Pisalem 9:10-20

¹⁰Meenei Dimaadua, digau ala e iloo ginaadou Goe, ga hagadagadagagee adu gi di Goe. Goe hagalee diiagi di ingoo hua tangada dela ma ga hanadu gi di Goe.

¹¹Goodou daahili hagaamu ina Dimaadua dela e dagi i Zion! Hagi aga ina gi nia henua huogodoo ma ni aha ne hai go Mee!

¹²God e langahia digau ala e duadua. Mee hagalee de langahia nia dangidangi digaula, gei Mee e hagaduadua digau ala e hai digaula haga huaidu.

¹³Meenei Dimaadua, dumaalia mai! Mmada malaa gi ogu dadaaligi ala e hai go ogu hagadaumee mai gi di au! Meenei Dimaadua, daawa ina au gi daha mo di made,

¹⁴gii mee au di duu i mua nia daangada o Jerusalem, e hagi anga gi digaula nia mee huogodoo ala e hagaamu Goe ko au. Au e tenetene idimaa Goe dela gu haga dagaloaha au.

¹⁵Digau o di bouli la guu too gi lodo nadau lua ne geli. Digaula guu bida kumi go nadau hele.

¹⁶Dimaadua gu hagamodongoohia Ia mai i dana hai dela e gabunga nia daangada gii donu, gei digau hai mee huaidu guu bida hele go nadau hegau.

¹⁷Di made la go di hagaodi gi muli o nia daangada huaidu huogodoo, mo di hagaodi gi muli o digau huogodoo ala e haga balumee a God.

¹⁸Digau hagaloale la hagalee de langahia i nia madagoaa huogodoo. Nadau hagadagadagagee la hagalee mooho ga hana hua dee odi.

¹⁹Hanimoi, meenei Dimaadua! Goe hudee dugu ang gi nia daangada gi hai baahi adu! Laha mai digau o di bouli gi oo mua, hagi aga ina digaula.

²⁰Meenei Dimaadua, heia digaula gi mmaadagu, heia digaula gi iloo bolo ginaadou la nia daangada hua.