1 HANUA PAVAPAVADIA 20:7-43

⁷Bena Israel pavapavana ese ena tano tau-badadia iboudiai e boiridia, eto, Mani a roharoha, ina tau ese e hahekwarahidamu toana a itaia; badina be e hesiai, egu ai adavagu bona natugu bona egu silver bona egu gold e gwaurai, bona asina rudia ienai.

⁸Bena tano tau-badadia bona taunimanima iboudiai ese e hamaoroa, eto, Basio laloa, bona basio gwau maoro.

⁹Taunabunai, ia ese Ben-hadad ena gwaukau taudia e hamaorodia, eto, Egu pavapava bona egu lohia ba hamaoroa, baoto “Emu hesiai tauna enai o gwaurai guna ḡaudia iboudiai na baina kara, a ina na basina karaia diba”. Gwaukau taudia na e raka oho, una hereva na e hamaorolaia.

¹⁰Bena Ben-hadad ese hereva na ienai e siaia, eto, Egu dirava ese davana bae henigu, ma bae habadaia danu, bema murigu ai e rakamu taudia ese Samaria ḡahuna ima ta ta bae abi davana diba negana ai.

¹¹Israel pavapavana ma e haere, eto, A hamaoroa; heagi herevadia na ena tuari dabuadia e hahedokilaimu tauna ese basine gwaurai, a e dokidia ohomu tauna ese hari.

¹²Ben-hadad na pavapava haida ida kalaga ai e inuinuva ai na una gwaukau herevana na ienai e kau. Bena ia ese ena orea taudia e hamaorodia, eto, Emui tuari gabudia ai ba gini. Bena edia tuari gabudia ai eha gini, hanua ituari-henina totona.

¹³Bena peroveta tauna ta ese Ahaba, Israel pavapavana, e raka henia kahi, eto, Iehova na ini e gwau tomamu: Ina hegogo badana vada o itaia a? A kamonai, hari dina ai lau ese oi imamu ai baina atoa; bena ba diba lau na Iehova.

¹⁴Ahaba eto, Daidia edia amo? Ia eto, Iehova na ini e gwau tomamu: Kaha ta ta lohiadia edia hesiai taudia edia amo. Ahaba ma eto, Daika ese tuari baine matamaia? Ia na e haere, eto, Oi.

¹⁵Bena Ahaba ese kaha ta ta lohiadia edia hesiai taudia e haboudia, idia na sinahu-rua toi-ahui rua; una murinai ia ese Israel taudia iboudiai e haboudia, idia na daha hitu.

¹⁶Dina tubua ai, idia na e raka lasi. Una negana ai Ben-hadad na kalaga ai vada e inuinu kekero, ia bona iduruna taudia pavapava toi-ahui rua danu.

¹⁷Kaha ta ta lohiadia edia hesiai taudia na e raka lasi guna. Bena Ben-hadad ese kito taudia e siaidia lao; bena idia na hari e piu henia, eto, Taunimanima na Samaria amo e didi lasimu.

¹⁸Ia eto, Bema maino ai e maimu, bavabidia mauri, eiava bema tuari totona e maimu danu bavabidia mauri.

¹⁹Taunabunai, kaha ta ta lohiadia edia hesiai taudia na e raka lasi guna; bena tuari oreana idoinai na idia muridiai e raka.

²⁰Bena ta ta ana daḡae ana daḡae e aladia mase. Bena Suria taudia na e heau, bona Israel taudia ese e hahavadia. A Ben-hadad, Suria pavapavana, na hosi ai e heau, hosi-gui taudia ida.

²¹Bena Israel pavapavana na e raka lasi, hosi bona kariota e abidia. Ia ese Suria taudia e aladia mase; ala-ala na bada herea.

²²Bena peroveta tauna ese Israel pavapavana e raka henia kahi, eto, Benaini, ba hahegoada, ba haeroa namonamo, dahaka ba karaia; badina be keru negana baine ore, Suria pavapavana ese ma baine tuari henimu lou.

²³Bena Suria pavapavana ena hesiai taudia ese e hamaoroa, eto, Edia dirava na ororo diravadia, una dainai idia ese e hadarereda; a taora ai baitama tuari henidia ita ese baita hadareredia.

²⁴Ini ba kara toma: pavapava bavabidia oho, ta ta ena orea ena orea amo, bona tuari biagudia na idia gabudia ai bavatodia;

²⁵bena tuari oreana ta ma ba haboua, vada o haboioa ḡauna heḡereḡerena, hosi ta hosi ta gabuna ai, kariota ta kariota ta gabuna ai; bena taora ai baita tuari henidia, bona baita hadareredia. Bena ia ese edia hereva e kamonai, bona unu e kara toma.

