Acts 22:10-30

¹⁰A paridadana a pa, “Bada Aiwai ana kauei?” Ma Tauna i riwa i pa, “Ma vomairi ma nae au Damaskas. Kampa rava am nola ina pariverem.”

¹¹Lalalaina gamrina i rata guratana ma matau i kamoi da eḡa ata inainana. Ma tauvigwanigwaniana au urai i voa ma i naieu au Damaskas.

¹²Oroto wavana Ananias kampa i mae tauna God i voepaepai ma ana tarawatu i vovojijina-nonoei. Mai Jew tauna i vivirana-kauei.

¹³I nei da au ririvau i mairi ma i riwa, “Vareiu Saul ma inana me!” Nai marana a inana me.

¹⁴Anina ma i riwa, “Amamata ai God i rautanim, da ana ḡoana ma aramanei, ana Taunola Jijimanina - matamei ma inanai, ma riwana taniḡamei ma nonori.

¹⁵Aiwai u inainanai ma u nononori ma vimatematei rava anatapui awarii.

¹⁶Marina aiwai e paipaini! Tauai ana babataitoim ma Bada awarina ma raupari da am ḡoʼapoapoei ina oḡa-tawanei.”

¹⁷Anina ma a nae au Jerusalem. Au Tempol a raraupari ma matauei kaua a inanai.

¹⁸A inanai Bada awariu i bababani i pa, “Rava weka am jima tau aubaiu eḡa nonorana ita ḡoeḡoei. Laḡilaḡina Jerusalem ma opu-tawanei.”

¹⁹Wate tau a paribelei, “Bada wei ravai i aramanei da pari numai a nepai da kerisiana a vunui ma a pani-naiei.

²⁰Ma maranai am peroveta Stephen tarana i toi, tau kampa a maimairi ma ana iraḡe a vianinei ma ḡaima tautawanai ai gara a paipaini.”

²¹Ma Bada i riweu, “Ma nae a paripari-tawanem aueia Jentail awarii.”

²²Patarana Paul i rarautaniḡanei ma maranai wei babanina i kauei taui i meji guratana ma i vigaragararei i pa, “Ona viraḡena-tawanei, eḡa ina mae!”

²³Taui i vigaragararei, ai kwama i kwajikwajiei ma pokau i tawatawanei awarina.

²⁴Ma sorodia ai bada sorodia i egari da Paul i naiei ai au bareki. Ma i riwei da Paul ita wipi da ita vieḡa aiwai aubaina ana rava amloi i ḡaiḡai ma awarina i garagarara.

²⁵Ma urana ruaḡa i terepai au aidamo ma i raḡiraḡini da ita wipi ma Paul sorodia ai bada i riwei i pa, “Tau Rome-ei, Eḡa ota etareu ma o vunuvunu-labalababaiu. Lamna menanare?”

²⁶Maranai sorodia ai bada wei i nonori ma i nae da ai bada ḡaeḡaena i pariverei. Ma tauna i vitara-virevirei i pa, “Aiwai e kaukauei? Wei ravana Rome-ei!”

²⁷Sorodia ai bada i nae Paul awarina ma i paridadanei, “Ma riweu! Riwa kaua da tam Rome-ei bo?” Ma Paul i paribelei, “Ee, lamna riwa kaua!”

²⁸Sorodia ai bada Paul i riwei, “Tau mane ḡaeḡaena Rome gabemanina a verei da a vimai Rome.” Paul tauna i riwei, “Tau a tupua da Rome-ei.”

²⁹Sorodia i ḡoei da Paul ita etarei wate maratagogi ita ḡori-melei. Ai bada ita ḡori ma i rovo-kaukaua maranai i aramanei da i kauana-boai da Paul, Rome-ei seinei i pani.

³⁰Au maratomna sorodia ai bada i ḡoei da ita aramana-kauei mai Jew ai viwavu aiwai Paul awarina. Ma lamna aubaina Paul ana seini i votawatawanei ma i opunei boru ḡetelarana au naona i vimairini.