16Исраиллар шәһәрдин чүш вақтида чиқти. Бән-Һадад билән шу падишаһлар, йәни ярдәмгә кәлгән оттуз икки падишаһ болса чедирлирида шарап ичип мәс болушқан еди.
17Валийларниң ғуламлири жүрүштә авал маңди. Бән-һадад адәм әвәтивиди, улар униңға хәвәр берип: — «Самарийәдин адәмләр келиватиду» — деди.
18У: — Әгәр сүлһи түзүшкә чиққан болса уларни тирик тутуңлар, әгәр соқушқили чиққан болсиму уларни тирик тутуңлар, деди.
19Әнди валийларниң бу ғуламлири вә уларниң кәйнидики қошун шәһәрдин чиқип,
20һәр бири өзигә учриған адәмни чепип өлтүрди. Сурийләр қачти; Исраил уларни қоғлиди. Сурийәниң падишаһи Бән-Һадад болса атқа минип атлиқлар билән қечип қутулди.
21Исраилниң падишаһи чиқип һәм атлиқларни һәм җәң һарвулирини битчит қилип Сурийләрни қаттиқ қир-чап қилди.
22Пәйғәмбәр йәнә Исраилниң падишаһиниң қешиға келип униңға: — Өзүңни мустәһкәмләп, өзүңни убдан дәңсәп, немә қилишиң керәклигини ойлап баққин. Чүнки келәр жили әтиязда Сурийәниң падишаһи сән билән җәң қилғили йәнә чиқиду, деди.
23Сурийәниң падишаһиниң хизмәткарлири униңға мундақ деди: — «Уларниң илаһи тағ илаһи болғачқа, улар бизгә күчлүк кәлди. Лекин биз түзләңликтә улар билән соқушсақ, җәзмән уларға күчлүк келимиз.
Падишаһлар «1» 20
Падишаһлар «1» 20:16-23