1 Hadì 6:15-36

¹⁵Is elavat he zapit diyà te seled duen te valey te Nengazen mid-epizan te tabla he kayu he sidru puun te saag pehendiyà te kisami, ne is saag din, tabla he kayu he sipris.

¹⁶Mibpevaal sikandin te zezuwa he ruǥu ziyà te seled dutun te valey te Nengazen pinaaǥi te kedtaud te dibisyun puun te saag pehendiyà te kisami. Is tabla he indibisyun, kayu he sidru. Haazà he ruǥu ziyà mekepelastar te zivaluy he vahin duen te valey te Nengazen, ne migngezanan heini te Utew Segradu he Lugar, ne is ketikang kayi, 30 he ǥiek.

¹⁷Is keleyatan te ruǥu he ziyà te ǥawas duen te Utew Segradu he Lugar ne 60 he ǥiek.

¹⁸Mid-epizan pudu te tabla he sidru is ketivuukan te elavat diyà te seled dutun te valey, umbe kenà egkaahà diyà te seled is batu he elavat din. Dutun te elavat in-ukir zuen is menge vulak wey edlangkat he menge pinemula.

¹⁹Mid-andam ni Solomon is Utew Segradu he Lugar he iyan edsevukan duen te Kavan te Kebpekid-uyun te Nengazen.

²⁰Heini he ruǥu neked-iring is sukud te ketikang din, keluaǥan din, wey keleyatan din, pudu 30 he ǥiek. Is menge elavat wey kisami kayi ne pudu mid-epizi te vulawan, ne vulawan daan is in-apid te tabla he kayu he sidru he mibeelan he pemuhatà.

²¹Is duma he vahin diyà te seled duen te valey te Nengazen, impeepizan ni Solomon te lunsey he vulawan. Mibpevaal sikandin te rantey he vulawan ne impeketer zin haazà diyà te idselang pehendiyà te Utew Segradu he Lugar.

²²Ne pudu neepizi te vulawan is diyà te seled dutun te valey ragkes en sikan is pemuhatà he ziyà te seled duen te Utew Segradu he Lugar.

²³Impesavuk ni Solomon diyà te seled duen te Utew Segradu he Lugar is dezuwa he ledawan te kirubin he menge kayu he ulibu, ne is kada sevaha zutun 15 he ǥiek is ketikang din.

²⁴Heini is dezuwa he ledawan te kirubin neked-iring is kezekelè dan wey kegkeveeli kandan. Is kada sevaha kandan, duen din dezuwa he pakpak, ne pitu wey tengà he ǥiek is kelayat te kada pakpak. Umbe is kelayat puun te purù pehendiyà te purù te sevaha he pakpak ne 15 he ǥiek.

²⁷Imped-avey haazà ni Solomon diyà te seled duen te Utew Segradu he Lugar he nevekar is menge pakpak dan. Ne nekedtemu is divaluy he pakpak dan diyà te liwezaan duen te ruǥu. Ne is divaluy pa he menge pakpak dan neketemu ziyà te elavat.

²⁸Ne mibpeepizan daan ni Solomon te vulawan heini is dezuwa he kirubin.

²⁹Is langun he elavat dutun te dezuwa he ruǥu zuen te valey te Nengazen mibpezeyzeyanan ni Solomon te menge kirubin, menge palma, wey menge vulak he nememekar en.

³⁰Minsan is saag dutun te zezuwa he ruǥu mibpeepizan din te vulawan.

³¹Is beyeey pehendiyà te Utew Segradu he Lugar, ne zezuwa is lekeb din he menge kayu he ulibu, ne zuen kayi menge marku he lelima is suyuk dan.

³²Heini he menge ǥemawan mibpezeyzeyanan ni Solomon te druwing he menge kirubin, menge palma, wey menge vulak he nememekar en. Ne mid-epizan te vulawan haazà is menge himan dutun te ǥemawan.

³³Is beyeey pehendiyà te seled duen te valey te Nengazen mibpeveelan ni Solomon te menge marku he heepat is suyuk dan he menge kayu he ulibu.

³⁴Ne zuen kayi zezuwa he lekeb he kayu he sipris he mibpurma, ne is kada sevaha kayi zezuwa he vahin he egkehimu he edlumpien.

³⁵Mibpezeyzeyanan daan heini ni Solomon te menge druwing he kirubin, menge palma, wey menge vulak he nememekar en, wey mibpeepizan din te vulawan.

³⁶Mibpevaal zaan sikandin te lama zuen te valey te Nengazen. Neliǥuy heini te elavat he vinesbasan he menge vatu he is kada tetelu he apid duen mid-epizan te kayu he sidru.