1Muli yai, habahim, Yaubada Abelaham ya lauꞌita. Ya libalau lebena, iyen Abelaham! Na Yaubada alinana Abelaham ya bui, iye, Yau ite.
2Habahim Yaubada iyebom, Natu eseꞌesegam, Isako, wa fanuha wananahai, u foyahi, be u lau Moleya nuꞌuna. Ainiya natum u gabu golu, be ya famala em ainauya, tuꞌa hesa haba E libaen, ai hewana.
3Bonbonna hola ma hwalahwalalana, Abelaham ya obiyo. Ena ainauya oyagina ya abi nonohai, be donki hewana yai ya au fapatudi. Tau paisowa luwaga yo Isako Abelaham ya foyahidi, sa lau, nuꞌuna somo Yaubada haꞌa ya faliba ana halulu.
4Lahai fafaihonana yai, Abelaham matana ya falaba hitiꞌi, mate nuꞌuna eda lofalofa yai, ya ita lawen.
5Ena tau paisowa ya falibadi, iyen, Maꞌemiu donki aiteꞌi au miyamiya, na maꞌegu gwama te, ꞌe lau au–, ꞌe lauꞌuꞌula, na ai muli haba ꞌe fuyoma lisimiu.
6Abelaham ainauya oyagina ya abi, be Isako ya fabahei, na in nigo yo tauꞌala ya abidi, be sa lau luwaluwaga.
7Isako ya libalau tamana lisina, iyen, Tamagu? Abelaham natuna alinana ya bui, iyen, Natugu, somo? Isako iyen, Tauꞌala yo oyagi haꞌa ite, na ainauya sipi natuna, somo yai?
8Abelaham alinana ya bui, iyen, Natugu, Yaubada, ainauya sipi natuna haba ya nonohai, be te gabu golu.
9Sa mahano lau Yaubada nuꞌuna ya libalibaen, Abelaham katakatan ya ginauli, na oyagi hewana yai ya toledi, habahim natuna ya auꞌaui, na ya faꞌeno oyagi hewadi yai.
10Habahim nigo ya abi, na ya gegei, bena natuna ya gwali.
11Na Yaubada ena anelu galewa yai ya yoga lidi lebena, iyen, Abelaham! Abelaham! Alinana Abelaham ya bui, iyen, Yau ite.
12Yaubada iyen, Tabu nimam u faguli gwama ai hewana. Tabu somo hesa u ginauli ai lisina. Atabahim E sibai, mate Yaubada wa ꞌwasabuwen, paꞌana natum eseꞌesegana, hige u nuhafi.
13Abelaham matana ya falaba hitiꞌi, na ya timuli, mate sipi tamoꞌana ya ita, donana ya fatalaꞌafi oyagi kiukiu lagana yai. Ya lau ya abi, na ya gabu golu, ena ainauya. Ya famala natuna falau damahina.
14Abelaham nuꞌuna hesana ya tole: “Guyau ena felefele.” Aho te nuꞌuna hesana sa atahi “Guyau ena Felefele Oyana.”
15Guyau ena anelu galewa yai ya liba fuyo, iyen,
16Laulau te wa ginauli, be natu eseꞌesegam, hige u oihalaen. Be Yaubada ya angwala, iyen,
17Egu loholoho haba E felem, na am hiti mulita haba sa tadada doha kipwala galewa yai, yo doha gelegele gabogabo sadaina yai, na adi waiyunu edi duhu balabalamumu haba sa eli halahalaedi.
18Laulauwewem ai debadi, tanoꞌubu mahudoꞌina haba egu loholoho E feledi, paꞌana egu liba wa awaꞌabiyen.
19Habahim Abelaham yo Isako sa fuyo ena tau paisowa lebedi, be sa fuyo Belesiba. Amainiya, sa miya fiyo.
