1Habahim Diyosepa sa lidiyen Idipi. Fuyana sa lawen amainiya, Idipi dogana Potifa, Falo ena tau paisowa hesa, gati edi laꞌilaꞌina Diyosepa ya une fahi Isamaiyeli dodogadi lebedi yai.
2Guyau mate maꞌena Diyosepa, be ya famala tau fagogo na ya miyamiya ena baꞌisa Idiꞌidipina ena luma yai.
3Ena baꞌisa Potifa Diyosepa ya ita mate Guyau maꞌena, be Diyosepa somo ya ginaulidi mate sa loholoho wananaha.
4Potifa, Diyosepa ya mata amnaꞌen be ya famala in ena tau ita wata laꞌilaꞌina. Potifa ya tole be ena luma yo ena ginauli mahudoꞌidi ya ita watanidi.
5Fuyana Potifa, Diyosepa ya faꞌobiyo ena luma yo ena ginauli mahudoꞌidi ya ita watandi mate, ena luma yo ana gabu Guyau ya faloholohodi, Diyosepa debana yai.
6Potifa ena ginauli mahudoꞌidi ya tole afuledi Diyosepa lisina yai, hige somo hesa i modeꞌen. Ena mode moho mate somo bena ya an. Diyosepa ya tau gigi yo hewalina ya loholoho.
7Hige walolona, Potifa lahuna nuwana ya fabwala be ya libalau Diyosepa lebena iyen, U laoma, be ta eno!
8In moho Diyosepa ya waiyoꞌo, yo fede ya libalau waihin lisina, iyebom, Egu baꞌisa ya tolegu be ginauli mahudoꞌidi luma yai te E ita watanidi, logena be hige ginauli hesa i modeꞌen.
9Hige baꞌisa laꞌilaꞌi luma yai te doha yau. Hige somo hesa i laugagayoꞌen lisigu yai. In moho hige i falibagu bena um be yau ta eno, paꞌana um mate lahuna. Sidohana haba laulau heyaheyayana te E ginauli Yaubada matana yai?
10Fuya ouꞌouli waihin ya libalibalau Diyosepa lisina, na hige i fanuha bena i lau sadaina e maꞌena ti eno.
11Lahai esega Diyosepa ya lau luma ganahewana be ana paisowa ya ginauli, na hige tau paisowa laꞌi ganahewa yai.
12Waihin ya abilau ana luhuluhu yai na iyen, U laoma, ta eno! In moho, Diyosepa ya tagu asi be ya lau ganamuli yo fede ana lululuhu waihin ya fafafahi be nimana yai.
13Lahaina yai, Diyosepa ya gela be ya lau ganamuli, na luhuluhu moho waihin ya tohatohai nimana yai, yo fede,
14waihin ya yoga lau tau paisowa lisidi ena luma yai, iyen, Ami ita! Lahugu, Hebelu dogana ya leyama lebeda mate ya fataumayamayada! Ya luhuma amaiteꞌi be bena maꞌegu ꞌe eno, in moho E yogayogaꞌen.
15Maihalana yai ya atahi E fafatala yogaꞌen bena sagu E lobahi, yo fede ana luhuluhu ya lau afulen sadaigu yai na ya gela.
16Ana luhuluhu ya tole sadaina yai ee–, ena baꞌisa ya mahanoma.
17Habahim enehena ya dede. Iyen, Hebelu dogana tau lau fayofayo wa leyama lisida mate ya laoma lisigu be bena ya aiheyaꞌegu.
18In moho E yogayoga bena sa saguhigu, yo fede ana luhuluhu ya lau afulen sadaigu yai na ya gela.
19Fuyana Diyosepa ena baꞌisa lahuna dedena ya atahiyen, na waihin iyen, Em tau lau fayofayo ya tohatohaigu! Mate ya gafu pou.
20Potifa, Diyosepa deli yai ya tole, kin ena pilisin edi aba miyamiya yai.
21Na Guyau mate maꞌena yo ya faloholoho be mata amna deli tau ita watanina ya felen.
22Yo fede deli baꞌisana, Diyosepa ya tole pilisin edi baꞌisa, yo paisowa mahudoꞌidi amainiya mate ya ita watan.
23Be hige i mode, paꞌana Guyau maꞌena Diyosepa yo somo ya ginaulidi Guyau ya faloholohodi.
