17मिनु ब्यफ, मेको आ कुशुल, आ श्ये नु गोबर मुर आ बाक्तीक क्येङा ङोन मीम चोप्तु। परमप्रभु यावेमी मोसा कली दोदेंशो पा अरेवा, मोदेंशो पा पाप्तु।
18मिनु नोले मोसामी चोशा चढ़ेतीक सांड चाक्तु। मिनु हारून नु आ तौपुकीमी आन गुइ मेको सांड आ पिया तार वोइक्तेक्म। लेवी १:१०-१३
19मिनु मोसामी मेको सांड कली क्योरतु। मिनु मेकोमी आ हुश चढ़ेतीक एर ओंथ ब्रुइक्ताक्व।
20मिनु मोसामी मेको सांड कली टुक्रा टुक्रा पा चेक्तु। मेको आ पिया, चेक्शो श्ये नु बोंसो नेल्ल चोप्तु।
21मेकोमी गा क्यी नु फिला मुरतु। मोपा मोसामी मेको सांड नेल्ल चढ़ेतीकेमी चोप्तु। मेको परमप्रभु यावे कली ब्रोव़शो रिना पाइश्शो मीम चोशा चढ़ेशो बाक्त। मिनु परमप्रभु यावेमी मोसा कली दोदेंशो पा अरेवा, मोदेंशो पा पाप्तु।