1Bwaꞌibwaꞌina, dodoga mahudoꞌidi tanoꞌubu yai mate alina esega sa fapaisowa.
2Tefa saisai yai sa aulaha sa laoma ee–, sa mahano Babela Gonna yai sa miya.
3Sa faliba fuyoꞌidi tiyen, Au laoma! Haba bwadagowa te abi be te gabu fapoꞌidi. Be luma edi aba ginaulina mate ginaulidi sa fanonohaidi.
4Na tiyen, Matabahim, haba duhu balabalamumu hesa te ginauli yo luma hesa laꞌilaꞌi na hewa lofalofana te ginauli ya hasai ee–, galewa. Haba sa noꞌonoꞌoꞌeda be tabu ta failaulauwida.
5Habahim Yaubada ya lidima be duhu balabalamumu yo luma hewa lofalofa dodoga sa ginauli, ya ita,
6be iyen, Itete mate boga esega yo alina esega yai sa libaliba, yo itete mate fatufatubu moho. Mulina yai sa fanuha somo sa nuwatuhui bena sa ginauli, haba sa ginauli.
7Haga ta lidi be edi alina ta bui, be tabu alinadi ti atahi lobahi fuyoi.
8Yo fede Yaubada ya fadabalaladi, be sa lau tanoꞌubu tefa hesa - hesa yai, na duhu balabalamumu ginaulina, sa fatautau.
9Duhu balabalamumuna, hesana sa tole: Babela, paꞌana amainiya Yaubada dodoga mahudoꞌidi edi alina ya buidi, na sa failaulauwidi be sa lau tanoꞌubu tefa haisa yai.
27Itete Tela laulauwewena: Abelam, Nahola, yo Halan. Tamadi mate Tela. Lota mate, tamana Halan.
28Fuyanna Halan, Ula Nuꞌuna yai Kaladiya ganahewana yai, ya peꞌi mate tamana hola ya miyamiya.
29Abelam mate lahuna Salaiya, na Nahola lahuna Milika. Halan natuna mate Milika yo Isika.
30Salaiya mate ya agali.
31Tela natuna Abelam, wahana Halan natuna Lota, yo botiyana Salaiya, Abelam natuna, mate mahudoꞌidi Kaladiya dodogadi edi nuꞌu Ula yai sa aulaha bena sa lau Kanana. In moho, sa lau ee–, Halan nuꞌuna yai amainiya sa miya. Na hige ti abi mahano Kanana yai.
32Tela ena bolima 205 habahim ya peꞌi Halan Nuꞌuna yai.
