Uva Maara Koqera 7:4-23

⁴Koqe avu aatora mintima tiane: Are ti nakaava koqevama variaro, tiane. Vo okara vo okara kankomake iri tave vairara are mintima tiane: Are ti tonti koqevama variaro, tiana.

⁵Are mintima kera tiraro vitanta ai antua amite vaivara are kia oru vo vaiinti naata hampata niraitira, are vi nahentiva ai minta ireva ina uvaravata kia ho irinara.

⁶Vo enta te tenta naavu uintuanahai vutu

⁷tavauramanta qaraaka vaiinti kia koqe avu aato vataaka aaraqaa ni variarave. Vikaqihairo vovano, viva kia qora okarave koqe okarave iri tave vai vaiintiva

⁸aara kaantaraqaa nahenti vira naavu aumanto oruntovaro

⁹enta ire ivaro

¹⁰vi nahentiva aaranahainaa nahenti utavaaqa voqaara nonku varero, vevantero vi vaiintira minta ireva auti vairave.

¹¹Vi nahentiva voqama kero hampi kaiqa vare vaiva vaiharo, viva kia koqema kero naavuqi oquvi vairaitiro,

¹²ekaa enta maaketiqive, aaraqaave, niharo vaiintiara rante vai nahentiva vaira.

¹³Te tavauraro vi nahentiva qaraaka vaiinti vira ravaaqavu kero kia kauriraitiro, vira moqakero virara tiharo,

¹⁴Vate te aantau mati Kotira ofaa amitaunaraqihai hini mati untataurava ti naavuqi vaivo.

¹⁵Mintiverama te tenta naavuqihai vevante ai rantarera tuvuraukama, tuvu ai ranta kauro.

¹⁶Te tenta vaitaaina taintara qeramake vate, koqe tavuna Isipiqihai aututaara, vo kalaa vo kalaa vaira vi taintaraqaa vuqite,

¹⁷koqe unta i haikara, vo pauraa vo pauraavata vi taintaraqaa rauruke vatauro.

¹⁸Are tintira aniraqe tetanta oru naavuqi vaiha quaheha ruhe tutiqamaqi vivitanta aatita kaare.

¹⁹Are kiama ti vaatiara qetaane. Viva niara aaraini vivo.

²⁰Viva airi monu varero vivara tiro, taara uiki aitarairaroma viva orurantero anianarove, tiro.

²¹Minti tivakeharo vi nahentiva airi uqerara uvaqohairo vi vaiintira mintama varero nai naavuqi vira.

²²Purumakau vita vare vuru arukareka iantema kero, vaakama vi vaiintiva vi nahentira uva iriro, vira avata varero vira. Diaavano vaara vuitaaraqi oru aru viro qaqi vaimanta

²³vevaqohai vira arukaantema kero, vi vaiintiva vi nahentira avata varero vira. Uvirivano vaara vuitaaraqaa aru vintema kero, vi vaiintiva mini vira. Vi vaiintiva kia nai vaaka qutu vuainarara kankomakero iriraitiro, mini vira.