Ŋicwofuŋ I 20:7-43

⁷Eme Israe ŋicwofuŋ e mâreŋ rune soŋaŋ hefârec‐joparâ muwec, “Ŋoŋe ŋic keci e imac‐nâpoocte gie bakac i hone‐hâmoniŋ. E ŋonâŋfâc‐nane â naru motecfâc‐nane, erâ siliwa â golnanere dâŋ râeme wareme manacnepac.”

⁸Iŋuc mume soŋaŋ â ŋic ŋokac jaŋe ʒiŋuc âzâcnembiŋ: “Go hazec râerâ dâŋticne mi manac.”

⁹Iŋuc mupie Israe ŋicwofuŋzi Beŋhada kiŋaŋŋicfâc‐ticne ʒiŋuc jazawec: “Ŋoŋe ŋicwofuŋ‐nane dâŋ ʒiŋuc âzâcnenʒepieŋ: ‘Kiŋaŋ qaqage no wiac bâbâni mumec i epemu â irec faicnao wiac gâcnere mukic i sâcne mi epemu.’” Iŋuc jazame kiŋaŋŋic jaŋe mocwâc risierâ bomboŋ‐jeŋic binaŋ bacnembiŋ.

¹⁰Eme Beŋhadazi Israe ŋicwofuŋ dâŋ râecnehuc muwec, “Samaria mâreŋko rufe fokac i ŋicfâc‐nane sasawa jaŋe metape fufusuc roniŋte sâc eocmuo ine nemu jaŋe okacne bafehuc bazu‐narenʒepieŋ.”

¹¹Iŋuc mume Israe ŋicwofuŋzi dâŋ bâtikiecnehuc muwec, “Dâŋ ʒiŋuc fokac i manasucneniŋ: ‘Ŋic puriŋne moc e jahacnere maname ŋic sahac fâsâchec sâc mocjaha ekoperec mi ezejec.’”

¹²Ehame Beŋhada e ŋicwofuŋ jaŋehec bozeo opâ sanaŋ nâhuc ŋeku dâŋ i manarâ ŋicfâc‐ticne jazarâ muwec, “Ajoc, dodoma‐ŋeŋic sâcke‐fâreniŋ.” Iŋuc mume jaŋe hae i râsi rocnehuc dodoma‐jeŋic sâcke‐fârembiŋ.

¹³Ehame porofete moczi Israe ŋicwofuŋ Ahabare maŋfuŋko fisirâ muwec, “Wofuŋ e ʒiŋuc mukac: Ŋic guru dindiŋ ʒi honec‐jopakomec me? Manakic, no miŋecgac gore meo râec‐jopa‐fârepemu; eme noni sawa Wofuŋ jukopac i go mana tarazemec.”

¹⁴Iŋuc mume Ahabazi muwec, “Weni jaŋehec iŋuc ecmu?” Mume muwec, “Wofuŋ e ʒiŋuc mukac: Qâhâc sâc irec mâreŋ soŋaŋ jaŋere kiŋaŋ qaqafâc jaŋehec gie i bapemu.” Iŋuc mume Ahabazi muwec, “Eme mozi ʒika fuŋkeocmu?” Wiome dâŋ bâtikiecnehuc muwec, “Goki.”

¹⁵Iŋuc mume Ahabazi qâhâc sâc irec mâreŋ soŋaŋ jaŋere kiŋaŋ qaqafâc biric‐jopame ʒare‐jeŋic 232 ewec. Ehame jaŋere râpeo ine Israe ŋic sasawa biric‐jopame ʒare‐jeŋic 7 tauseŋ ewec.

¹⁶Eme guŋpiticko Beŋhada â ʒikare bafickembiŋ, ŋicwofuŋ 32 i jaŋe mâmâc bozeo opâ sanaŋ nâku maŋjeŋic bibiriwame ŋehapie Israe ŋic jaŋe haeonec wahambiŋ.

¹⁷Qâhâc sâc irec mâreŋ soŋaŋ jaŋere kiŋaŋ qaqafâc jaŋe bâniembiŋ. Eme Beŋhadazi ruc bapa ŋic sorec‐jopawec jaŋe risierâ ʒiŋuc âzâcnembiŋ: “Ŋic jaŋe haeonec wahaŋgopieŋ.”

