Rom 7:8-14

⁸Bong ye kene yo lok galanga ben ger tina ngan igunkalau ye dada dook tiap nga, ngan iyei au le matak gorengana ye dada dook tiap matana matana a lok be le ayei. Le kumata nga yo be ger siap nga, ngan matin nga le noonoo taukan gurana yo be iyei idi, a be nen ngan tayei so dook tiap tina nga.

⁹Muku ngan ye kene yo au i lok galanga ye ger tiao nga, ngan ayepe le lok pusbe, yesoo mala be lok rru ye so yo ayei, ngan tiap. Bong yeisa be lok galanga ye ger, ngan le pattu leu be ayetai nen, au i nga ayei noonoo, le ayei ben tool yo imata koot i.

¹⁰Le kakamata, ger tina ke Maro yo itar be ikaua yepongo dook mata pang di tooltool, ngan la iyei di a timmata nga.

¹¹Bong ye kene yo au i lok galanga ben ger igunkalau ye dada dook tiap ke noonoo nga, ngan iyei au le lok mai san be la ayei. Le ye dada tani i, in ben noonoo ikaua lungunu yau, a la ayei noonoo. Ngan tina au i ayei nen nga, ngan la ger iwete nen, au i ole amata ye noonoo kiau tina.

¹²Ngan nen le ole tawete be ger ke Maro yo ikap pang Mose ngan dook tiap, too? Tiap! Bong dook mata, yesoo ipa ye Maro ya taunu. Inbe dada yo iwete paidi ye be tatoo nga, ngan ipa ye Maro lapau, le dook mata inbe itoo dada dook mata noonoonoo yo ki i.

¹³Nga ole tawete belei? Be ger ke Maro yo dook mata nga, ngan la igarungau a le amata nga, too? Tiap yege! Bong ye au lok yo ke yeingi noonoo in la iyei au a ayei noonoo i. Ngan la ger yo dook mata nga, ngan iwete pau nen, be au i ole amata ye noonoo yo ayei nga. Le noonoo in dada tani yo be tapuske matenge ye i. Ngan nen le lod galanga nen, be noonoo in so dook tiap moolmool.

¹⁴Idi ngan lod galanga be ger yo Maro ikap pang Mose nga, ngan ipa ye Maro Amunu, bong au i tool ke tana i, inbe atoo lok yo gurunu i. Le au i, ben noonoo ikau au panga, inbe ayepe parmana a ayei ben poranga panga.