1 KINANƆ 8:18-32 - Luda yã takada kũ Bisã yão

1 KINANƆ 8:18-32

Click on verse(s) to share them!

¹⁸akũ Dikiri pìnɛ kpɛ́bonaarɛ de a tↄ́ gↄ̃ kúa laasun kũ à kɛ̀ɛ pì mana,

¹⁹ama adi kɛ àkũ mɛ́ ani boarɛro, a zĩda nɛ́ ke mɛ́ ani boarɛ.

²⁰Akũ Dikiri kɛ̀ lákũ à a lɛ́ sɛ̀nɛ nà. Ma gↄ̃ ma de Dauda gɛ̃nɛ ũ, ma vutɛ Isaraila kpatan lákũ Dikiri Isarailanↄ Luda a lɛ́ sɛ̀ nà, akũ ma kpɛ́ dí bònɛ de a tↄ́ gↄ̃ kúa yãi.

²¹Gwen ma Dikiri àkpati ditɛki kɛ̀kɛn. Dikiri bàka kunna kũ ó dizinↄ ń bona Misila gbɛra yã kú a gũn.

²²Sulemanu arɛ dↄ̀ Dikiri gbagbakia Isaraila kũ ò kakarana gwenↄ wára ń pínki, akũ à a ↄnↄ sɛ̀ musu

²³à pì: Dikiri Isarailanↄ Luda, gbɛ̃ke dì sí lɛkↄ̃a kũnwo musu ke zĩtɛro. N gbɛ̃kɛ gũn n bàka kú kũ n zↄ̀bleri kũ ò tɛ́ n zɛ́n kũ nɛ̀sɛdoonↄ.

²⁴N yã kũ n a lɛ́ sɛ̀ n zↄ̀bleri ma de Daudanɛɛ pàpa. N ò kũ lɛ́omɛ yã, gbãra sà n pàpa.

²⁵Tera sà Dikiri Isarailanↄ Luda, n lɛ́ sɛ̀ n zↄ̀bleri ma de Daudanɛ n pì, tó a burinↄ ń zĩda kũna dↄ̃ akũsↄ̃ ò tɛ́ n zɛ́n lákũ à tɛ́i nà, onigↄ̃ kú Isaraila kpatan gↄrↄ sĩnda pínki.

²⁶Isarailanↄ Luda, ǹ tó yã kũ n ò n zↄ̀bleri ma de Daudanɛ kɛ yãpura ũ sà.

²⁷Ama Luda, ĩnigↄ̃ kú zĩtɛ la yãpuran yá? Musu kũ a leikɛo ni fↄ̃ à n síro, bele kpɛ́ kũ ma bònnɛ díkĩna sàa?

²⁸Dikiri ma Luda, ǹ laakari dↄ makũ n zↄ̀bleriia, ǹ ma aduakɛna kũ ma kutɛkɛnao sí. Ǹ sã kpá ↄ́ kũ makũ n zↄ̀bleri matɛn dↄnyĩi kũ adua kũ matɛn kɛmmao gbãra.

²⁹Ǹ tó n wɛ́ gↄ̃ pɛna kpɛ́ díkĩnaa gwãani kũ fãnantɛ̃o, gu kũ n pì n tↄ́ nigↄ̃ kúa díkĩna pìi. Ǹ adua kũ makũ n zↄ̀bleri madì kɛ arɛdↄna gu día ma.

³⁰Tó makũ n zↄ̀bleri ke n gbɛ̃ Isarailanↄ arɛ dↄ̀ gu día, tó ó wɛ́ kɛ̀mma, ǹgↄ̃ ó wɛ́kɛna sí zaa n kúkia musu ǹ sùru kɛ kũoo.

³¹Tó gbɛ̃ taari kɛ̀ a gbɛ̃dakenɛ, akũ ò pìnɛ à yã sí kũ n tↄ́o, tó à sù à yã sì kũ n tↄ́o n gbagbaki dí arɛ,

³²ǹgↄ̃ zɛ kũńwo zaa n kúkia musu ǹ mↄńnɛ. Ǹgↄ̃ yã gↄ̃gↄ̃ n zↄ̀blerinↄnɛ ǹ yã da taaridela, de a yãkɛna wí a musu ǹ yã nna kpá taarisaridea, de ò le ò dↄ̃ kũ à yãke vĩro.