Pesalem 90:1-10

¹O Apômtau, aôm kôtu aêacma lamu. Gôlôac to gôlôac sê lamu aôm.

²Lôc gêboa tau sa atomgeŋ ma aôm kôkêŋ nom to ŋagêŋlêlôm samob atomgeŋ, naŋ aôm Anôtô gômoa teŋgeŋ to teŋgeŋ.

³Aôm kôkêŋ ŋamalac têtu kekop kêtiam ma kôsôm gebe “O ŋamalac latui, amu ana.”

⁴Aôm gôlic jala tausen kêtôm bêc nôgeŋŋa, taŋ gêjaŋa naŋ, ma kêtôm ajam jali dambêgeŋ gêdêŋ gêbêc.

⁵Aôm kôtiŋ aêac su amboac bu lau. Êsêac sêmoa dambêgeŋ amboac taêc bêc ma taêc mê têlageŋ. Êsêac têtôm oba ŋamêdôb, taŋ kêpuc wakuc gêdêŋ bêbêcgeŋ naŋ.

⁶Bêbêcgeŋ kêpuc ŋajam-ŋajamgeŋ e kêtula ma kêmêliŋ e kêtu masê.

⁷Aôm têmtac ŋandaŋ kêdaŋgac aêac su ma aômnêm ŋalêlôm kêmoatiŋ tôŋ kêtakê aêac secanô.

⁸Aôm kotoc aêacma geo kêkô aôm laŋômnêmŋa. Aôm laŋômanô ŋawê kêpô aêacma sec, taŋ gêc lêlômgeŋ naŋ.

⁹Gebe aôm têmtac ŋandaŋ gêjac aêacma bêc samob gêŋgic. Aêacma jala kêtôm ataŋ aweŋ kêtu dambê.

¹⁰Aêac amoa mateŋ jali ŋajala jagêdêŋ 70. Ma embe aŋgôŋ ŋêŋgeŋ, naŋ oc naêndêŋ 80. Mago jala tau ŋanô gêŋwapac to ŋanômê ma gê su sebeŋ amboac moc gêlôb.