5मिनु यहोसुमी मुर आन कली “गेपुकी आंम कली परमप्रभु यावे आ ङोंइती बाक्चा कली ठीक सेल्सीन। मारदे हना दीसा परमप्रभु यावेमी इं दातेमी छक लाक्चा ङा गेय पाइब” देंत। प्रस्थान १९:१०
6यहोसुमी चढ़ेब आन कली “परमप्रभु आ कबल पशो सन्दोस कुरशा, मुर आन ङोंइती गाक्कीन” देंत। मिनु मेकोपुकी सन्दोस कुरशा, मुर आन ङोंइती गाक्तेक्म। यहोसु ६:६
7मिनु परमप्रभु यावेमी यहोसु कली “मुलाक्त रे गो इ कली इस्राएली नेल्ल आन ङोंइती ठेयब सेल्नन। दोपा गो मोसा नु बाक्ङा, मोपा गे नु यो बाक्नुङ, दे नेल्ल आन कली तुइक्पाइक्नुङ। यहोसु ४:१४; यहोसु १:५,१७
8गे कबल पशो सन्दोस कुरब चढ़ेब आन कली ‘गेपुकी यर्दन खोला आ सुर ङा ब्वाक्कुम जाक्दीश्शा, मेक उइ राप्शा, बाक्चा माल्नीनी’ दे अरेचा माल्नेवे” देंत।
9मिनु यहोसुमी इस्राएली आन कली “ओंथ पिन। मिनु परमप्रभु यावे, इन परमप्रभु आ लोव़ नेनीन” देंत।
10मिनु यहोसुमी “ब्रोंइशा बाक्ब परमप्रभु इन दातेमी बाक्ब, गे तुइक्ब दुम्नीनी। मिनु मेकोमी कनानी, हित्ती, हिव्वी, परिज्जी, गिरगाशी, एमोरी नु यबुसी आन कली इन ङोंइती रे थमा पा खेरब।
11कोव़ङीन, रागी नेल्ल आन कली सासन पाइब परमप्रभु आ कबल पशो सन्दोस इन ङोंइङोंइती यर्दन शोक्चा कली लाइब।
12मिनु मुल इस्राएल ङा थरपुकी रे १२ जना वोंइश मुर थर का रे का का पा योव़ङीन।
13गेना परमप्रभु यावे, रागी नेल्ल आन कली सासन पाइब परमप्रभु आ कबल पशो सन्दोस कुरब चढ़ेब आन खोइली यर्दन ङा ब्वाक्कुमी ख्रुम्नीमी, मेना इर रे यिशो यर्दन ङा ब्वाक्कु नांइसीब। मिनु गारो खोदेंशो पा राप्शा बाक्ब” देंत। भजन संग्रह ९७:५; मीका ४:१३; जकरिया ४:१४
14मिनु मुर नेल्ल यर्दन शोक्सीचा कली ठीक पा बाक्मानु, चढ़ेबपुकीमी मुर आन ङोंइती परमप्रभु यावे आ कबल पशो सन्दोस कुरशा गाक्तेक्म।
15मिनु बाली नाली रुप्ची ना, खोला गेना हना यो शुश बारशो बाक्ब। मिनु चढ़ेबपुकीमी आन खोइली यर्दन खोला आ सुर ङा ब्वाक्कुम ख्रुम्मेनु,
16इर रे यिशो ब्वाक्कु तेक्साक्व। मेको गारो खोदेंशो दुम्शा, मुर आन लतीके लां रे ङोन बाक्त। मेको ते तेक्सीशो बाक्त देंशा हना, चारेथन आ नेक्था ङा आदम सहर माइश्शोमी तेक्सीशो बाक्त। मिनु इर रे यिशो दिंम ङा अराबाह समुन्द्र, मेको कली हिक्सी समुन्द्र यो देंनीम, यीब ब्वाक्कु तेक्सीशो बाक्त। प्रस्थान १४:२१-२२; भजन संग्रह ११४:३
17मिनु मुरपुकी गाक्शा, सोव़शो खपीम यर्दन शोक्सीचा गोम्तेक्म। मिनु परमप्रभु यावे आ कबल पशो सन्दोस कुरब चढ़ेबपुकी यर्दन आ दातेमी सोव़शो खपीम राप्शा, रिम्शा बाक्तेक्म। मिनु इस्राएली नेल्ल सोव़शो खपीम गाक्शा, यर्दन आइक्ची हांबु जाक्दीत्तेक्म।
यहोसु 3
यहोसु 3:5-17