¹⁸Iŋuc âzâcnepie muwec, “Jaŋe wamao wareŋgopieŋko ɋâricne rocjopaniŋ, me ʒikare wareŋgopieŋko ɋâricne jaha rocjopaniŋ.”

¹⁹Ŋic ʒiŋuczi haeonec waharâ rambiŋ: Qâhâc sâc irec mâreŋ soŋaŋ jaŋere kiŋaŋ qaqafâc â momori guru moc jaŋe bâjâpec‐jopambiŋ.

²⁰Ehuc ŋic jaŋe ru sâc râsifâc‐jeŋic jopambiŋ. Eme Siria ŋic jaŋe wisepie Israe ŋic jaŋe jâpec‐jopa rambiŋ, â Siria ŋicwofuŋ Beŋhada e ine becâsic ŋic jaŋehec becâsic mocko ferâ wisewec.

²¹Wiseme Israe ŋicwofuŋ e rarâ becâsic â keretacfâc‐jeŋic rocjoparâ Siria ŋic jopahuc ima samaki bacjopawec.

²²Iŋuc eme porofetezi Israe ŋicwofuŋte maŋfuŋko rarâ ʒiŋuc âzâcnewec: “Go rarâ wiac weniŋuc ecmu i manasu biric ehuc hâbige rozemec. Siria ŋicwofuŋ e ʒoaŋ dameŋ fuŋkehame râsi fisi‐gareocmu hâcne.”

²³Eme Siria ŋicwofuŋ e kiŋaŋ qaqafâcne jaŋe ʒiŋuc muhuc âzâcnembiŋ: “Jaŋere nemufâc jaŋe tikire nemu, irec jaŋe boc siric‐nâpombieŋ. Nâŋâc wâneŋko jaŋehec qaqac enʒepeneŋ, ira ine jâmbomac siric‐jopanaŋmu.

²⁴Nâŋâc ʒiŋuc enʒepeneŋ: Ŋicwofuŋ jaŋe dodoma‐jeŋickonec bârâriec‐jopahuc jaŋere âkehoc momori jaŋe micne râec‐jopanʒepeneŋ.

²⁵Erâ momori mârâc sipirickembiŋ irec sâc biric‐jopanʒepeneŋ; erâ becâsic keretac mârâc bajumbeŋ irec sâc jaha baʒawiec‐jopanʒepeneŋ, ehuc jaŋehec wâneŋko qaqac enʒepeneŋ. Nâŋâc jâmbomac sanaŋkenaŋmu.” Eme dâŋjeŋic manarâ irec sâc ewec.

²⁶Eme ʒoaŋ dameŋ fuŋkehame Beŋhada e Siria ŋic biric‐joparâ bânie‐jareme Israe ŋic jaŋehec qaqac eniŋte Afeke haeo fembiŋ.

²⁷Eme Israe ŋic jaŋe wâc iŋuc jaha birickehuc nânâ opâ bâmockerâ jaŋeraopec rambiŋ. Erâ Israe ŋic jaŋe noniŋ guru jajahec mac iŋucnezi teuŋ âtembiŋ, â Siria ŋic jaŋe ine mâreŋ i sâcke‐fârembiŋ.

²⁸Ehame Anuture ŋic moczi Israe ŋicwofuŋtao fisirâ ʒiŋuc âzâcnewec: “Wofuŋ e ʒiŋuc mukac: ‘Siria ŋic jaŋe, “Wofuŋ e tikire nemu, e wâneŋte nemu aricne,” iŋuc mumbiŋte no guru dindiŋ ʒi megao râec‐jopa‐fârepemu. Iŋuc epe, noni sawa Wofuŋ jukopac i mana tarazemec.’”

²⁹Eme jaŋe ŋifec â ŋifec teuŋ âterâ fohapie ʒoaŋ gie bapa 7 tarawec. Ehame ʒoaŋ gie bapa namba 7 ira ʒika bâtâcnehuc Israe ŋic jaŋe Siria momori kikezi rara 100 tauseŋ ʒoaŋ mocjahao jopambiŋ.

³⁰Jopapie gâcne jumbiŋ jaŋe wiserâ Afeke haeo raʒimbiŋ. Ehame haesaczi rândiŋkerâ waha ŋic 27 tauseŋ jumbiŋ jaŋe imac‐jopawec. Beŋhada e wâc iŋuc jaha wiserâ haeoa raʒirâ ficmaŋ ʒâʒâŋiŋko soŋkewec.

