Aposel 22:10-30

¹⁰“Eme ma jo ndremenya iy ja, ‘Laban, ou aso-ok jo kamekes saba lakou tam handru?’ “Ma Laban tiye sahou eme tek i buku doh, ‘Ya, ou suri ou ma ou ala bolo kon tinan Damaskus, ya ndramak ari kameh tiye tam ta lakou marakon Kindrei aso-ok ou amekes.’

¹¹Madak ma la-uh badeh, ilik mara-ei, tasah lomada sun nane doh, lomadan tinan labai, eme ma oro lau nane adek hawek tawi minek, ma sirini jo iu ili bolo kon tinan Damaskus.

¹²“Ndramak ari nyaran Ananayas, iy udu bolo kon nane doh. Iy lau ta Jises ari ai, len mari badeh, iy in hamon le tiri kandriyen ta batanau, eme ma iri Juwis nane are Damaskus badeh, aso-ok iy tinan labai.

¹³Ya iy eme ales ere mirihik tek, ma iy asehek sahou eme tek i buku doh, ‘Sol, ou nadu tine ahi, na dah kameh ou winiyan anyolom kon ja.’ Sahou ano le bohon badeh, madak asak, ma jo anyolom iy amwenen.

¹⁴“Iy asehek sahou eme tek i buku doh, ‘Kindrei ale mene, tubu taha iri atudun iy badeh, lebelei ou, ma aseken ou akohok tanan tiri lakou marakon iy aso-ok, ma iy aseken ou anyolom iy. Iy badeh, mwasin labai ta madan, ma ou winiyan anuhun iy asehek sahou na bohon amwenen.

¹⁵Ma ou kameh a buku bohon ta tiye tiri lau mari ta saba lakou nane ou ndranyolom, ma ou ndranuhun.

¹⁶Ma, na idah kameh ou sabe-en ja ai! Ou suri ou are loken, alomwa ou, ma ou aloh nyaran kasikine kandriyen tam ndra-in marakon ki-iu.’

¹⁷“Jo eme hamon eme Jerusalem ja, ma iu ili bolo asiu tinan ta Kindrei, jo asolom udu le badeh, jo amekes lele.

¹⁸Eme ma jo anyolom Laban asehek sahou eme tek i buku doh, ‘Ou anuhun, na le dah, ou suri ou a-au ta Jerusalem. Ou suri ou suwi, tasah iri lau kameh winiyan banuhun ou bwe, buku ou asehek nyarak ili tiri.’

¹⁹“Jo anya, ‘Laban, iri marakon ndratanan jo mwasin labai ta jo mene edek ili bolo asiu ta ndrahu tukum tiri Juwis, ra-em ili ra-em, ta apeu iri, ma adai iri lau ale atehei budon tiri in tam.

²⁰Udu bolo len mene iri adi lau tam ari nyaran Stiben, badeh, jo udu aliy ale, anyolom iri adai iy. Jo badeh, ere aliy ta atondrok awin tiri lau nane adai iy imek na bek. Ya, ta madak badeh, iri amekes kandriyen mwasin i tan.’

²¹“Laban tiye jo anya, ‘Ou adek ai, tasah jo aso-ok ou kameh ala bolo iri kon leheleh, ta aseben iri lau leheleh, iri tanan kandriyen tiri Juwis bwe.’”

²²Iri Juwis anuhun sahou ta Pol, arile iri anuhun iy asehek ja ta aseben iri lau badu leheleh, eme ma bwidi ndrine iri ibolosen, ma iri arah boto-on labai anya, “Iy sare kon munyak hawe taha! Kadi iy kimek ki-iu! Iy ndra-in labai, ma iy sado kon munyak dah!”

²³Iri arah, ma asehek sahou laleyah. Iri asini awin tiri udu bwele-e iri iu, iri akeh ili eme laleyah, ma iri akeh kasu-er ta ndren ili loken, atalan laleyah. Idoh leheya buku iri basekesek ta sahou Pol asehek nane bwe.

²⁴Tinan ta atondrok iri lau ta bahun nane tiye oro lau tan i buku doh, “Ado kandrei Pol keme bolo kowah hawe to. Ma ado ka-um iy na malou sakabuk i bek, winiya le iy baratiye ta saba lakou handru iy amekes, ma to kameh winiyan atanan kati kandriyen nane doh, tasah handru iri Juwis abadok ta adi iy anya kimek ki-iu?”

²⁵Eme ma iri lau ta bahun ame bawei Pol, ano iri anya ka-um iy ai. Arile, Pol badeh, ales ere mirihik ta ndramak tinan ta bahun ari, iy ta atondrok iri rayah ai. Eme Pol tiye i ta ndramak nane i buku doh, “Ou anuhun se, buku nyara ndramak udu bolo buk badu kon Rom, ya kandriyen ta batanau asehek i buku doh, iy kili ta mada sahou mwena op, ta seleya iy ndramak nane doh, bwidi kandriyen handru o bwe. Ya, i buku sah handru, na idah ja ado kameh anya ka-um jo laleyah?”

²⁶Ndramak tinan nane dah anuhun sahou ta Pol, ma iy ales amwenen ili hawe tinan ta atondrok iri lau ta bahun mara-ei. Iy asehek i ta tinan tiri i buku doh, “Ou abudon ma ou anuhun kamwenen op, ano ou baramekes saba lakou ndra-in barala tan, tasah nyaran badeh, ere bolo buk badu kon tato dah.”

²⁷Eme ma tinan ta atondrok iri lau ta bahun mara-ei doh, ili atou Pol, ma iy ndremenya Pol i buku doh, “Ou tiye tek, nyaram in bolo buk badu kon tahi dah handru?” Eme Pol anya, “Ehe, jo asehek handru.”

²⁸Eme ma ndramak tinan nane dah anya, “Jo badeh, mene akeh luk solo-an labai ta adeu nyarak ili bolo buk badu Rom.” Ma Pol anya, “Badeh, handru, arile tama uru tine badeh, nyara uru udu bolo buk badu Rom bwena labai, eme ma nyarak udu aliy ale.”

²⁹Eme ma oro lau ta bahun nane bawei Pol ma anya ka-um iy badeh, anuhun sahou doh ja, oro anoh ma oro tolowei iy. Tinan ta atondrok iri lau ta bahun mara-ei nane doh inoh ale, tasah iy badeh, tiye iri lau ta bahun ta bawei Pol na malou ma sen. Ya, iy tanan idoh ndrabun, ndrabun labai ta apeu ari ndramak laleyah, buku nyaran udu bolo buk badu Rom.

³⁰Na len ari ja badeh, tinan ta atondrok iri lau ta bahun mara-ei nane dah tolowei Pol, ma iy udu bolo kowah laleyah. Ma tinan tiri lau ta bahun mara-ei dah anya kasilah kati sahou doh ale, iri Juwis nane amekes ta adeu Pol i ta mada sahou. Eme ma iy atehei sahou ili tiri tinan tiri pris, ma hawe iri kansol mara-ei tiri Juwis, ta kame ta tukum doh. Ma iy andrei Pol ili atehei iy ales ere mada iri mara-ei.