1मिनु परमप्रभु यावेमी मोसा कली
2“कोव़र खोदेंशो पा रोइ पशो मुर कली आ रोइ साम नोले मार पचा माल्ब देंशा हना, मुरुमी मेको कली चढ़ेब आन बाक्तीक चाक्चा माल्नीम। मत्ती ८:४
3मिनु चढ़ेबमी मुर आन बाक्तीके रे लाङगा ग्रूशा, मेको मुर कली रिम्शो पा कोव़चा माल्ब। मिनु मेको कुशुल ङा याक्सीब रोइ साशो बाक्त हना,
4मेको चढ़ेबमी मेको चोव़खो सेल्चा पुंइसीशो मुर आ पर्बम ‘सेस नु चोव़खो चिक्ब निक्शी, लेबानोन ङा लाइश्शो रवा आ शी, लल रङम नुप्शो ऊन नु हिस्सोप चाक्को’ दे अरेचा माल्ब। लेवी ११:३-२०; गन्ती १९:६
5मिनु चढ़ेबमी ‘मेको चिक्ब निक्शीमी का खप के सिक्स ब्वाक्कुम ब्रीशो बोस तारी सतो’ दे अरेचा माल्ब।
6मिनु चढ़ेबमी मेको सेस चिक्ब, मेको लेबानोन ङा लाइश्शो रवा आ शी, मेको लल रङम नुप्शो ऊन नु हिस्सोप मेको सिक्स ब्वाक्कु तारी साइश्शो चिक्ब आ हुशेमी ख्रुम्शा ग्रुंइचा माल्ब।
7मिनु मेकोमी रोइ रे साशो चोव़खो सेल्चा पुंइसीब मुर कली ७ खेयप ब्रुइश्शा ‘चोव़खो बाक्ब’ देंचा माल्ब। मिनु मेकोमी मेको सेस चिक्ब कली प्रोंइशा बेरपाइक्चा माल्ब। लेवी १६:२२
8मिनु मेको चोव़खो सेल्चा पुंइसीशो मुरुम आ वा मुरचा माल्ब। आ चां नेल्ल प्रेक्शा, चिक्चा माल्ब। मिनु मेको ग्रांग्रा मदिशो चोव़खो दुम्ब। मिनु नोले मुर आन बाक्तीके लचा दुम्ब। तन्न ७ नाक्त सम्म आ ताम्बु आ लाङगाम बाक्चा माल्ब। गन्ती ८:७
9मिनु ७ नाक्त नोले मेकोमी आ चां, गाल शोक्रे, मुकुक्स नेल्ल प्रेक्चा माल्ब। मिनु नोले आ वा मुरशा, चिक्चा माल्ब। मिनु मेको मुर चोव़खो दुम्ब।
10मिनु ८ नाक्त नोले मेकोमी मारेइ मदुम्शो थम रिम्शो सांड निक्शी नु बर्स का दुम्शो मारेइ मदुम्शो थम रिम्शो पाठी का, अन्न चढ़ेचा कली तेलम निशो थम रिम्शो फस एफाह का के ३० भाग नु लोग का तेल चाक्चा माल्ब। एफाह पुक्तीके का बाक्ब। एफाह का २२ लिटर रिक्ब। मेको ङा ३० भाग ६.५ लिटर खोदेंशो बाक्ब। नेल्ल १२ माना खोदेंशो बाक्ब। लोग का पुक्तीके का बाक्ब। मेको ०.३ लिटर रिक्ब।
11मिनु चढ़ेबमी मेको चोव़खो सेल्चा पुंइसीशो मुर नु मेको आ चाक्शो नेल्ल परमप्रभु यावे आ ङोंइती ग्रुम्तीक ताम्बु आ ओव़तीकेम वोइक्चा माल्ब।
12मिनु चढ़ेबमी सांड का नु मेको लोग का तेल गारचा आ पर्बम चढ़ेचा माल्ब। मिनु क्युक्शा हिम्शा चढ़ेतीक परमप्रभु यावे आ ङोंइती चढ़ेचा माल्ब। लोग आइक्च पुक्तीके बाक्ब। मेको ०.३ लिटर रिक्ब।
13मिनु मेकोमी पाप आ पर्बम चढ़ेतीक नु चोशा चढ़ेतीक साइक्तीके मेको चोव़खो बाक्तीकेम साइक्चा माल्ब। मारदे हना गारचा आ पर्बम चढ़ेशो नु पाप आ पर्बम चढ़ेशो चढ़ेब के दुम्ब। मेको थम चोव़खो बाक्ब। लेवी ७:७
