1Kaqatzꞌibꞌaj pan wa carta che alaq chwi ri Jun xex chi kꞌo lo wi echiriꞌ kꞌamajaꞌ ne kaꞌan ruwachulew, puwi saꞌ taq ri xubꞌiꞌij yey puwi ri qilom rukꞌ ri qawach. Ma paqatzij wi xqil uwach y xqachap ne rukꞌ ri qaqꞌabꞌ. Kojtzꞌibꞌan kꞌu riꞌ puwi ri Jun paqatzij wi e ri Tzij, ri kuya kꞌaslemal.
2Wa Jun kuya kꞌaslemal xkꞌun che ruwachulew yey riꞌoj xqil uwach. E uwariꞌche kaqabꞌiꞌij saꞌ ri qilom y kaqaqꞌalajisaj kꞌu che alaq puwi wa Jun na jinta utaqexik rukꞌaslemal. Rire xex chi kꞌo lo wi rukꞌ ri Qaqaw Dios yey xuqꞌalajisaj kꞌu ribꞌ chiqawach riꞌoj.
3Janipa kꞌu ri qilom y ri qatom, e kaqaqꞌalajisaj pan che alaq; ma e kaqaj kuꞌan alaq xa jun qukꞌ riꞌoj jelaꞌ pachaꞌ riꞌoj paqatzij wi xa jun qaꞌanom rukꞌ ri Qaqaw Dios y rukꞌ Rukꞌajol, waꞌ e ri Qanimajawal Jesucristo.
4Kaqatzꞌibꞌaj pan wa carta che alaq chaꞌ junam kakiꞌkot alaq qukꞌ.
5Ekꞌu wa tzij qatom che ri Qanimajawal Jesucristo e kaqaqꞌalajisaj che alaq: Ri Dios e Qꞌijsaq yey rukꞌ Rire na jinta kꞌana qꞌequꞌmalil.
6We kaqabꞌiꞌij xa jun qaꞌanom rukꞌ ri Dios yey kojbꞌin chupa ri qꞌequꞌmalil, riꞌ kojelik xa oj aj raqꞌul y na kojbꞌin ta kꞌu chupa ri Qꞌijsaq.
7Noꞌj we kojbꞌin chupa ri Qꞌijsaq jelaꞌ pachaꞌ ri Dios kꞌo pa ri Qꞌijsaq, riꞌ xa jun qaꞌanom chiqawach. Yey ronoje ri qamak kachꞌajtaj kꞌu riꞌ ruma rukikꞌel ri Qanimajawal Jesucristo, Rukꞌajol ri Dios.
8Pero we kaqabꞌiꞌij na jinta qamak, riꞌ xa e kaqasok qibꞌ chiqibꞌil qibꞌ y na qatzij ta ri kaqabꞌiꞌij.
9Noꞌj we kaqaqꞌalajisaj ri qamak chwach ri Dios, Rire kukuy qamak y kojuchꞌaj che ronoje ri na utz taj kꞌo pa qanimaꞌ, ma Rire lik jusukꞌ y ujikibꞌam uwach kuꞌan waꞌ yey Rire na kuꞌan ta raqꞌubꞌal.
10We kaqabꞌiꞌij na oj ta makuninaq, riꞌ e pachaꞌ kaqaꞌan aj raqꞌul che ri Dios, ma kaqabꞌiꞌij na qatzij ta ri ubꞌiꞌim kan Rire.
