Yaya I 1

1

2

3

4

5

¹Kisi masenyi, naxan nu na kabi a fɔlɛ, muxu tuli naxan mɛxi, muxu ya naxan toxi, muxu bɛlɛxɛ naxan masuxuxi, muxu bara na seede ba.

²Naxan na kisi ra, na bara a yɛtɛ masen. Muxu bara a to, muxu bara na kisi xa fe kawandi ti, naxan mu ɲɔnma abadan, naxan nu na Baba Ala fɛ ma, beenun a xa a yɛtɛ masen muxu bɛ.

³Muxu naxan toxi, muxu naxan mɛxi, muxu wo fan kawandife na nan na, alako won birin xa lu lanyi kui, won nun Baba Ala nun a xa Di Isa, a xa Mixi Sugandixi.

⁴Muxu yi fe sɛbɛfe nɛ wo ma, alako muxu xa sɛɛwɛ xa kamali.

⁵Muxu naxan mɛxi Isa ra, muxu xa na dɛntɛgɛ sa wo bɛ. Ala findixi naiyalanyi nan na. Dimi yo mu na a i.

⁶Xa won a fala won nun Ala na a ra, kɔnɔ won ɲɛrɛma dimi kui, won bara wule fala, won mu ɲɛrɛfe nɔndi kira xɔn ma.

⁷Kɔnɔ, xa won ɲɛrɛma naiyalanyi kui Ala xa kira xɔn, won nun danxaniyatɔɛe nan luma lanyi kui. Ala xa Di Isa wuli nan won nasɛniyɛnma yunubi birin ma.

⁸Xa won a fala yunubi yo mu na won ma, won bara won yɛtɛ madaxu, nɔndi yo mu na won bɛ.

⁹Xa won na won ti won ma yunubie ra, Ala e xafarima nɛ, a won nasɛniyɛn won ma tinxintareya ma. Ala tinxin, won nɔma won xaxili tide a ra.

¹⁰Xa won a fala yunubi yo mu na won ma, won bara Ala findi wule falɛ ra, a xa masenyi mu na won bɔɲɛ kui.