Soakas 7:4-23

⁴Oru lalmwetmet uh in oana sie tamtael lom, ac etauk in oana mwet kawuk fototo lom.

⁵Ma inge ac sruokkomi liki mutan payuk kien mukul saya, ac kas in akmunas lalos.

⁶Sie pacl ah ke nga tuh ngetla ke winto in lohm sik ah,

⁷nga liye kutu mukul fusr su soenna oasr etauk la, na nga akilen sie selos su lalfon lumahl.

⁸El fahsr inkanek ah, apkuranyang nu ke lohm sin sie mutan.

⁹Ke ekela tukun lohsrani acn uh,

¹⁰mutan sac osun nu sel. El nuknuk oana sie mutan kosro su eis molin kosro lal, ac oasr nunak koluk se sel.

¹¹El sie mutan ku nunak lal ac sumwekin, su lungsena forfor inkanek uh pacl nukewa,

¹²ku muta soano mwet ke sruwasrik inkanek uh. Kutu pacl uh el ac tu inkanek uh, ac kutu pacl ke nien kuka.

¹³El kaokma mukul fusr sac ac ngok mutal. El ngetang suilya ac fahk,

¹⁴“Nga oru tari mwe kisa luk misenge, ac ikwa kac uh oasr yuruk.

¹⁵Na nga tuku suk kom mweyen nga ke osun nu sum, na pa nga sun kom.

¹⁶Nga lohala tari mwe oan kiuk ke kaot linen tuhntun Egypt me.

¹⁷Nga fwela ke ono keng ma orekla ke myrrh, aloes, ac cinnamon.

¹⁸Fahsru nga kom in oru lungse lasr fong nufon se. Kut in asruhila ac arulana pwar sie sin sie.

¹⁹Mukul tumuk uh wangin lohm ah — el som nu yen loessula.

²⁰El us mani na yohk welul ac el ac tia folok nwe ke wik luo.”

²¹Na el srifella ke kas emwem lal, ac mwet fusr sac welulla.

²²El sa na in fahsr tokol oana soko ox kokola nu ke anwuki, ku oana soko deer ma sroang nu in kwasrip

²³ac osra in pisr uh ac fakisya insial. El oana sie won su fahsryang nu in sie nwek ac tia etu lah moul lal oan in fosrnga.