Uléécɑɑ Pitumɛ Mɛwɑi 4:15-36

¹⁵Api pɛɛ Piyɛɛ nɛ Yohɑni kɛtúhɑɑnɛ kɛ-i lɑ́kɑsɛ, ɑpi pɛɛ kei n we pin pimɛcɔpɛcirɛ nsímɛ́ píŋirisɛ.

¹⁶Api pɛɛ m písɛinɛ rɛ: Íye kɑri pisoi mpí wɑinɛ? Yerusɑlɛm kuyu nnɛ́í yɛ pikómɛ mɑsí rɛ pi mɛwɑisɑŋɑ píimɑ wɑ. Ári yɛ́ fe tɔkɛ́ kɛ́si.

¹⁷Lɛ̃ nnyɑ, nsímɛ́ mmɛ̃ ńn kɑpɛ nɛ pikɔ́ɔ́nú rinkpɑ́, tɔkɛ́ nɛ pi yɛ ɑri pi cɛ́si rɛ ɑ́pi kɑpɛ úkɑ mpuri nɛ Yeesu uyɛ̃ tinyiri ńkɑ pisímɛ́ rikpɑ́.

¹⁸Kei kɑpi pɛɛ pi séepɔ ɑpí nɛ pi yulu rɛ ɑ́pi kɑpɛ Yeesu nnɑŋɛ nɛ picélɑɑ rikpɑ́. Ápi kɑpɛ yɛ ricuruu urinyiri sée.

¹⁹Piyɛɛ nɛ Yohɑni ɑpi pi pɛsɛ rɛ: Nɔ̃́ ticuruu ɑni ripɑí nkɛ̃́ tɛ li nɛ Uléécɑɑ kɛ́mɛɛ sɑ́ rɛ usoi ukɛ́ nɔ́ pɑkɑrɛ nɛ́ɛ Uléécɑɑ kuu yɛ́ pɑkɑrɛ?

²⁰Nɔ́ɔ yɛ́ nkpéni mmɛ̃ ceri. Tɔ̃́ ɑ́ri yɛ́ fe tɔkɛ́ lɛ̃ kɑri n yɛ̃́ ɑri kɔ kom pisímɛ́ riyɑ́.

²¹Kei kɛ pitúhɑɑnɛ pɛ̃ ɑpi kɔ picɛ́ pi rikpɑ́ ɑpi pi yɑ́ ɑpi tɔ́mpɔ. Ápi ńkɑ yɛ̃ kɑpi yɛ́ nɛ rinwɑ́ɑ́nɑ́ pikɛ́ nɛ kutu pi rimpɑ́sɑ. Pisoi mɛyɑ̃ yɛ pɛɛ́ welɛ pin mɛwɑi mɛɛ nní n wɑ nnyɑ Uléécɑɑ pɑkɑrɛntɛ.

²²Utisi uyɛ̃ kɑpi nní nɛ Uléécɑɑ nnɑŋɛ m pɔisɛ ɑŋmɛ̃ yɛ ɑfɛɛnɑ rifɑɑulɛ.

²³Kɑpi Piyɛɛ nɛ Yohɑni rin-yɑ́, ɑpi yisi ɑpi pipisoi lɛɛpɔ ɑpi lɛ̃ kɛ pɛpɛɛ yɛ Uléécɑɑ inyɔ́ɔnsɛ n wɑ piwɛ́ɛ́sɛ nɛ Isirɑyɛɛli piwɛ́ɛ́sɛ ɑpi pi ḿ mɑ pi kɛɛni.

²⁴Kɛ pipisoi pɛ̃ ɑpi lɛ̃ n kṍ, ɑpi rinɔ́ɔ risɛ wɑi ɑpi Uléécɑɑ yɑ́ɑ́si rɛ: Upíimɑ Utɛnɛcirɛ́, pɔ́ɔ kɛtẽ nɛ kɛyómɛ nɛ mínimɑɑ nɛ lɛ̃ nnɛ́í lɛɛ ḿpɑ́ yei ń we wɑ.

²⁵Mpɔ́fɑ́ɑsɔnɛ kɑɑ́ nɛ ritiki ɑɑ́ nɛ urɔ́sɑ́ɑyɑhɑ Tɑfiti upɔ́kɛikɔ́ mɑɑsɛ rɛ: Yo nnyɑ kɛ mpuri sɑnɛ pikɔ́ ɑpi kɛtẽ kɛcɑ́ɑ́ pɑnsɛntɛ? Yo kɛcirɛ nnyɑ kɛ sisoipipi ɑsi simúŋɛ́ kópɛ wɑi?

