1 KINANƆ 8:24-60

²⁴N yã kũ n a lɛ́ sɛ̀ n zↄ̀bleri ma de Daudanɛɛ pàpa. N ò kũ lɛ́omɛ yã, gbãra sà n pàpa.

²⁵Tera sà Dikiri Isarailanↄ Luda, n lɛ́ sɛ̀ n zↄ̀bleri ma de Daudanɛ n pì, tó a burinↄ ń zĩda kũna dↄ̃ akũsↄ̃ ò tɛ́ n zɛ́n lákũ à tɛ́i nà, onigↄ̃ kú Isaraila kpatan gↄrↄ sĩnda pínki.

²⁶Isarailanↄ Luda, ǹ tó yã kũ n ò n zↄ̀bleri ma de Daudanɛ kɛ yãpura ũ sà.

²⁷Ama Luda, ĩnigↄ̃ kú zĩtɛ la yãpuran yá? Musu kũ a leikɛo ni fↄ̃ à n síro, bele kpɛ́ kũ ma bònnɛ díkĩna sàa?

²⁸Dikiri ma Luda, ǹ laakari dↄ makũ n zↄ̀bleriia, ǹ ma aduakɛna kũ ma kutɛkɛnao sí. Ǹ sã kpá ↄ́ kũ makũ n zↄ̀bleri matɛn dↄnyĩi kũ adua kũ matɛn kɛmmao gbãra.

²⁹Ǹ tó n wɛ́ gↄ̃ pɛna kpɛ́ díkĩnaa gwãani kũ fãnantɛ̃o, gu kũ n pì n tↄ́ nigↄ̃ kúa díkĩna pìi. Ǹ adua kũ makũ n zↄ̀bleri madì kɛ arɛdↄna gu día ma.

³⁰Tó makũ n zↄ̀bleri ke n gbɛ̃ Isarailanↄ arɛ dↄ̀ gu día, tó ó wɛ́ kɛ̀mma, ǹgↄ̃ ó wɛ́kɛna sí zaa n kúkia musu ǹ sùru kɛ kũoo.

³¹Tó gbɛ̃ taari kɛ̀ a gbɛ̃dakenɛ, akũ ò pìnɛ à yã sí kũ n tↄ́o, tó à sù à yã sì kũ n tↄ́o n gbagbaki dí arɛ,

³²ǹgↄ̃ zɛ kũńwo zaa n kúkia musu ǹ mↄńnɛ. Ǹgↄ̃ yã gↄ̃gↄ̃ n zↄ̀blerinↄnɛ ǹ yã da taaridela, de a yãkɛna wí a musu ǹ yã nna kpá taarisaridea, de ò le ò dↄ̃ kũ à yãke vĩro.

³³Tó n gbɛ̃ Isarailanↄ ibɛrɛnↄ zĩ̀i blèḿma durunna kũ ò kɛ̀nnɛ yãi, ò tà kũńwo, tó ò ɛ̀ra ò arɛ dↄ̀mma ò n sisi, tó ò wɛ́ kɛ̀mma ò kútɛ kɛ̀nnɛ kpɛ́ díkĩnaa,

³⁴zaa n kúkia musu ǹgↄ̃ zɛ kũńwo ǹ sùru kɛ kũńwo kũ ń durunnanↄ, ǹ su kũńwo bùsu kũ n kpà ń dizinↄa díkĩna pìi gũn.

³⁵Tó ludambɛ gↄ̃̀ da wárawara, legũ dì maro kũ ò durunna kɛ̀nnɛ yãi, tó ò arɛ dↄ̀ gu díkĩnaa ò wɛ́ kɛ̀mma ò n sisi, akũsↄ̃ ò kpɛ lì ń durunnanɛ kũ n wɛ́ tã̀ḿma yãi,

³⁶zaa n kúkia musu ǹgↄ̃ zɛ kũńwo ǹ sùru kɛ kũńwo kũ ń durunnanↄ. Ǹgↄ̃ ń da zɛ́ manan, ǹ tó legũ ma n bùsu kũ n kpà n gbɛ̃nↄa ń pↄ́ ũ dí gũn.

³⁷Tó nà ke gagagyã kà bùsu dín, ke pↄ́wɛsirakũ ke pↄ́pukpana ke kwanↄ ke kwa'eseblerinↄ ke tó ibɛrɛnↄ lìka ń wɛ̃tɛ kei ke tó kisira ke gyã gɛ̃̀ ń tɛ́,

³⁸tó ń gbɛ̃ke yã kũ à a le dↄ̃̀, tó à a ↄ dↄ̀ kpɛ́ díkĩna kpa, tó à wɛ́ kɛ̀mma à kútɛ kɛ̀nnɛ,

³⁹zaa n kúkia musu ǹgↄ̃ zɛ kãao ǹ sùru kɛ kãao, ǹ kpái. Ǹgↄ̃ fĩna bonɛ a yãkɛnaaa, zaakũ ń a nɛ̀sɛ dↄ̃. Mↄkↄ̃n mɛ́ ń gbɛ̃ sĩnda pínki nɛ̀sɛ dↄ̃.

⁴⁰Lɛn onigↄ̃ vĩna kɛnnɛ lɛ ari ń wɛ̃̀ndi lɛ́n bùsu kũ n kpà ń dizinↄa díkĩna gũn.

