SALMOS 9:10-20

¹⁰Quena, TOTECO, nochi cati mitzixmatij motemachise ipan ta para tiquinpalehuis, pampa amo quema tiquintahuelcahuas cati mitztemohuaj.

¹¹Xihuicaca huan xijpaquilismacaca TOTECO, cati mosehuía ipan isiyaj cuajcualtzi nepa ipan Jerusalén huan nochi quinahuatía. Xiquinpohuilica nochi masehualme ipan taltipacti cati yaya quichijtoc.

¹²TOTECO quintzontamiltis cati temictíaj pampa quej nopa quinamiqui quincuepilis. Quinelnamiqui cati motequipachohuaj, quintacaquilía quema masehualme cati taijyohuíaj quitzajtzilíaj para ma quinpalehui.

¹³Techtasojta, TOTECO. Xiquita quenicatza nitaijyohuía inimaco cati amo quinequij nechitase. Techmanahui pampa quinequij nechmictise,

¹⁴huan na nimitzpaquilismacas iniixpa nochi masehualme. Niquinpohuilis nochi cati mosentilíaj ipan altepet Jerusalén cati techchihuilijtoc. Nelía nipaquis pampa techmaquixtijtos.

¹⁵Mosisinijca masehualme ten nochi talme huetzise ipan nopa ostot cati inijuantijya quichijque. Quitatijtoque se taquetzti para ma masica sequinoc, pero inijuanti masise.

¹⁶TOTECO quichijtoc para nochi ma quimatica para yaya xitahuac tetajtolsencahua. Yaya quichihua para ma huetzica ipan taquetzti cati ica inimax

¹⁷Nochi amo cuajcualme yase micta. Quena, nepa ajsitij nochi masehualme cati amo quielnamiquij Toteco Dios.

¹⁸Pero Toteco amo quinelcahuas cati teicneltzitzi. Yaya nochipa quinmacas cati quichiyaj para quiselise.

¹⁹Ximotanana, TOTECO. Amo xiquincahuili masehualme más ma quipiyaca chicahualisti. Xiquintajtolsencahua huan xiquintatzacuilti nochi masehualme cati amo mitzixmatij.

²⁰Xijchihua ma majmahuica, TOTECO. Ma momacaca cuenta nochi masehualme ipan nochi talme para inijuanti san panoni.