²⁶Keru negana e ore ai, Ben-hadad ese Suria taudia e haboudia, bena Afek ela, Israel bae tuari henidia totona.

²⁷Israel taudia na e haboudia, lakwa e henidia, bena Suria taudia ituari-henidia ela. Israel taudia na idia vairadiai e taruha, nani seri maraḡidia rua na heheto, a Suria taudia ese tano e hahonuava.

²⁸Bena Dirava ena tau ta e raka kahira, Israel pavapavana e hereva henia, eto, Iehova na ini e gwau tomamu: Suria taudia eto “Iehova na ororo diravana, a dia koura diravana”, una dainai lau ese ina orea bada-hereana idoinai na imamu ai baina atoa; bena ba diba lau na Iehova.

²⁹Bena edia taruha ai e hetalai heheni dina hitu lalodiai; dina ihahituna ai e tuari matama. Bena Israel taudia ese Suria taudia na e rahudia mamase, una dina tamona ai tuari ae-raka taudia na domaga ta e aladia mase.

³⁰Oredia na Afek hanuana lalonai e heau vareai, bena hanua maḡuna ese idia gerebu-rua daha-hitu e kohudia tao. Ben-hadad danu e heau, bena hanua rumana ta lalonai laloma daiutuna ai e vareai.

³¹Bena ena hesiai taudia ese e hamaoroa, eto, A kamonai; ai na vada a kamonai, Israel pavapavadia na mai edia hebogahisi; ai mani puse dabuadia baia riodia, bona kwaramai ai kwanau baia ato; bena baia raka lasi, Israel pavapavana dekena baiala, reana emu mauri baine rauaia.

³²Taunabunai, idia ese puse dabuadia e riodia, bona kwaradia ai kwanau e ato; bena Israel pavapavana dekena ela, eto, Emu hesiai tauna Ben-hadad na e tomu “Mani emu kara ba rauagu”. Ia eto, Ia na dounu e maurimu a? Ia na tadigu.

³³Unu tatau ese toana e nariava ela bona e itaia davari, bena nega tamona eto, Oibe, tadimu Ben-hadad. Bena ia eto, Vada aola, a hakaua mai. Bena Ben-hadad na e raka lasi ia dekenai; bena ia ese ena kariota ai e hadaea kau.

³⁴Bena Ben-hadad ese e hamaoroa, eto, Tamagu ese tamamu ena amo e abi oho hanuadia na lau ese ma baina henimu lou, bona emu hoihoi gabudia danu ba kara Damasko ai, tamagu ese Samaria ai e kara heḡereḡerena. Bena Ahaba eto, Unu bema heto, baina kahumu nege. Bena raruosi e hegwau hamata heheni; bena ia ese e kahua nege.

³⁵Iehova ena haheḡani dainai, peroveta oreana tauna ta ese ia bamona ta e hamaoroa, eto, Mani emu kara a botagu. A tauna na ibotana se ura.

³⁶Bena ia ese ma e hamaoroa, eto, Iehova gadona to kamonaia dainai, ba rakatanigu murinai maoromaoro leona ta ese baine alamu mase. E rakatania, bena maoromaoro leona ta ida e hedavari, bena leona ese e alaia mase.

³⁷Bena ma tau ta e davaria, e hamaoroa, eto, Mani emu kara a botagu. Hari tau ese e botaia; e rahua bona e haberoa.

³⁸Taunabunai, hari peroveta tauna na ela, dala isena ai hanua pavapavana e nariava, matana na bero ikumilaina dabuana ai e kumia, oromana e ha-idaua.

³⁹Bena hanua pavapavana e raka hanai negana ai, ia ese hanua pavapavana e boi henia, eto, Emu hesiai tauna na tuari bogaragina nala; bena tuari tauna ta e lou, tau ta dekegu e mailaia, eto “Ina tau ba dogoa tao; bema baine boio, ena mauri idavalaina na oiemu mauri, eiava silver talent ta ba heni”.

⁴⁰A emu hesiai tauna na unu ini ihekwarahilaidia ai, tauna na vada e heau. Israel pavapavana ese e haere henia, eto, Ihahemaoro-henimu na unu baine heto, sibomu ese o gwauraiamu heḡereḡerena.

⁴¹Bena hari matana ikoulaina dabuana na e kokia oho haraḡa; bena Israel pavapavana ese toana e itaia ia na peroveta oreana tauna ta.

⁴²Bena peroveta tauna ese e hamaoroa, eto, Iehova na ini e gwau tomamu: Lau na revaia mase tauna na oi ese imamu amo o kahua nege, una dainai iena mauri idavalaina na oiemu mauri, bona iena bese idavalaina na oiemu bese.

⁴³Bena Israel pavapavana na mai lalo-metauna bona mai baduna ida ena ruma e lou ela; bena Samaria ai e kau.