Apostolo 22:10-30

¹⁰Ebu eḡeꞌa raenaꞌa, 'Zuhiꞌa Boro, e nagini haḡaine manoḡa?' Aniꞌa raenaꞌa, 'Iḡunadu, Damaseko neḡa onamoꞌi! Eꞌea eḡeꞌa ḡaniroteꞌe gauḡa niduꞌa ihoꞌiꞌuma.'

¹¹Ebu eꞌe, agaḡa boroꞌa ubumahe ꞌuiro ꞌahine, ehamanoga mene idararo. Eꞌanoꞌo ḡatiheꞌeteꞌe azaḡaniꞌa tutuhe, abiheꞌenaꞌa Damaseko neḡa onamiro.

¹²Eꞌea vaze ꞌahoga, niḡa Ananiaꞌa radiudo. Aniꞌe goro ḡoeꞌa ibiḡano daꞌo onamido, ebu Iuda azaḡa Damaseko neḡano radiuꞌeteꞌeꞌa niduꞌa, aniꞌe vaze manoḡa tauḡi reiro.

¹³Ani onaadu, eḡe genaḡano edaro, ebu raenaꞌa, 'Saulo, nego! Bare fairu ehamanoꞌi!' Eꞌebuꞌu zogone Anania horonoga idararo.

¹⁴Ebu Ananiaꞌa raenaꞌa, 'Vouḡafe Badiꞌaꞌa ḡa mae avo tiro, ane zama ederoga veize, zu Iesu, Vaze duduḡa horonoga veize, ebu ani hebeonoꞌo agoḡa egoga veize.

¹⁵Mazaḡa Zuhiꞌa Boro veize ḡaꞌa horoniroteꞌe zu igiroteꞌe ḡauḡa vaze niduꞌa mazao rae fureniꞌuma.

¹⁶Eꞌanoꞌo ḡa ago zamare ꞌadaꞌadoꞌi? Iḡunoꞌi! Iesu Keriso niḡano kuranadu bapatizo moꞌi, ebu haḡaiḡo sauꞌa vuzuꞌe modoꞌi!'

¹⁷Ierusalema neḡa bare eriroteꞌe enogano, dibuꞌo neḡano kuraroteꞌe zamaḡano, iḡunuꞌeteꞌe teigiro.

¹⁸Ebu Zuhiꞌa Boroꞌa ḡorehoga horoniro. Ani raenaꞌa, 'Ḡarihoꞌi! Ierusalema neḡanonoꞌo zogone iḡunoꞌi! Mazaḡa ḡaeꞌa eḡe hari rae fureneꞌetaꞌaꞌe, Ierusalema azaḡaniꞌa mene mae ḡihiniꞌuma'

¹⁹Rehano eḡeꞌa raenaꞌa, 'Zuhiꞌa Boro, eḡeꞌa Iuda azaḡa kuru neḡa niduꞌa onamadu, ḡae mazao fieꞌeteꞌe azaḡa madu ḡuꞌa neḡano ohozido zu bouzidotaꞌaꞌe, zeḡe edeḡa.

²⁰Ebu ḡae hari rae furenidoteꞌe vazeḡa, Stefano mau runiroteꞌe zamaḡano, eḡe zu zeḡe teite zamahe tibunadu, eꞌea edau radiro. Ebu Stefano mau runiroteꞌe azaḡaꞌe dabuaze fuiꞌe tiro. Eꞌe dabuaḡaꞌe eḡeꞌa taufe radiro.'

²¹Rehano Zuhiꞌa Boroꞌa ihinaꞌa, 'Onamoꞌi! Mazaḡa eḡeꞌa Iuda mene azaḡa, haba faḡano radiuꞌeteꞌe mazao tuḡuꞌiꞌuma.' ”

²²Vaze ḡuḡuvaḡaniꞌe igi onao, Pauloꞌa ḡoere eꞌe reiroteꞌe igirotene, ze harae iḡuniro, raenaꞌa, “ꞌUguḡa vazeḡaꞌe mau runoꞌi! Aniꞌe ḡabode radoga mene idaḡa.”

²³Ze dabuaze feune ḡihineꞌenaꞌa zu raha mae feuneꞌenaꞌa harae ḡunuḡuniro.

²⁴Roma uti vazeḡa boroꞌa uti azaḡa zeadu, Pauloꞌe uti azaḡa radone neḡano mae zouniro. Ebu hariḡa rae furenoga veize “Masinoꞌi!” rae ziro. Aniꞌe nougadu vaze ḡuḡuvaḡaniꞌa ane mazao maḡune haraeꞌeteꞌe ederihi reiro.

²⁵Uti azaḡaniꞌa Paulo masinoga rae, ꞌevoꞌa hutube ꞌeine utirotene, Pauloꞌa uti azaḡa ibito ziniꞌeteꞌe vazeḡa eꞌea edauꞌeteꞌe ninaꞌa, ꞌahige reiro. “Eꞌe Roma mone vazeḡa rehano, kotao ꞌize mene ohohogano masihihi raꞌohe. Aꞌe Roma goroḡano idaḡa hehe?”

²⁶Ibito ziniꞌeteꞌe vazeḡa eꞌe igirotene, uti vazeḡa boro vaḡe onamadu niro, raenaꞌa, “Vaze ꞌadiꞌe Roma mone vazeḡa. Ḡa nougiꞌuma?”

²⁷Uti vazeḡa boroꞌa Paulo vaḡe onamadu ḡadiniro, raenaꞌa, “Ehoꞌi! Ḡa Roma mone vazeḡa hehe?” Pauloꞌa “Oꞌe” rae reiro.

²⁸Ebu uti vazeḡa boroꞌa raenaꞌa, “Eꞌe Roma mone rouga veize moni boro modiro.” Pauloꞌa naenaeninaꞌa, “Eꞌe fureraroteꞌeanoꞌo onao izidi, Roma mone vazeḡa.”

²⁹Eꞌanoꞌo Paulo masinadu ḡadimu vaḡihi reiroteꞌe azaḡaniꞌe, ane mazaonoꞌo zogone ie vaḡiniro. Ebu uti vazeḡa boro ani, Pauloꞌe Roma mone raꞌeteꞌe igirotene, ḡiḡaroniro, mazaḡa Roma mone vazeḡa obone tiro ꞌahine.

³⁰Irarirotene, uti vazeḡa boro ani, Iuda azaḡaꞌe nougadu Paulo mazao maḡuniroteꞌe huga ederihi reiro. Eꞌanoꞌo Pauloꞌe adiri mae butiro, ebu dibuꞌo hauꞌeteꞌe boroboro zu kanisoro azaḡa niduꞌa nuꞌoziro. Ebu Paulo tutune onaadu, zeḡe zamao mae ohoniro.