پادىشاھلار «1» 22:13-28

¹³مىكايانى قىچقىرغىلى بارغان خەۋەرچى ئۇنىڭغا‫‪:‬‬ ــ مانا، ھەممە پەيغەمبەرلەر بىردەك پادىشاھقا ياخشى خەۋەر بەرمەكتە؛ ئەمدى ئۆتۈنىمەن، سېنىڭ سۆزۈڭمۇ ئۇلارنىڭ سۆزى بىلەن بىردەك بولۇپ، ياخشى بىر خەۋەرنى بەرگىن، دېدى.

¹⁴ئەمما مىكايا‫‪:‬‬ ــ پەرۋەردىگارنىڭ ھاياتى بىلەن قەسەم قىلىمەنكى، پەرۋەردىگار ماڭا نېمە ئېيتسا، مەن شۇنى ئېيتىمەن، دېدى.

¹⁵ئۇ پادىشاھنىڭ ئالدىغا كەلگەندە پادىشاھ ئۇنىڭدىن‫‪:‬‬ ئى مىكايا، جەڭ قىلغىلى گىلېئادتىكى راموتقا چىقساق بولامدۇ، يوق؟ ــ دەپ سورىۋىدى، ئۇ ئۇنىڭغا جاۋاب بېرىپ‫‪:‬‬ ــ چىقىپ مۇۋەپپەقىيەت قازىنىسەن؛ چۈنكى پەرۋەردىگار شەھەرنى پادىشاھنىڭ قولىغا بېرىدۇ، دېدى.

¹⁶لېكىن پادىشاھ ئۇنىڭغا‫‪:‬‬ ــ مەن ساڭا قانچە قېتىم پەرۋەردىگارنىڭ نامىدا راست گەپتىن باشقىسىنى ماڭا ئېيتماسلىققا قەسەم ئىچكۈزۈشۈم كېرەك؟! ــ دېدى.

¹⁷مىكايا‫‪:‬‬ ــ مەن پۈتكۈل ئىسرائىلنىڭ تاغلاردا پادىچىسىز قويلاردەك تارىلىپ كەتكەنلىكىنى كۆردۈم. پەرۋەردىگار‫‪:‬‬ «بۇلارنىڭ ئىگىسى يوق؛ بۇلارنىڭ ھەربىرى تىنچ‫‪‎-‎‬‬ئامان ئۆز ئۆيىگە قايتسۇن»، دېدى، ــ دېدى.

¹⁸ئىسرائىلنىڭ پادىشاھى يەھوشافاتقا‫‪:‬‬ ــ مانا، مەن سىلىگە «ئۇ مېنىڭ توغرامدا قۇتلۇقنى ئەمەس، بەلكى ھامان بالايىئاپەتنى كۆرسىتىپ بېشارەت بېرىدۇ»، دېمىگەنمىدىم؟ ــ دېدى.

¹⁹مىكايا يەنە‫‪:‬‬ ــ شۇڭا پەرۋەردىگارنىڭ سۆزىنى ئاڭلىغىن؛ مەن پەرۋەردىگارنىڭ ئۆز تەختىدە ئولتۇرغانلىقىنى، ئاسماننىڭ پۈتكۈل قوشۇنلىرى ئۇنىڭ يېنىدا، ئوڭ ۋە سول تەرىپىدە تۇرغانلىقىنى كۆردۈم.

²⁰پەرۋەردىگار‫‪:‬‬ «كىم ئاھابنى گىلېئادتىكى راموتقا چىقىپ، شۇ يەردە ھالاك بولۇشقا ئالدايدۇ؟» ــ دېدى. بىرسى ئۇنداق، بىرسى مۇنداق دېيىشتى؛

²¹شۇ ۋاقىتتا بىر روھ چىقىپ پەرۋەردىگارنىڭ ئالدىدا تۇرۇپ‫‪:‬‬ «مەن بېرىپ ئالداي»، دېدى. پەرۋەردىگار ئۇنىڭدىن‫‪:‬‬ «قانداق ئۇسۇل بىلەن ئالدايسەن؟» ــ دەپ سورىۋىدى،

²²ئۇ‫‪:‬‬ ‫‪‎-‎‬‬ «مەن چىقىپ ئۇنىڭ ھەممە پەيغەمبەرلىرىنىڭ ئاغزىدا يالغانچى بىر روھ بولىمەن»، دېدى. پەرۋەردىگار‫‪:‬‬ ــ «ئۇنى ئالداپ ئىلكىڭگە ئالالايسەن؛ بېرىپ شۇنداق قىل» ــ دېدى.

²³مانا ئەمدى پەرۋەردىگار سېنىڭ بۇ ھەممە پەيغەمبەرلىرىڭنىڭ ئاغزىغا يالغانچى بىر روھنى سالدى؛ پەرۋەردىگار سېنىڭ توغراڭدا بالايىئاپەت كۆرسىتىپ سۆزلىدى» ــ دېدى.

²⁴شۇنى ئاڭلاپ كەنئاناھنىڭ ئوغلى زەدەكىيا كېلىپ مىكايانىڭ كاچىتىغا بىرنى سېلىپ‫‪:‬‬ ــ پەرۋەردىگارنىڭ روھى قايسى يول بىلەن مەندىن ئۆتۈپ، ساڭا سۆز قىلىشقا باردى؟! ــ دېدى.

²⁵مىكايا جاۋاب بېرىپ‫‪:‬‬ ــ ئۆزۈڭنى يوشۇرۇش ئۈچۈن ئىچكىرىدىكى ئۆيگە يۈگۈرگەن كۈنىدە شۇنى كۆرىسەن، دېدى.

²⁶ئىسرائىلنىڭ پادىشاھى ئەمدى‫‪:‬‬ ــ مىكايانى ئېلىپ قايتۇرۇپ بېرىپ، شەھەر ھاكىمى ئامون بىلەن پادىشاھنىڭ ئوغلى يوئاشقا تاپشۇرۇپ،

²⁷ئۇلارغا تاپىلاپ‫‪:‬‬ «پادىشاھ مۇنداق دەيدۇ‫‪:‬‬ ــ ئۇنى زىندانغا سولاپ مەن تىنچ‫‪‎-‎‬‬ئامان يېنىپ كەلگۈچىلىك قىيناپ نان بىلەن سۇنى ئاز‫‪‎-‎‬‬ئاز بېرىپ تۇرۇڭلار» ــ دېگىن، دەپ بۇيرۇدى.

²⁸مىكايا‫‪:‬‬ ــ ئەگەر سەن ھەقىقەتەن تىنچ‫‪‎-‎‬‬ئامان يېنىپ كەلسەڭ، پەرۋەردىگار مېنىڭ ۋاسىتەم بىلەن سۆز قىلمىغان بولىدۇ، دېدى. ئاندىن ئۇ يەنە‫‪:‬‬ ــ ئەي جامائەت، ھەربىرىڭلار ئاڭلاڭلار، دېدى.