A Umana Kakailai 90:1-10

¹A niaring kai Moses ra tutana kai God. Luluai, u kaveve rivarivan ta ra lavur taun tarai par.

²Ba pa di ga pait vaarike boko ra lavur lualuana, Ma ba pa u ga vaki boko ra pia ma ra rakarakan a gunagunan, U muka God u tar ki, pa ta vunapaim ma pa ta mutuaim.

³U kure ra tarai ma dia lilikun ta ra tobon; Ma u biti: Avat a talil, avat a lavur natu i ra tarai.

⁴Tago ra arip na marmar na kilala dia varogop piram ma nabung uka ba i par, Ma dia da ra nimono na marum.

⁵U kapkap vue diat da ra lovon ta; dia varogop uka ma ra nidiop; Na malana dia da ra vura i gol;

⁶Na malana i lubalubang, ma i tavua; Na ravian di doko pa ia, ma i makuk;

⁷Tago kaum kankan i vaimur avet, Ma ave purpuruan tuna ta ra karangap i kaum kankan.

⁸U tar vung vaarike kaveve lavur varpiam ta ra luaina matam, Ma kaveve lavur varpiam ba i tur ivai, u tar vung diat ta ra talapar i ra matam.

⁹Tago kaveve nilaun i panie ke ta kaum kulot, Ma ave vapar vue kaveve kilakilala da ra oir.

¹⁰Kaveve kini ati ra pia i varogop ma lavurua na vinun na kilakilala, Ma ba i ongor ra paka i vevet, kan na varogop ma lavutul na vinun na kilakilala; Ma ra dekdek na papalum ma ra niligur i vana rikai ta kadia minamar, Tago i par lulut, ma ave vilau ka.