³¹Ehame kiŋaŋ qaqafâcne jaŋe âzâcnerâ mumbiŋ: “Manakic, Israe kikefuŋ jaŋere ŋicwofuŋfâc jaŋe ŋicwofuŋ buuruc‐jeŋichec, iŋuc manaeŋgopeneŋ. Irec nâŋâc mateŋ qonaŋkerâ qizec‐nâŋecko repa qâfisehuc Israe ŋicwofuŋtao ranaŋ, e akic‐nâpoocmu mecne.”

³²Iŋuc murâ mateŋ qonaŋkerâ qizec‐jeŋicko repa qâfisembiŋ, ehuc Israe ŋicwofuŋtao rarâ ʒiŋuc mumbiŋ: “Kiŋaŋ qaqage Beŋhada e akickecmurâ mukac.” Iŋuc mupie Ahabazi muwec, “Hâc, jukac jaha me? E qomâ‐nane i.”

³³Eme ŋic jaŋe dâŋ i me i moc fuame mananʒepeneŋ muhuc hazec rârâe domambiŋte dâŋ i manarâ izia okacne bâtikiecnehuc mumbiŋ: “O jâmbomac Beŋhada e qomâge.” Iŋuc mupie muwec, “Ra jowa wareniŋ.” Eme Beŋhadazi erao fisime ecneme keretacko fewec.

³⁴Ferâ Ahaba dâŋ ʒiŋuc âzâcnewec: “Mamac‐nanezi mamacge hae jâoc rowec i mocwâc bârisiepemu. Eme go mamac‐nanezi Samaria haeo ewec irec sâc ehuc nareŋ gareŋ eere toma fuaocte Damasko hae turuŋne rorâ basanaŋkezemec.” E iŋuc mume Ahabazi muwec, “No dâŋ mukomec irec erâ behecgupe racmu.” Iŋuc murâ ehec ʒâʒâfic moc erâ beheme rawec.

³⁵Ehame porofete jaŋere motecfâc jaŋeraonec ŋic moc Wofuŋzi esoc qafeŋ ecneme âgo‐ticne ʒiŋuc âzâcnewec: “Nuc.” Iŋuc mume ŋic e qatarawec.

³⁶Iŋuc eme ʒiŋuc âzâcnewec: “Go Wofuŋte dâŋ mi reŋkemecte no behecnurâ rahaŋtec izia laioŋzi kihâmocguocmu.” Eme ŋic e rahame izia laioŋzi bâfuarâ kihâmowec.

³⁷Ehame porofete e ŋic moc bâfuarâ muwec, “Nuc.” Iŋuc mume ŋic e ʒâpâ qa ima ecnewec.

³⁸Eme porofete e ʒâŋe maine foŋkeme hawari‐ticne hetikieme ra hatao ŋicwofuŋ woŋeckewec.

³⁹Ehame ŋicwofuŋzi fotâcneme wiracnehuc muwec, “Kiŋaŋ qaqage no ʒikamaŋko jâmbâŋ raʒipac. Ehame momori moczi ŋic moc norao jowa fisirâ ʒiŋuc mujec: ‘Ŋic ʒi soŋaŋkezemec, e sifuckeocmuo ine goki ere âkehoc hâmocmu, me arictac eme ine siliwa moneŋ ŋemâc‐ticne wâŋ râecmu.’

⁴⁰Eme kiŋaŋ qaqage no koŋkoŋkehuc rarac wawarec ehape wisejec.” Iŋuc mume Israe ŋicwofuŋzi ʒiŋuc âzâcnewec: “Go gahac biac mutarakicte dâŋge iŋuc hâcne mutarazo.”

⁴¹Iŋuc muhame porofete e ʒâŋe mai‐ticnao foŋ fowec i bâruŋ jaha firuewec. Iŋuc eme Israe ŋicwofuŋ e biac ʒiŋuc ʒâŋitawec: E porofete moc.

⁴²Ʒâŋitame ʒiŋuc âzâcnewec: “Wofuŋ e ʒiŋuc mukac: ‘Noni ŋic hâmocte biŋe bâwosâepo i megaonec behetec rajec, irec ere okacne goki hâmocmu â ŋicfâcne jaŋere okâcne gore ŋicfâc jaŋe hâmoniŋmu.’”

⁴³Iŋuc âzâcneme Israe ŋicwofuŋ e aarickeme dâŋemâc raku Samaria hae‐ticnao fisiwec.