IXTAMALAKACHAN JU JESÚS 4:15-36

¹⁵Pus lana alactixcoxtucalh pants'iquis lacapu'ucxtin. Chai va is'akstu'an ju xalack'ajin tatsuculh lacchivinin.

¹⁶Chani ixtalaclajunich: ―Tas cat'alayauch ju ani lapanacni ni slivasalh k'ai lhamak'an ju tamalacasuta ju yu'unch chai jantu lai catinompalau ni jantu tanavita. Tac'atsak'o ju amachak'an ju lak'achak'an Jerusalén.

¹⁷Para ni jantu palai lhu catac'atsaya' ju tuchi xatanavi ca'ajuniu ni jantu xamati' catajunilh tu'u' ixlacata ju Jesús. Chai ni tu'u' catajunilh xamati' pus is'akstu'an tac'atsai.

¹⁸Pus at'asanichokocalh. Ajunicalh ni jantuch lai vana catajunilh tam xamati' nin cata'amasuninilh ixlacata ju Jesús.

¹⁹Pus ju acsnich ju Pitalu' chai ju Xivan tak'alhtailh ju ucxtinin. Chanich tajuni: ―Ana'unt'itch. Tasmalhch ju palai k'ox calhiulaya' ju Dios. Ni aclaquiclaca'iu ju uxijnan u yuchi ju Dios ju acquiclaca'iu.

²⁰Para ju quijnan jantu tavanan actimacaju ju va jantuch acnaju ju tuchi iclakts'intauch ju navilh ju Jesús chai ju tuchi ick'asmat'auch ju naulh ju Jesús. ―Chunch tajuni ju Pitalu' chai ju Xivan.

²¹Pus ju ucxtinin chani ajuni: ―Va yuchi ni amasunip'alat'it la'ixtapaka'ut ju Jesús. Chai acsni tajuni ju chunch lana amacaulh. Pus ju ucxtinin lana jantu lai xatalhitajui ta yu laich ca'amamak'alhk'ajni va ixlaca'atalh ju lapanacni. Tachi chun ju lapanacni ixtanajun ni yuchach ju xak'ai ju Dios ni lai palai xanavi ju anu' lapanac.

²²Pus ju anuch lapanac ju navinicanta lhamak'an ni palaich ixnavicanta ixtapasatach t'up'uxam c'ata.

²³Pus ju Pitalu' chai ju Xivan acsni amacajuncalh lana talak'anchokolh ju ali'in ju ixtalhilaca'anta ju Jesús. Chai tanonk'o tuchi ix'ajuni ju xalack'ajin palijni chai ju ucxtinin.

²⁴Chai ju yu'unch acsni tak'asmatlh ju ixchivinti'an pus va ch'anxtam tat'achivinilh ju Dios. Chani tajuni: ―Qui'ucxtin uxint'i ju Dios'at. Uxint'i ju navit'a ju lact'iyan chai ju lacat'un chai ju alama chai tachi chun ju taxtokni ju alin.

²⁵Ju David mak'aniya milapanac ixjunita. Pus ju miSpiritu Santu juni ni ma chani cats'ok'ulalh laca'alhiqui: Ma va k'aya talucununch ju lapanacni ju jantu israelitanin tajunita. Chai ju israelitanin ma va k'aya tapast'ac'a ju taxtokni ju jantu lai tanavi.

²⁶Ju xa'ucxtinin ju ani lacamunutpa' ma va lakatam tava. Chai ju xalack'ajinch ma tatak'aixtokta. Ma va tat'alaxcayan ju uxint'i ji ucxtin Dios chai ju noncan amalak'ach'at'ach'it'a. Ma chunch ju naulh ju David.

²⁷Chai ji quimpai Dios slivasalh ni tatak'aixtoklh ju ani lak'achak'an ju Herodes chaich ju Poncio Pilato chaich ju yu'unch ju jantu israelitanin chai ju ali'in quint'a'israelitanin quinc'an. Va tat'alaxcailh ju mints'alh Jesús ju na salaka ix'alhunut. Chai yuchi ju sacxt'ut'ach ju uxint'i.

²⁸Chai ni chunch ju talalh pus uctaxtulh tachi ju akts'iya ixna'unt'a ju uxint'i chai tachi ju isp'ast'act'a ni catapasaya'.

²⁹Pus ju chavai ji qui'ucxtin alakts'ich ju tuchi quintajunan ju aquinta'ulhtuyan. Para ju quijnan ni milapanacni icjuntau pus aquila'aktaijuch ni laich ac'ajunau ju lapanacni ju minchivinti chai jantu actalhananau.

³⁰Chai aquilaxtakniuch ju mintachaput ni laich palai acnaviyau ju tak'ank'anin chai lai acnaviyau ju lhamak'an chai ju tu'u' ju lai catapuc'atsaya' ju lapanacni ni vasalh milapanacni icjuntau. Chux ju ani acnaviyau la'ixtachaput ju mints'alh Jesús ju na salaka ix'alhunut. ―Pus chunch ju tatapaininilh ju Dios.

³¹Chai acsni tat'achivink'olh ju Dios pus tataclh ju anu' chaka' junta ixk'aixtokcan chai ixchux'an ju anch ixtavilanalh axtaknik'o palai lhu ixtachaput ju Spiritu Santu chai tatailhi'alh ixnajunca ixchivinti Dios chai jantu ixtatalhanan.

³²Chai tachi chun ju ixtalhilaca'anta Jesús va lakatam ixjunita ix'alhunut'an chai va lakatam ixjunita ixtac'atsan'an. Chai jantu xamati' ixnajun: ―Ju qui'alinta va qui'anu' qui'akstu. Para tachi chun ju taxtokni ixtalaxtakni tachi ju ixmaktasq'uini pumatam pumatam.

³³Pus ju ixtamalakachan ju Jesús lacak'ai tachaput tatailhi'alh ix'ajunica ju lapanacni ni vasalh lok'onchokolh ju ucxtin Jesús junta ixmacnucanta. Chai ju Dios axtaknilh k'ox is'atsucunti'an ixchux'an.

³⁴Pus jantu xamati' ju sia yu'unch ju ixmaktasq'uini tu'u'. Para tachi chun ju ixpacxanta ju ixlacat'un'an u ixchaka'an tast'alh chai talhimink'o ju ixtapalh ju is'ast'anti'an.

³⁵Pus yu'unch ju ixtamalakachan ju Jesús ju axtaknicalh ju anu' tumin chai ju yu'unch taxtaknilh ju ix'alin ixmaktasq'uinit'an.

³⁶Chunch ixtalai ju lapanacni tachi ju lalh ju José. Ju yuchi vachu' ixlhilaca'anta ju Jesús chai ju ixtamalakachan ju Jesús Bernabé ixtalhimapaka'uta. Ju chunch va nomputan ni na lai ixmak'ank'achai xamati'. Pus ju yuchi ix'apapanatnich ixjunita ju mak'aniya lapanac ju Leví ixjuncan. Chai amachaka' Chipre ixjunita.