1 Hadì 6:3-20

³Is keluag te varkun din, 15 he ǥiek, is keluǥayad 30 he ǥiek; iring keluǥayad duen te valey.

⁴Mibpeveelan daan ni Solomon haazà is baley te Nengazen te menge sulawà he meluag diyà te seled ne meliǥet diyà te gawas.

⁵Mibpeveelan din daan te menge ruǥu is diyà te pesikilizà wey ziyà te egkeiniyuǥan duen te valey. Heini he menge ruǥu, tetelu he endanas, ne impikit diyà te elavat duen te valey.

⁶Is keluǥayad te nehuna he endana pitu wey tengà he ǥiek, ne is ikezuwa he endana siyam he ǥiek, ne is iketelu he endana sepulù wey tengà he ǥiek. Mibpegpeǥendak diyà te gawas he vahin te elavat te valey te Nengazen para ikepelastar is menge ruǥu he kenè en egkewaleng is elavat emun idtaud is gumuǥuyud.

⁷Hein mibangun haazà is baley te Nengazen, is menge vatu he migamit dutun, daan en he mibpenepsapan diyà te migkuwaan duen, umbe wazè en egkezineg he zaǥing te mertilyu, tiǥib, etawa minsan hengkey he ǥelemiten he putew.

⁸Is gemawan te nehuna he endana ne ziyà te zivavà he vahin duen te valey. Ne zuen menge heǥezan pehendiyà te ikezuwa wey iketelu he endana.

⁹Ne hein neelevatan en haazà is baley te Nengazen, mibpeteuzan ni Solomon te kisami he kayu he sidru is menge himan din.

¹⁰Is menge ruǥu ziyà te pesikilizà wey egkeiniyuǥan duen te valey he pitu wey tengà he ǥiek is ketikang din, impikit haazà he menge ruǥu zutun te valey pinaaǥi te kegemita te kayu he sidru.

¹¹Migkaǥi is Nengazen diyà te ki Solomon te,

¹²“Emun edtumanen nu is menge penurù ku wey menge suǥù ku, ne edtumanen ku zaan pinaaǥi kenikew is impenaad ku ziyà te amey nu he si David. Is menge etew ku he Israilihanen, ed-ubpà a zuma kandan kayi te valey ku he mibangun nu ne kenè ku sikandan ed-iniyuǥan.”

¹⁴Nepasad is kebangun duen te valey te Nengazen.

¹⁵Is elavat he zapit diyà te seled duen te valey te Nengazen mid-epizan te tabla he kayu he sidru puun te saag pehendiyà te kisami, ne is saag din, tabla he kayu he sipris.

¹⁶Mibpevaal sikandin te zezuwa he ruǥu ziyà te seled dutun te valey te Nengazen pinaaǥi te kedtaud te dibisyun puun te saag pehendiyà te kisami. Is tabla he indibisyun, kayu he sidru. Haazà he ruǥu ziyà mekepelastar te zivaluy he vahin duen te valey te Nengazen, ne migngezanan heini te Utew Segradu he Lugar, ne is ketikang kayi, 30 he ǥiek.

¹⁷Is keleyatan te ruǥu he ziyà te ǥawas duen te Utew Segradu he Lugar ne 60 he ǥiek.

¹⁸Mid-epizan pudu te tabla he sidru is ketivuukan te elavat diyà te seled dutun te valey, umbe kenà egkaahà diyà te seled is batu he elavat din. Dutun te elavat in-ukir zuen is menge vulak wey edlangkat he menge pinemula.

¹⁹Mid-andam ni Solomon is Utew Segradu he Lugar he iyan edsevukan duen te Kavan te Kebpekid-uyun te Nengazen.

²⁰Heini he ruǥu neked-iring is sukud te ketikang din, keluaǥan din, wey keleyatan din, pudu 30 he ǥiek. Is menge elavat wey kisami kayi ne pudu mid-epizi te vulawan, ne vulawan daan is in-apid te tabla he kayu he sidru he mibeelan he pemuhatà.