ሃዋሬታ ኦሶ 24:5-20

⁵“ሃይሲ ኣዴዚ ኑስ ኢታ ሃርጌ ጊዲዴስ፤ ኣላሜን ዲዛ ኣይሁዳታ ኡባ ቦላ ሜቶ ሜꬌስ፥ ናዚራዌ ጌቴቲዛ ዎርዶ ኣሳታ ዋና ካሌꬂዛዴይ ኢዛኮ።

⁶ኢዚ ፆሳ ኬꬄ ቱኒሳና ጊሺን ኑ ኢዛ ኦይኪዶስ። ኑ ዎጋ ማላ ኑ ኢዛ ቦላ ፒርዳና ቆፒዶስ።

⁷ጊዶ ኣቲን ዎታዳራታ ሃላቃታ ኣዛዚዛይሲ ሉሲዮሲ ጋኪዲ ኑ ኩሼፔ ኢዛ ዎልቃራ ዎꬂ ኤኪዴስ።

⁸ኢዛ ሞቲዛ ኣሳይካ ኔኮ ያና ማላ ኣዛዚዴስ። ሃይሲ ኑ ኢዛ ቦላ ሺሺዳ ሞቶዚ ዉሪ ቱሙ ጊዲዳይሳ ኔ ኔ ባጋራ ኢዛ ኦይቻ ጋካናስ ዳንዳያሳ” ጊዴስ።

⁹ሂንኮ ኣይሁዳ ኣሳቲካ “ኤ ሃይሲ ዮዖዚ ዉሪካ ቱሙኮ” ጊዲ ኣማኔቲዳ።

¹⁰ዴሬ ኣይሲዛ ፊሊኪሴይ ጳዉሎሲ ሃሳያና ማላ ባ ኩሼራ ማላቲ ቤሲዴስ፤ ጳዉሎሲካ “ኔ ዳሮ ዎዴሶፔ ሃይሳ ዴሬዛ ኣይሲዛዴ ጊዲዳይሳ ታ ኤሪዛ ጊሽ ታ ቦላ ሺቂዳ ሞቶዛስ ታ ኔስ ኡፋይሳ ዛሮ ሺሻይስ።

¹¹ታ ፆሳስ ጎይናናስ ዬሩሳላሜ ቢን ሃቺ ታማኔ ናምዑ ጋላሳፌ ዳሮንታይሳ ኔ ኔ ባጋራ ኤራናስ ዳንዳያሳ።

¹²ፆሳ ኬꬃን ጊዲን ኣይሁዳታ ዎሳ ኬꬃን ዎይኮ ካታማ ጊዶን ታ ኦናራካ ፓላሜቲሺን ዎይኮ ዴሬ ጊዶን ሜቶ ሜꬊሺን ታና ዴሚቤቴና።

¹³ሃዒ ታ ቦላ ኢስቲ ሺሺዳ ሞቶዛስ ኣይ ማርካካ ሺሻናስ ዳንዳዬቴና።

¹⁴“ጊዶ ኣቲን ታ ኔስ ቆንጪሳና ኮዪዛይ ኢስቲ ዎርዶ ጊዛ ጎዳ ኦጌራ ኑ ኣዋንታ ፆሳስ ጎይናይሲኔ ሙሴ ዎጋኔ ናቤታ ማፃፋን ፃፌቲዳይሳካ ኡባ ኣማናይስ።

¹⁵ኢስቲካ ኡፋይስ ኦꬂዛ ማላ ታካ ናጋራንቻቲኔ ፂሎቲ ሃይቆፔ ዴንዳናይሳ ፆሳን ኣማኔታይስ።

¹⁶ሄሳ ጊሽ ፆሳ ሲንꬃኒኔ ኣሳ ሲንꬃን ሲꬌይ ባይንዳ ሃኖይ ታስ ዳና ማላ ኡባ ዎዴ ሚናይስ።

¹⁷“ታ ዬሩሳላሜፔ ኬዚን ታስ ዳሮ ላይꬅ ጊዲዳፔ ጉዬ ታ ዴሬ ኣሳስ ማዶ ሚሼኔ ፆሳስ ኢሜቲዛ ሚሼ ኤካ ያዲስ።

¹⁸ታና ኢስቲ ፆሳ ኬꬃን ዴሚዳይ ታ ሄሳ ጋꬂሺና፤ ሄ ዎዴ ታ ጌይዛ ዎጋ ፖሊሺን ታናራ ዳሮ ኣሲ ዴና፤ ኦሺኔ ሺሮይካ ዴና።

¹⁹ጊዶ ኣቲን ኢሲያፔ ዪዳ ኢሲ ኢሲ ኣይሁዳ ኣሳቲ ዴቴስ፤ ኢስታሲካ ታና ሞቶስ ጋꬂዛዚ ዲዛ ጊዲኮ ኔ ሲንꬃን ታና ሞቴቶ።

²⁰ሄሳፌ ጉዬ ታ ዱላታ ሲንꬅ ሺቂኮ ታ ኦꬂዳ ቆሆይ ዲኮ ሄ ኣሳቲ ዮቴቶ።