²⁶Kɛtẽ kɛcɑ́ɑ́ piyɔɔpi yɛ pimɛcirɛ cɑ́pinɛ rɛ pikɛ́ ɑtɔpi leemɛ. Piyɔ́ɔpi ɑpi rinɔ́ɔ risɛ wɑi rɛ pikɛ́ nɛ Upíimɑ nɛ uyɛ̃ kuu n wɛ́ɛ tɔ.

²⁷Mɛyíkíyiki kɛ Erooti nɛ Pɔnsi Pilɑti nɛ Isirɑyɛɛli pikɔ́ nɛ mpuri sɑnɛ pikɔ́ ɑpi Yerusɑlɛm nté rinɔ́ɔ risɛ wɑ rɛ pikɛ́ nɛ upɔ́kɛikɔ́ Yeesu kɑɑ n wɛ́ɛ tɔ.

²⁸Lɛ̃ kɑɑ mɛkɛɛ-mɛ m musí, ɑɑ́ nɛ mpɔ́nɑŋɛ yekei kɑpi nkpéni lɛ̃ wɑ.

²⁹Lɛ̃ nnyɑ, ɑ nkpéni pipicɛ́ ńsɔnɛ kutu ricɔ, Upíimɑ ɑɑ tíyɛsɛ pipɔ́kɛikɔ́ pikɛ́ itisi nɛ mpɔ́símɛ́ riyóó.

³⁰A mpɔ́nɑŋɛ nyísɛ pitóikɔ́ pikɛ́ pélesi, ɑɑ mɛwɑisɑŋɑ nɛ mɛwɑi píimɑ upɔ́kɛikɔ́ Yeesu kɑɑ n wɛ́ɛ rinyiri nɛ wɑpisi.

³¹Kɑpi lɛ̃ piyómɛyɑ́hɑɑ ḿ mɑsí, kɛlõ kɛ-i kɑpi n cɑ́pinɛlɛ̃ ɑkɛ yéŋesi. Nfɑ́ɑsɔnɛ nn pinnɛ́í yipu ɑpi pɛɛ itisi nɛ Uléécɑɑ nsímɛ́ n yóólɛ̃.

³²Pisoi kulúi kpɛ̃ nnɛ́í pɛɛ nɛ Yeesu kɛfɑ n tɛnɛ yɛ pɛɛ kɛfɑ pɛ́nɛlɛnlɛ pin kɔ kɛmúŋɛ́ kɛsɛ mɑ́. Úkɑ úu yɛ pɛɛ mɑɑ rɛ u linyinɛ umɛcirɛ te. Ḿpɑ́ yo kɑpí pɛɛ pɛ́nɛlɛ̃ pin te.

³³Uléécɑɑ yɛ pɛɛ pitumɛ ńnɑŋɛ hɛlɛ pin nɛ nyísɛ rɛ Upíimɑ Yeesu yɛ nkpɔ kɛ́mɛɛ yisilɛ, Uléécɑɑ un pɛɛ Kirisi pikɔ́ nnɛ́í mɛyɑ̃́ kpɑ́lɛ̃.

³⁴Líkɑ ɑ́i pɛɛ piukɑ pɑ́rílɛ̃. Pɛpɛɛ sicɑrɛ nɛ́ɛ síyɔ m mɑ́ yɛ̀ɛ̀ pɛɛ si yɑ́ɑlɛ ɑpí nɛ lisiwóó cɑ́pinɛpɔ

³⁵ɑpi pitumɛ pɑ. Pɛ̃ pɔ́ɔ ḿpɑ́ úye ncɔ́ŋ pɑí ɑpí nɛ si hɔɔnɛntɛ.

³⁶Pi pɛɛ Lefi mpuri ukɔ́ unyinɛ Siipuru kɛtẽ-pɔ mɑrilɛ. Pi yɛ u sée rɛ Yosɛfi. Pitumɛ pɔ́ɔ rinyíri u hɛ rɛ Pɑrinɑpɑsi. Liɑsei rɛ uyɛɛ yɛ picɔ rinŋmɔ́ɔ́púsɛ.