14मिनु चढ़ेबमी मेको गारचा आ पर्बम चढ़ेशो आ हुश लाइश्शा, मेको चोव़खो सेल्चा पुंइसीशो मुर आ ग्युरा नोफा आ फेनेम, आ ग्युरा गुइ ङा बोंग्ये नु आ ग्युरा खोइल ङा बोंग्येमी ख्रेक्चा माल्ब। लेवी ८:२३; प्रस्थान २९:२०
15मिनु चढ़ेबमी मेको तेल रे इच्का लाइश्शा, आ पेरा गुइ ङा ताप्लाम लुक्चा माल्ब।
16मिनु चढ़ेबमी आ ग्युरा गुइ ङा ब्रेप्चोम आ पेरा गुइम बाक्शो तेलम ख्रुम्शा, परमप्रभु यावे आ ङोंइती ७ खेयप ब्रुइक्चा माल्ब। लेवी ४:६,१७
17मिनु चढ़ेबमी आ गुइम लीशो तेल चोव़खो सेल्चा पुंइसीशो मुर आ ग्युरा नोफा ङा फेनेम, मेको आ ग्युरा गुइ ङा बोंग्येमी नु आ ग्युरा खोइल ङा बोंग्येम नु गारचा आ पर्बम चढ़ेशो आ हुश तारी ख्रेक्चा माल्ब।
18मिनु चढ़ेबमी आ गुइम लीशो तेल मेको चोव़खो सेल्चा पुंइसीशो मुर आ पियाम ख्रेक्चा माल्ब। मिनु चढ़ेबमी परमप्रभु यावे आ ङोंइती मेको मुर आ पर्बम पाप क्याम्तीक गेय पचा माल्ब।
19मिनु चढ़ेबमी मेको आ पाप आ पर्बम चढ़ेचा माल्ब। मोपा मेको चोव़खो सेल्चा पुंइसीशो मुरुम पाप क्याम्तीक गेय पशो बाक्ब। मिनु नोले मेकोमी चोशा चढ़ेतीक क्योरचा माल्ब।
20मिनु चढ़ेबमी मेको चोशा चढ़ेतीक नु अन्न चढ़ेतीक चढ़ेतीकेम चढ़ेचा माल्ब। मोपा मेको चढ़ेबमी मेको आ पर्बम पाप क्याम्तीक गेय पचा माल्ब। मिनु मेको मुर ग्रांग्रा मदिशो चोव़खो दुम्ब।
21मिनु मेको मुर प्रुङग बाक्त हना, मोशो यो चाक्ने मचाप्बाक्त हना, मेकोमी आ पाप क्याम्तीक गेय आ पर्बम क्युक्शा हिम्शा चढ़ेचा कली सांड का नु अन्न चढ़ेचा कली तेलम निशो एफाह का के १० भाग थम रिम्शो फस नु लोग का तेल चाक्चा माल्ब। एफाह पुक्तीके का बाक्ब। एफाह का २२ लिटर रिक्ब। मेको के १० भाग २ लिटर नु इच्का खोइ बाक्ब। लोग आइक्च पुक्तीके का बाक्ब। मेको ०.३ लिटर रिक्ब।
22मिनु आ चाप्शो खोदेंशो पा परवा निक्शी कि ढुकुर निक्शी, का पाप आ पर्बम चढ़ेचा कली नु का चोशा चढ़ेचा कली चाक्चा माल्ब। लेवी ५:७
23मिनु मेकोमी ८ नाक्ती आंम कली चोव़खो सेल्पाइक्चा कली मेको निक्शी ग्रुम्तीक ताम्बु आ ओव़तीक परमप्रभु यावे आ ङोंइती चढ़ेब आ बाक्तीकेमी चाक्चा माल्ब।
24मिनु चढ़ेबमी गारचा आ पर्बम चढ़ेचा कली मेको सांड नु लोग का तेल चाक्शा, क्युक्शा, हिम्शा, चढ़ेतीके परमप्रभु यावे आ ङोंइती क्युक्शा हिम्शा चढ़ेचा माल्ब। लोग का इस्राएली आन आइक्च पुक्तीक का बाक्ब। मेको ०.३ लिटर रिक्ब। मेको माना का नु इच्का खोइ खोदेंशो बाक्ब।
25मिनु चढ़ेबमी मेको गारचा आ पर्बम चढ़ेतीक सांड क्योरशा, मेको आ हुश इच्का लाइश्शा, चोव़खो सेल्चा पुंइसीब मुर आ ग्युरा नोफा ङा फेनेम, आ ग्युरा गुइ ङा बोंग्ये नु आ ग्युरा खोइल ङा बोंग्येमी ख्रेक्चा माल्ब।
26मिनु चढ़ेबमी मेको तेल इच्का आ पेरा गुइ ङा ताप्लाम लुक्चा माल्ब।
लेवी 14
लेवी 14:1-26