ᤖᤥᤔᤡ 7:8-14

⁸ᤁᤖ ᤁᤴ ᤗᤠᤕᤥ᤺ᤸᤗᤧ ᤛᤠᤶᤕᤥᤀᤡᤱᤈᤠ᤺ᤱᤗᤠᤶ ᤛᤢᤕᤧᤶ ᤂᤥ᤺ᤛᤢᤀᤠᤱ ᤀᤡᤱᤃᤠ᤹ ᤀᤠᤛᤡᤃᤠᤱ ᤁᤠᤰ ᤐᤖᤡᤰᤗᤧᤴ ᤂᤡ᤺ᤶᤔᤠ ᤏᤡᤱᤘᤠ᤹ᤀᤡᤴ ᤑᤥ᤺ᤰᤂᤢ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤜᤥ᤺ᤵᤋᤧᤸᤗᤧᤃ ᤗᤠᤕᤥ᤺ᤸᤗᤧ ᤁᤢᤔᤢᤰᤛᤠᤶ ᤜᤥ᤺ᤵᤋᤧᤒᤠᤖᤥ॥

⁹ᤋᤃᤡ ᤀᤡᤱᤃᤠ᤹ ᤛᤠᤶᤕᤥᤌᤡᤶᤔᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤠᤱᤅᤡᤸᤗᤧ ᤏᤢ᤺ᤒᤠ ᤘᤕᤧ. ᤁᤖ ᤛᤠᤶᤕᤥᤀᤡᤱᤈᤠ᤺ᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤱᤅᤡᤸᤗᤧ ᤀᤡᤱᤃᤠ᤹ ᤀᤠᤜᤡᤱᤔᤴᤏᤥ ᤗᤠᤕᤥ᤺ᤴ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤀᤡᤱᤃᤠ᤹ ᤛᤩᤠᤱᤗᤥ॥

¹⁰ᤁᤴ ᤛᤠᤶᤕᤥᤀᤡᤱᤈᤠ᤺ᤱᤅᤡᤸᤗᤧᤀᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤋᤠ᤺ᤵᤔᤠ ᤁᤧᤒᤥ᤺ᤱᤒᤠ ᤘᤕᤧ ᤁᤖ ᤂᤧᤸᤗᤧᤃ ᤛᤡ᤺ᤔᤠᤏᤡ ᤋᤠᤖᤢ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤂᤥ᤺ᤛᤢᤱᤗᤥ॥

¹¹ᤌᤣᤀᤠᤱᤓᤧᤸᤗᤧ ᤗᤠᤕᤥ᤺ᤸᤗᤧ ᤛᤠᤶᤕᤥᤀᤡᤱᤈᤠ᤺ᤱᤗᤠᤶ ᤛᤢᤕᤧᤶ ᤂᤥ᤺ᤛᤢᤀᤠᤱ ᤀᤡᤱᤃᤠ᤹ ᤀᤡᤱᤗᤧᤰᤋᤠᤱᤗᤥ. ᤜᤧᤰᤁᤩᤠᤱ ᤒᤠ ᤁᤴ ᤛᤠᤶᤕᤥᤀᤡᤱᤈᤠ᤺ᤱᤗᤠᤶ ᤀᤡᤱᤃᤠ᤹ ᤛᤧᤖᤠᤱᤗᤥ॥

¹²ᤜᤧᤰᤁᤣᤛᤠᤱ ᤛᤠᤶᤕᤥᤌᤡᤶᤔᤡᤴ ᤛᤣᤛᤣᤒᤠ ᤆᤥ᤺ᤰᤐᤠᤸᤗᤧ ᤁᤢᤀᤡᤱᤈᤠ᤺ᤱᤜᤠ᤹ ᤛᤣᤛᤣᤒᤠ. ᤛᤠᤶᤕᤥᤏᤡᤒᤠ ᤏᤢ ᤏᤢ᤺ᤒᤠ ᤆᤥ᤺ᤰᤗᤥ॥

¹³ᤜᤧᤰᤁᤣ᤺ᤸᤗᤧ ᤏᤢ᤺ᤒᤠ ᤐᤠ᤺ᤴᤏᤡᤸᤗᤧ ᤀᤡᤱᤃᤠ᤹ ᤀᤠᤗᤠᤃᤡ ᤛᤡ᤺ᤔᤧᤴ ᤋᤠᤖᤢᤒᤡ᥅ ᤔᤧᤍᤠᤖᤢᤴᤗᤥ. ᤁᤖ ᤗᤠᤕᤥ᤺ᤴ ᤗᤠᤕᤥᤀᤣᤖᤥ ᤗ᤹ᤖᤡᤰ ᤁᤢᤛᤡᤱ ᤏᤡ᤺ᤵᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤗᤠᤕᤥ᤺ᤸᤗᤧ ᤏᤢ᤺ᤒᤠ ᤐᤠ᤺ᤴᤗᤠᤶ ᤀᤡᤱᤃᤠ᤹ᤀᤥ ᤕᤠᤶᤛᤠᤶᤃᤧᤴ ᤛᤡ᤺ᤔᤧᤴ ᤋᤠᤖᤢ. ᤜᤧᤰᤁᤣ᤺ᤸᤗᤧ ᤛᤠᤶᤕᤥᤀᤡᤱᤈᤠ᤺ᤱᤅᤡᤸᤗᤧ ᤆᤥᤃᤢᤸᤗᤧ ᤗᤠᤕᤥ᤺ᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤗᤠᤕᤥᤒᤠ ᤆᤥ᤺ᤰ ᤑᤠ᤹ᤀᤠᤱ ᤏᤡ᤺ᤛᤢᤱᤗᤥ॥

¹⁴ᤛᤠᤶᤕᤥᤌᤡᤶᤔᤡᤴ ᤕᤠᤶᤛᤠᤶᤒᤠ ᤆᤥ᤺ᤰ ᤗ᤹ᤖᤡᤰ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤔᤠᤱ ᤘᤠ᤹. ᤁᤖ ᤀᤡᤱᤃᤠ᤹ ᤕᤠᤶᤛᤠᤶᤒᤠ ᤔᤧᤈᤥ᤺ᤰᤁᤠᤴ ᤜᤧᤰᤁᤩᤠᤱ ᤕᤥ᤺ᤰᤐᤠᤜᤠ᤹ ᤔᤧᤍᤥ᤺ᤰᤐᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤠᤱ ᤗᤠᤕᤥᤀᤥᤀᤣ ᤋᤥ᤺ᤰᤋᤠᤱᤅᤠᤱ ᤘᤠ᤹ᤀᤠᤖᤥ॥