1Tee piamo dokopa lete katasingi Pii doko katea-pyaa. Naimame baanya pii leamo doko sowapi, baa lengeme kandawapi, kandatala kingimi watandawapi piamo.
2Lete katenge doko paneamopa kandeama. Indupa naimame lete katawaka katenge dokonya lao kiningi nyakama langilyamano. Lete katenge doko Takangepa awapa katao naima-kisa panea.
3Naima pyasetae mona setao katamana lao naimame siamapi kandemapi dupa lao panao nyakama apata langilyamano. Naima pyasetala Takangepa baanya Ikiningi Jisasa Kataisa-pipa pakatae kalyamano.
4Naima mona etete yaepokondape piamana lao pii datupa pepa pilyamano.
5Gote baa tii pipae baa-kisa iminjetae etete kukipi mende napalengena lao baame leamopa siama dupa nyakama langilyamano.
6Naima Gote-pipa pyasetae mona setao kalyamano latala dee iminjetae ongonya payatamano kandao doko, naimame sambo pii latala kiningi pii lapae silyamoli pyoo napitamanosa pita.
7Baa tii pipae dokonya kalyamoli pyoo naima tii pipae ongonya payatamano kandao doko, naima baa-pipa pyasetae katatama. Baanya Ikiningi Jisasanya taiyoko dokome naimanya koo pingi dupa pitaka kunanya nepekenge.
8Naima koo mende napingina latamano kandao doko, naima tangeme tange sambo lamaitamanopa Gotenya kiningi pii doko naima-kisa napalita.
9Naimame naimanya koo pingi dupa lao panatamano kandao doko, opale mende pitoo latala kini pingi Gote epe tolatae dokome naimanya koo pingi yanu dupa kayapala pitaka kunanya nepakata.
10Naimame koo mende napiamana latamano kandao doko, naimame Gote sambo lenge injisetamanosaka pita. Dokopa baanya pii doko naima-kisa napalita.