⁴¹Zaakũ oni n tↄ́ zↄ̃kↄ̃ kũ n gã̀sã gbãnao kũ n ↄ kũ à poronaao baaru ma, tó gbɛ̃ zĩ̀tↄ kũ à de n gbɛ̃ Isaraila buri ũro bò bùsu zã̀zãn à sù n tↄ́ yãi, tó à arɛ dↄ̀ kpɛ́ día à wɛ́ kɛ̀mma,

⁴³zaa n kúkia musu ǹgↄ̃ zɛ kãao ǹ yã kũ à wɛ́ kɛ̀mma kɛnɛ, de andunia buri sĩnda pínki le à n tↄ́ dↄ̃, ò vĩna kɛnnɛ lákũ n gbɛ̃ Isarailanↄ dì kɛnnɛ nà, onigↄ̃ dↄ̃ kũ n tↄ́ kú kpɛ́ kũ ma bò día.

⁴⁴Tó n gbɛ̃nↄ bↄ̀tɛ ò gɛ̀ɛ zĩ̀ ká kũ ń ibɛrɛnↄ, bee gu kũ n ń zĩn pínki, tó ò arɛ dↄ̀ wɛ̃tɛ kũ n sɛ̀ día kũ kpɛ́ kũ ma bònnɛ dío, tó ò wɛ́ kɛ̀mma,

⁴⁵zaa n kúkia musu ǹgↄ̃ zɛ kũńwo kútɛ kũ ò kɛ̀nnɛ yãi, ǹ yã nna kpáḿma.

⁴⁶Zaakũ gbɛ̃ke dì gí durunna kɛiro, tó ò durunna kɛ̀nnɛ, tó n pↄ fɛ̃̀ńyĩ n ń ná ń ibɛrɛnↄnɛ ń ↄĩ, tó ò tà kũńwo ń bùsun zĩ̀zↄnↄ ũ bùsu zã̀zã ke a kãnin yá,

⁴⁷tó ò nɛ̀sɛɛ lìtɛ bùsu kũ òtɛn zↄ̀ blen pìi gũn, tó ò ɛ̀ra ò kútɛ kɛ̀nnɛ gwe ò pì: O durunna kɛ̀, o taari kɛ̀, o yã vãni kɛ̀,

⁴⁸tó ò arɛ dↄ̀mma kũ nɛ̀sɛ mɛ̀n doo kũ ń pↄyeinaao pínki zaa bùsu kũ òtɛn zↄ̀ blen ń ibɛrɛnↄnɛ pìi gũn, tó ò arɛ dↄ̀ bùsu kũ n kpà ń dizinↄa kũ wɛ̃tɛ kũ n sɛ̀ɛo kũ kpɛ́ kũ ma bònnɛ díooa, tó ò wɛ́ kɛ̀mma,

⁴⁹zaa n kúkia musu ǹgↄ̃ zɛ kũńwo kútɛ kũ ò kɛ̀nnɛ yãi, ǹ yã nna kpáḿma.

⁵⁰Ǹgↄ̃ sùru kɛ kũ n gbɛ̃ kũ ò durunna kɛ̀nnɛnↄ kũ taari kũ ò kɛ̀ɛo, ǹ tó gbɛ̃ kũ òtɛn zↄ̀ bleńnɛnↄ ń wɛ̃nda gwa,

⁵¹zaakũ n pↄ́vĩnanↄmɛ, n gbɛ̃ kũ n ń bↄ́tɛ Misilanↄ wɛ́tãmma pãsĩ gũnnↄmɛ.

⁵²Ǹ tó n wɛ́ gↄ̃ kú makũ n zↄ̀bleriia, ǹ sã kpá kútɛ kũ ma kɛ̀nnɛi kũ kútɛ kũ n gbɛ̃ Isarailanↄ kɛ̀nnɛo. Ǹ sã kpáńyĩ gↄrↄ kũ ò wiki lɛ̀mma pínki.

⁵³Dikiri Luda, zaakũ andunia buri sĩnda pínki gũn mↄ́kↄ̃nↄn n ń sɛ́ n gbɛ̃nↄ ũ, lákũ n ò n zↄ̀bleri Musa gãi nà gↄrↄ kũ n ó dizinↄ bↄ̀tɛ Misila.

⁵⁴Gↄrↄ kũ Sulemanu tɛn wɛ́ kɛ Dikiria, à kutɛna a kosoamɛ kũ a ↄnↄo porona musu. Kũ à adua kɛ̀ à làka, akũ à fùtɛ à zɛ̀ Dikiri gbagbakia gwe,

⁵⁵akũ à sa mana ò Isaraila kũ ò kú gwenↄnɛ ń pínki, à ò gbãnagbãna à pì:

⁵⁶Ò Dikiri sáabu kpá, zaakũ à ókↄ̃nↄ a gbɛ̃ Isarailanↄ gbà ĩampaki lákũ à ò nà. Yã mana kũ à a lɛ́ sɛ̀ a zↄ̀bleri Musa gãinↄ pàpa pínki, a ke dí lɛ́tɛ pãro.

⁵⁷Dikiri ó Luda gↄ̃ kú kũoo, lákũ à kú kũ ó dizinↄo nà. Àsun ó tónlo, àsun pã kpáwáiro.

⁵⁸À tó ò swɛ̃̀ kpáawa ògↄ̃ tɛ́ a zɛ́n, ògↄ̃ a yãditɛnanↄ kũna kũ yã kũ à dà ó dizinↄnɛnↄ, ògↄ̃ a ↄdↄki gwa.

⁵⁹Adua kũ ma kɛ̀ Dikiri ó Ludaa gↄ̃ dↄn fãnantɛ̃ kũ gwãanio. Àgↄ̃ yã nna kpá makũ a zↄ̀bleriia kũ a gbɛ̃ Isarailanↄ lákũ gu dìgↄ̃ dↄ nà,

⁶⁰de andunia buri sĩnda pínki le à dↄ̃ kũ Dikiri bi Ludamɛ, a pãnde kunlo.