Än Salomon Fos 3:26-35

²⁶Pun ewe Samol mi Lapalap epwe om apilükülük, epwe tümwünü pecheöm pwe esap tup lon eu sär.

²⁷Kopwe eäni kirikiröch ngeni aramas mi osupwang, lupwen ka tufich ngeni.

²⁸Kosap üreni chon arum, “Kopwe feila o liwinsefälito lesor, mürin üpwe ngonuk mine ka tüngor,” nge a fen nom reöm ewe mettoch.

²⁹Kosap ekiekietä föför mi ngau ngeni chon arum mi nom ünükum, nge i a fokun lükülükuk.

³⁰Kosap anini ngeni eman aramas nge esap wor popun, are esap föri och mi ngau ngonuk.

³¹Kosap lolowoiti eman aramas mi mwänewüs, kosap pwal föri usun mine i a föri.

³²Pun ewe Samol mi Lapalap a oput eman aramas mi chök föri mine a ngau, nge a lükülükü eman mi wenechar.

³³Ewe Samol mi Lapalap a anümamaua chon leimwen eman aramasangau, nge a afeiöchü chon leimwen eman chon pwüng.

³⁴A turunufasei ekewe chon turunufas, nge a ümöümöch ngeni ekewe chon tipetekison.

³⁵Eman chon tipachem epwe küna iteüöch, nge eman chon tiparoch epwe küna itengau.