Kiŋ 1 22:31-40

³¹Kiŋ Suriaŋa kêjatu nê laumata karetaŋa gebe “Anac siŋ êndêŋ lau ŋaôma to laumata atom êndêŋ kiŋ Israel ŋa taugeŋ.”

³²Ma gêdêŋ taŋ laumata karetaŋa sêlic Jehosapat naŋ, êsêac sêsôm gebe “Tonaŋ kiŋ Israelŋa biŋŋanôgeŋ.” Tec samob sêkac tauŋ ôkwi sebe sênac siŋ êndêŋ eŋ. Go Jehosapat kêwakic lasê.

³³Gêdêŋ taŋ laumata karetaŋa sêlic gebe kiŋ Israelŋa tonaŋ atom naŋ, êsêac sêkac tauŋ ôkwi ma sêjanda eŋ kêtiam atom.

³⁴Mago siŋwaga Suriaŋa teŋ kêkêkam nê talam jakêpê paliŋpaliŋgeŋ e kêtap kiŋ Israelŋa Ahab sa kêsêp ŋakwê ki ŋagala. Tec kiŋ kêsôm gêdêŋ ŋac, taŋ gêjam gôliŋ kareta naŋ, gebe “Aê katap kamoc sa sugac, tec ôkac ôkwi ma daêc siŋ su.”

³⁵Siŋ ŋandaŋ kêsa gêdêŋ bêc tonaŋ ma lau sêpuc kiŋ tôŋ kêkô kareta ŋaô laŋôanô gêdêŋ lau Suriaŋa e gêdêŋ kêtula eŋ gêmac êndu. Ma ênê kamoc ŋadec keseleŋ kêsêp jakêpoac kareta ŋalêlôm.

³⁶Ma gêdêŋ oc jakêsêp wali teŋ kêtaŋ siŋwaga samob sêŋô gebe “Lau samob dêndêŋ nêŋ malac ma nêŋ gamêŋ êndêŋ-êndêŋgeŋ sêna.”

³⁷Amboac tonaŋ Ahab gêmac êndu ma sêkôc eŋ sêmêŋ Samaria ma sêsuŋ eŋ aŋga tonaŋ.

³⁸Êsêac sêkwasiŋ kareta sêmoa bu-gêjac-toŋ Samariaŋa ma kêam têdamôê ênê dec ma lauo mockaiŋoŋa sêliŋ bu tau kêtôm biŋ, taŋ Apômtau kêsôm lasê naŋ.

³⁹Gêŋ ŋagêdô samob, taŋ Ahab gêgôm ma andu, taŋ eŋ kêkwê ŋa jabo naŋ, to malac samob, taŋ eŋ kêkwê naŋ, êsêac teto ŋabiŋ gêc kiŋ Israelŋa nêŋ miŋ ŋabuku.

⁴⁰Amboac tonaŋ Ahab gêc nê bêc gêc gêwiŋ nê tamai ma eŋ latu Ahasia gêjam gôliŋ gêjô eŋ su.