SALAMO 9:10-20

¹⁰Lohiabada e, oiemu ladana idia diba taudia ese, oi do idia abidadama henia. Oi dekenai idia mai taudia, be oi ese idia do oi rakatania lasi, lasi momokani.

¹¹Lohiabada, Siona dekenai ia noho Dirava, be do umui hanamoa! Iena kara be, bese idauidau edia huanai do umui herevalaia!

¹²Badina be rara ena davana, ia henia noho ena Dirava ese, hisihisi idia abia noho taudia ia laloa. Edia taitai ia laloaboio lasi, bona idia dekenai hisihisi idia henia taudia, edia kerere davana be Dirava ese do ia henia.

¹³Lohiabada e, lau dekenai do oi bogahisihisi henia! Lau idia hadikaia noho taudia dekena amo, lau abia hisihisi mani do oi itaia. Lohiabada e, mase dekena amo lau do oi hamauria.

¹⁴Unai neganai, Ierusalema taudia, edia vairanai do lau gini diba, bona oi ese lau oi hamauria kara ibounai, be idia dekenai do lau hamaorolaia. Oi ese lau oi hamauria dainai, do lau moale bada herea momokani.

¹⁵Dirava diba lasi taudia ese, guri badana idia geia vadaeni, bona iena lalonai idia moru. Sibodia idia karaia tarapu ese, idia ia abia vadaeni.

¹⁶Lohiabada ese sibona ena kara, be ia hedinaraia vadaeni, iena kota maoromaoro dekena amo. Kara dika taudia be edia kara ese, idia ia hadikaia noho.

¹⁷Kara dika taudia ibounai, edia dokona be mase. Dirava idia negea taudia ibounai, danu edia dokona be mase.

¹⁸Gau lasi taudia, be Dirava ese ia laloaboio lasi. Ogogami taudia edia abidadama, be abidadama kava lasi. Edia abidadama ena anina, be do ia boio ore lasi, to gabeai do ia vara.

¹⁹Lohiabada e, do oi toreisi, taunimanima edia hekokoroku do oi koua! Dirava idia ura henia lasi taudia, be do oi kota henia, bona edia dika davana do oi gwauraia.

²⁰Lohiabada e, idia do oi hagaria, bona idia do oi hadibaia, idia be taunimanima sibona.