare.

³⁶José bacani ecuitatu nerecada cuanaque tsahuaquique jucuare. Chipreju ecuinanaquetu jucuare. Leví eque ejuracanaquetu jucuare. Jesúsja ecuadisha cuanaratu bape bacaniedya acuare “Bernabé” bacani, “Ecasaturaquique” jadique.