Gesami Hea:su 9:10-20

¹⁰Hina Gode! Nowa da Dia hou dawa:sea, ilia da Di dafawaneyale dawa:mu. Nowa da Dima masea, Di da amo dunu hamedafa yolesimu.

¹¹Hina Gode da Saione soge amo ouligisa. Ema nodone gesami hea:ma. Fifi asi gala huluane ilima Ea hou olelema.

¹²Nowa dunu e se nabasea amola disia, Gode da hame gogolesa. Amola dunu da ilima se iabe, Gode da ilima amolawane se iaha.

¹³Hina Gode! Nama asigima! Nama ha lai dunu da nama se bagade iaha. Hina Gode! Na bogosa:besa:le, hedolo fidila misa.

¹⁴Amasea, na da Yelusaleme dunu fi amo ilia midadi lelu, liligi huluane na Dima nodosa, amo huluane ilima olelemu. Dia da na gaga:iba:le, na da hahawane bagade ba:mu.

¹⁵Hame lalegagui dunu fedege agoane da ilia uli dogole, amo ganodini dafai. Ilia da eno dunu sa:ima:ne sanenisisia, ilisu da amo sani ganodini sa:i dagoi.

¹⁶Hina Gode da Ea moloidafa fofada:su amoga Ea hou olelesa. Be wadela:i hamosu dunu da wadela:le hamobeba:le, ilila: sanenisisu amo ganodini daha.

¹⁷Dunu huluane amo da wadela:le hamosa amola Godema higabe dunu huluane da bogosu ba:mu.

¹⁸Wali hame gagui dunu da se nabawane esala. Ilia da banenisi dagoi agoai ba:sa. Be amo hou da eso huluane hame dialumu.

¹⁹Hina Gode misa! Osobo bagade dunu da Di higamu da defea hame galebe. Di wadela:i hamosu dunu amo Dima fofada:musa: misa:ne sia:ma. Amasea, ilima fofada:nanu, se iasu ima.

²⁰Hina Gode! Ili beda:ma:ne hamoma. Ilia da osobo bagade dunu fawane amola ilia da bogosu ba:mu. Amo ilia dawa:ma:ne, Di olelema.