1 Reye 22:31-40

³¹Siriad̶ebema boroba carretad̶eba djõbada bororãda 32 erob̶asia. Djõbʌdad̶e ãdjirãa jarasia baridua ume djõrãnamãrẽã, ãtebʌrʌ ab̶abe Israeld̶ebema boro Acabo ume djõnamãrẽã.

³²Carretad̶eba djõbada bororãba Josapa unusid̶ad̶e idji djio carea crĩchasid̶aa idjira Israeld̶ebema boro Acaboda. Maʌ̃ carea idjimaa djõne wãsid̶aa. Baribʌrʌ Josapara b̶iasia idji sordaorãba carebad̶amãrẽã.

³³Mãwã b̶iabʌrʌd̶e Siriad̶ebema carretad̶eba djõbada bororãba cawasid̶aa idjira Israeld̶ebema boro Acaboẽ́da. Maʌ̃ bẽrã idu b̶ʌsid̶aa.

³⁴Maʌ̃ne Siriad̶ebema sordaoba chada baridua drʌsia. Maʌ̃ chaba Acaboda sud̶e wãsia idji jãare jʌ̃ b̶ʌ jũãtrʌbari ewara b̶ʌmaa. Ara maʌ̃da Israeld̶ebema boro Acaboba idji carreta edebʌrʌ́a nãwã jarasia: –Jẽda ededua. Naʌ̃ djõ panʌnebemada mʌ̃ra ãyã ededua. Chaba mʌ̃ra drʌ ataubisid̶aa.–

³⁵Maʌ̃ ewarid̶e israelerãra Siriad̶ebemarã ume dãrã djõsid̶aa. Djõ panʌne Israeld̶ebema boro Acaboba idji carretad̶e ʌ̃ta acʌ nũmasia. Acabora dji cãbãyã oa ze nũmʌ bẽrã idji carreta jãra oaba purega nũmesia. Quewara Acabora beusia.

³⁶Ʌ̃mãdau b̶aebʌrʌd̶e israelerãba nãwã b̶iasid̶aa: –¡Waa djõnaẽ́a! ¡Dadji druaza, puruza bid̶a wãnia!–

³⁷Mãwã Israeld̶ebema boro Acabora beusia. Idjira Samariad̶aa eded̶aped̶a tʌb̶arisid̶aa.

³⁸Maʌ̃be Samaria caita baido ũmʌmaa idji carretara sʌgʌd̶e edesid̶aa. Mama wẽrãrã aud̶uada cuibadjid̶aa. Maʌ̃ne usaba Acabo oara sene duanesid̶aa Ãcõrẽba Elíad̶eba jarad̶a quĩrãca.

³⁹Jũma Acaboba od̶a naʌ̃ cartad̶e b̶ʌẽ́ b̶ʌra, idjia israelerã pe erob̶ad̶ad̶ebemada, idji de droma elepante quid̶aba bio djio b̶ʌd̶ada, puru b̶ea idjia od̶a sid̶a dewara cartad̶e b̶ʌ́ b̶ʌa. Maʌ̃ carta trʌ̃ra “Israeld̶ebema bororãba oped̶ad̶a” abadaa.

⁴⁰Acabo beud̶acarea idji warra Ocozíada idji cacuabari Israeld̶ebema boroda b̶esia.