A Umana Kakailai 9:10-20

¹⁰Ma diat dia nunure ra iangim, diat a nurnur tam, Tago u, Luluai, pa u nur vue diat dia tikan up u.

¹¹Avat a kakailai na pite varpa tadav ra Luluai, nina i ki Sion; Avat a vaarike kana lavur papalum livuan pire ra tarai.

¹²Tago nina i varvartir ure ra vardodoko i nuk pa diat, Pa i nuk vue ra kinail kai ra umana luveana.

¹³Una mari iau, Luluai; Una gire ra mangana varmonong nina ba iau kairane ta diat dia milikuane iau, U nam, ba u puak vairop iau kan ra mataniolo na minat;

¹⁴Upi ina vaarike vapar ra pite varpa piram, Ta ra umana mataniolo kai natu i Sion, a vavina, Ina gugu tuna ta kaum varvalaun.

¹⁵A umana Tematana dia tar bura ta ra tung dia ga kal ia, Ra ubene dia ga vung ive pa ia, i kun vake ra kak i diat iat.

¹⁶Ra Luluai i tar vaarike ia iat mulai, i tar varkurai; A tena varpiam i virua ta ra papalum na limana iat. Igaion, Sela.

¹⁷A umana tena varpiam diat a talil ta ra ruarua na tulungen, Maia pa, diat par a umana Tematana ba dia nuk vue God.

¹⁸Tago diat dia ki na niiba vakir da nuk vue diat vatikai, Ma pa na rara tukum nam ba ra umana luveana dia nuknuk upi ia.

¹⁹Luluai, una tut; koko ra tarai diat a uvuvia; Boina ba da kure ra umana Tematana ta ra luaina matam.

²⁰Luluai, una vaburut na kaia diat; Boina ba ra lavur Tematana diat a nunure ba diat a tarai ka. Sela.