1Urumeleŋ alaurupni, nöŋön eŋgöreŋ kaba Anutugö könaŋi naŋgöba jim asarim eŋgiali, mi keuni nahöm sorokŋambuk akŋapköra qahö jiba malal me gölmegö mötkutukutu öŋgöŋgöŋi kondela miaŋön sileni qahö memba öŋgöba malal.
2Nöŋön eŋgö sutŋine mötmöt murutŋi pakpak göraŋe ala Jisös Kraistkö keuŋi aka maripomnöŋ kömuyöhaŋgö könaŋi miyök möt kutuba mi jim sehimamgö keu jöhöyal.
3Keu mewö jöhöba eŋgöreŋ kayali, nalö miaŋgöreŋ azi lölöwöröŋi aka jönömni gwötpuk undui keŋgöt qakŋe malal.
4Nöŋön Buŋa keu jim asarim eŋgiali, mi mötkutukutu ketaŋaŋgö kelök keuŋi qahö jiba malal. Mi qahöpmö, Uŋa Töröŋan sölölöhöm eŋgii ösum-mumuŋan uruŋine inahömapköra kapaŋ köla jiba malal.
5Gölme ambazipkö mötkutukutuŋinan qahöpmö, Anutugö kukösumŋan nam köl eŋgiiga möt narimegöra kapaŋ köla malal. Mewö.
6Nöŋön töndup urumeleŋ alaurup aködamunŋinambuk maljei, yeŋgö sutŋine tatpiga Anutugö mötkutukutuŋi gegeŋi mi ölöp eraum mörakzin. Gölmegö mötkutukutuŋi mi qahö eraum mörakzin. Gölmeŋi gölmeŋi galöm köl eŋgiba malgetka kukösumŋinan qahöwakŋawi, yeŋgö mötkutukutuŋini mi mewöyök qahö eraum mörakzin.
7Mi qahöpmö, Anutugö mötkutukutu tölapŋi mönö mi eraum mörakzin. Anutunöŋ Suep gölme qahö miwikŋaim etkiiga miaŋgöreŋ mönöwök qeljiŋe lök areŋi kewö ala jöhöyök, “Ambazipnöŋ biaŋ ahuba aködamun miwikŋaiba oyaeŋkoyaeŋ akŋegöra mönö mötkutukutuni qainŋi kun mi eŋgimam.” Mewö jiba tölapŋe ali ahöyök.
8Gölmegö azi kembuŋi kembuŋi mala kotkeri, yeŋgöreŋök kunŋan mönö mötkutukutu mi qahö möt kutuyök. Mi möt kutubeak ewö, Kembunini asakmararaŋambuk i mönö maripomnöŋ qahö qegetka kömumbawak.
9Mötkutukutu qainŋi kun miaŋgöra keu kewö ohoget ahöza, “Kunŋan yuai mi je kezapŋan qahö eka mörök. Miaŋgö mötmötŋan kungö uruŋe qahö asuhui mörökmö, ambazip Anutu uruŋinan jöpaköm waŋgimakzei, yeŋgöra mi mönö mözözömgöiga jöjöröba ahöza.”
10Gölme ambazip yuai mi qahö möta jipjap malgetmö, Anutunöŋ mi mönö Uŋaŋi melaiiga neŋgöra indeli mörin. Yaŋön keu pakpakö könaŋi jaruba miwikŋaimakza. Anutugö mötmöt gegeŋi mewöyök möt teközawaŋön mönö mi sölölöhöm neŋgiiga mörin.
11Kungö uruŋi kunöŋ qahö mötza. Uruŋaŋgö uŋaŋi yaŋönök mönö mi möt yaköza. Mewöŋanök Anutugö uruŋi mi kunŋan qahö mötzapmö, Anutu nanŋi Uŋaŋi Töröŋi yaŋönök mi möt yaköza.
12Neŋön gölmegö ahakmeme bölöŋaŋgö ömeŋi kun qahö buŋa qem aŋguinmö, Anutunöŋ yuai kalem neŋgiyöhi, miaŋgö könaŋi mötpingöra mönö nanŋi Uŋaŋi melaii urunine geiga maljin.
13Miaŋgö könaŋi gegeŋi tokoba eraum mörakzin. Gölme ambazipnöŋ mötkutukutuŋinaŋgö qakŋe keu kusum neŋgigetka miaŋgö dop mi qahö eraum mörakzin. Mewö qahöpmö, Uŋa Töröŋan keu kusum neŋgiyöhi, miaŋgö dop mönö urugö keu ölŋi kewöringa sölölöhöm neŋgii jim asarimakzin.
14Uŋa Töröŋan sölölöhöm neŋgiiga keu mi mewö kewötzin ewö, könaŋi mönö miwikŋaiba möt asaribinaŋgö dop akza. Miaŋgöra Uŋa Töröŋan denike yeŋgö uruŋine qahö mali öne laŋ maljei, yeŋön Anutu Uŋaŋaŋgö buŋaŋi mi möt aŋgön kölbingö osimakze. Yeŋön Buŋa miaŋgöra mötketka uruqahö keu tandök aiga könaŋi möt asaribingö osize.
15Yeŋön osizemö, Uŋa Töröŋan sölölöhöm neŋgiza ewö, mönö keu pakpakö könaŋi kewöta jim teköbinaŋgö dop akzin. Mewö akzinmö, urumeleŋ ambazip kungö könaŋamŋi mi gölme ambazip körekŋan törörök jim teköbingö osimakze.
16Miaŋgö könaŋi mi Buŋa Kimbinöŋ kewö ohoget ahöza, “Kembugö urumötmötŋi mi azi kunŋan kun qahö mörök. Miaŋgöra kunŋan i goro qambaŋ waŋgimawaŋgö dop qahö.” Kunŋan mi qahö mörökmö, neŋön Kraistkö urumötmötŋi memba maljin. Mewö.
