Än Salomon Fos 7:4-23

⁴Kopwe üreni tipachem, “En fefinei,” kopwe pwal apasa pwe sileöch chienom mi achengicheng.

⁵Pun repwe tümwünuk seni ewe fin lisowu, pwal seni ewe fefin mi lüangau a eäni kapas amichimich.

⁶Iwe, üa newu seni asammwachon imwei

⁷o küna chomong alüal mi wewemang, nge üa mefi pwe eman me leir a fokun tiparoch.

⁸A pwerela won ewe al arap ngeni lepwokukun imwen eman fefin mi lüangau, o fetal ngeni imwan

⁹lefäf, lupwen a pwinila o popuetä rochokich.

¹⁰Mürin, ewe fefin a towu pwe epwe churi ewe alüal, a üföüf üfen eman fefin mi amömö inisin o ekieki mine epwe eäni atuputup ngeni.

¹¹A fos leüömong, a pwal säwämang o nomofetal.

¹²Fän ekoch a nom won al, fän ekoch a nom lon lenien amömö o sousou mwän lepwokukun ekewe al.

¹³Iwe, a romi ewe mwän o mitiri, a kapas ngeni fän mesemau,

¹⁴“Ikenai üa eäni eu asoren kinamwe, nge a chüen wor ochäi fituk seni ewe mönün asor.

¹⁵Iei mine üa feito pwe üpwe churuk, üa achocho le kütok, nge iei üa künok.

¹⁶Üa ameresala won ai peet ekewe pwölüpwöl seni Isip mi sokopat anüer.

¹⁷Üa epiti ai peet ren ewe löpokus seni ekewe irä iter mör, aloes me sinamon.

¹⁸Kopwe feito, sipwe pwärifengeni ach tong tori lesosor, sipwe pwapwafengen lon tong.

¹⁹Pun pwülüei esap nom rei, a saila won eu fanü toau.

²⁰A feila fän chomong moni, nge epwe liwinsefälito le unusen maram.”

²¹Ina usun neminei a pesei ätei ren chomong kapas atuputup pwe epwe eti, a pöchökül ngeni ren an kapas amichimich.

²²Iwe, ätei a müttir etala neminei pwe a usun chök eman ätemwänin kow mi feila ngeni ewe leni ia epwe ninnila ie, pwal usun eman chia epwe le fif lon ewe lenien likatup,

²³tori efoch esefich a pwerelong lon lukan. A wewe ngeni eman machang mi sälong lon eu sär. Iwe, esap silei pwe epwe mäfeiengau ren.