1 Kings 6:15-36

¹⁵Rungrung u langgin, e ren ni cedar e ni fanay ngay u but’ nge mada’ ko tenjio riy, ma faraf riy e ni fanay e ren ni pine ngay.

¹⁶Reb e senggil u lan e Tempel ni kanog e Gin Th’abi Thothup ngay e bay ko ba’ ni tabgul; 30 e fit radan, ma rungrung riy e ren ni cedar e ni fanay ngay ni tabab ko faraf u but’ nge yani thang ko tenjio ngalang.

¹⁷Re senggil ni bay u mit fa Gin Th’abi Thothup e ne i ragag fit n’umngin.

¹⁸Plang riy ni cedar e ka ni ker ya’an e p’aw ni gamanman ngay nge floras; ma langgin ni ga’ngin e ka ni gabdiy e ren ni cedar ngay, ya nge dab ni guy e malang ko rungrung.

¹⁹Fare senggil ni Th’abi Thothup ni bay ko ba’ ni tabgul, e aram e gin ni un tay fare Kahol ko M’ag rok SOMOL ngay.

²⁰Re senggil nem e guyey e fit n’umngin, ma guyey e fit radan, ma guyey e fit tolngin, ni ga’ngin u langgin ni ka ni gabdiy e gol ngay. Ma altar e ka ni gabdiy e ren ni cedar ngay.

²¹Ma lan e Tempel e ka ni gabdiy e gol ngay, ma yu yil’ i chen ni gol e kan tay u baraba’ i langan e mab nge yan nga baraba’ e mab ni yan ko bin Th’abi Thothup e senggil, ni ku er rogon ni ka ni gabdiy e gol u lan ni ga’ngin.

²²Lan e Tempel ni ga’ngin e ka ni gabdiy e gol ngay, ma ku er rogon fare altar ni bay u lan e Gin Th’abi Thothup.

²³Mi ni fek e ren ko olive nga ni ngongliy l’agruw i kerubim riy ni bay pon min tay nga langgin fa Gin Th’abi Thothup, nra reb ma ragag nge lal e fit tolngin.

²⁴L’agruw e gali n’em ni ta’reb ga’ngin nge ya’an. Ra reb ma l’agruw raba’ i pon, ra baraba’ i pon reb ma medlip nge baley e fit n’umngin, ere n’umngin pon reb u taban baraba’ i pon nge mada’ nga taban pon u baraba’ e ragag nge lal e fit.

²⁷Mi ni yan ntay ni l’agruw ngalan e Gin Th’abi Thothup ni bay reb nga baraba’ i to’oben reb, nike yib taban baraba’ i pon reb ke yib i math nga taban baraba’ i pon reb u lukngun fare senggil, ma porow u baraba’ e ke yan i math ko rungrung.

²⁸Gali kerubim nem nra reb ma l’agruw raba’ i pon ni bay e ka ni gabdiy e gol u wuru’ i dowrow ni ga’ngin.

²⁹Rungrung ko fa bin ni ba ga’ e senggil nge fa bin Th’abi Thothup e senggil e ka ni ker ya’an e kerubim ngay ni bay pon, nge ya’an e gek’iy ni palm, nge floras.

³⁰Mus ko faraf riy ni ka ni gabdiy e gol nga daken.

³¹Ba mab ni l’agruw raba’ ni yima duguy nni ngongliy ko ren ni olive e aram e mab ko Gin Th’abi Thothup. P’ebugul e re mab nem e ba m’uth.

³²Gali mab nem e ka ni ker ya’an e kerubim ni bay pon ngay, nge ya’an e gek’iy ni palm, nge floras. Gali mab nem nge kerubim ni bay pon, nge gek’iy ni palm ni ka ni ker ya’an ngay e ka ni gabdiy e gol ngay.

³³Langan e mab ko bin th’abi ga’ e senggil e ni ngongliy ko ren ni olive.

³⁴Ma l’agruw e mab riy ni peth nga ta’bang u lukngun e mab nni ngongliy ko ren ni pine,

³⁵mi ni ker ya’an bogi kerubim ngay ni bay pon, nge gek’iy ni palm, nge floras, ni ka ni gabdiy e gol nga daken ni ta’reb dib’agin.

³⁶Mi ni ngongliy bang u m’on ko Tempel ni nge mang lan e yoror riy, mi ni rungrunguy nra ba thael e ren ni cedar ma dalip thael e malang me yan ni aram rogon i yan.