Roma 7:8-14

⁸Huu no hapu atoran nae leoꞌ na, ria sama leoꞌ hata tadaluꞌ nai au dale ka tao na au tendetuu nau hai lahenda hata-heto rupa nara. Tehuu maneniko ta hapu atoran fo horo-lane, sona salaꞌ a boe ta nanuu kuasa ator ita.

⁹Fai a ulu na nai au masoda ka, au ta bubuluꞌ matetuꞌ Manetualain Atoran Na. Doo-doo, besaꞌ ko au bubuluꞌ no matetuꞌ. Huu ria na, de besaꞌ ko au ameda an ae, au alena laka Atoran ria, ma tao salaꞌ. Ma salaꞌ a babae na, riꞌ au muste mate.

¹⁰Boe ma au dale ka nalulutuꞌ, nana huu bubuluꞌ ae, au ta bisa malole oo Manetualain, nana huu tao tuka Ria atoran na. Au araa hapu Manetualain nasa-boliin, riꞌ huhuku mamates, huu fo au alena laka Ria Atoran Na so. Sekona te hapu Atoran ela tao na lahenda bisa hapu soda matetuꞌ. Tehuu soa-neuꞌ au, sona Atoran ria riꞌ tao nalutu au, de tao na Manetualain hiru nasadea au.

¹¹Tebe Atoran ria natudu eno masoda matetuꞌ a. Tehuu no hapu tadaluꞌ a nasoda nai au dale ka, au tipu seluꞌ ao-ina ka de afi ae, au bisa malole oo Manetualain, sadi au tao tuka Ria Atoran Na. De nonooꞌ leo Atoran a riꞌ tataon losaꞌ Manetualain nahiaꞌ au, ma ta nau nabua noo au.

¹²De maneniko bisinaꞌ a lahenda rae, “Atoran fo Manetualain feen neuꞌ Musa a, sala,” sona au ataa ae, “Taꞌa! Manetualain Atoran na nana, lalao-lalafuꞌ!” Ma basa pareta nai Atoran ria daleꞌ, boe lalao-lalafuꞌ, laꞌe, ma malole a.

¹³Huu fo leo mae au bubuluꞌ atoran ria, tehuu au bei amania-amanene neuꞌ tadaluꞌ fo nai au dale ka losaꞌ au tao salaꞌ. De au tatao sala ka riꞌ tao na Manetualain nasadea au. Memaꞌ atoran ria malole a huu fo ria natudu basa hata tadaluꞌ fo riꞌ tao na ita bika-bati teme Manetualain mai. Tehuu leo mae leoꞌ na boe au ta bisa tao tuka ni fa. No enoꞌ ria atoran na natudu ledo-ledo nae hata tadaluꞌ nai lahenda dala na memaꞌ tadalu nan seli.

¹⁴Ita bubuluꞌ tae, Atoran fo Manetualain feen neuꞌ baꞌi Musa, nanaonda neme Manetualain Dula-dale Na mai. Tehuu au noi lahenda biasa de dale ka ta teaꞌ fa. De au amania-amanene neuꞌ hata tadaluꞌ fo nai dale makekeo-makakanu ka, losaꞌ au tao salaꞌ. Ria sama leoꞌ salaꞌ a dadi neuꞌ au malaka ka, ma au dadi uuꞌ salaꞌ a ata na.