Än Salomon Fos 22:14-28

¹⁴Än eman fin lisowu kapas ra usun chök eu pwang mi alolol, ätewe ewe Samol mi Lapalap a song ngeni epwe turulong lon.

¹⁵Semirit ra chök föri föförün chon tiparoch, nge lupwen ra angei wichiwich, repwe kaiö mine a öch.

¹⁶Eman mi ariaföüü ekewe chon wöüngau pwe epwe awatteloi wöün ika fangala lifang ngeni ekewe chon pisekisek, epwe chök wöüngauala.

¹⁷Kopwe aü selingom o rongorong, pun üpwe aiti ngonuk än ekewe chon tipachem kapas. Kopwe kaiö ngeni ar kewe kapasen kait.

¹⁸Pun kopwe pwapwa ren om kopwe amwöchüür lon lelukom o molotä ngeni om kopwe apaserewu.

¹⁹Üa mochen pwe kopwe anomu om apilükülük won ewe Samol mi Lapalap, iei mine üa asile ngonuk ekei kapas ikenai.

²⁰Üa maketiu fän itom ilik mwiitun mi masou ren kapasen öüröür me silelap.

²¹Repwe aiti ngonuk mine a pwüng o let, pwe kopwe tongeni atowu pälüöchün ekewe kapas ngeni chokewe mi tinukela.

²²Kosap angei pisek seni eman chon wöüngau, pokiten i a wöüngau, kosap pwal ariaföüü ewe chon mwelele lon kapwüng,

²³pun ewe Samol mi Lapalap epwe peniir o ariaföüü chokewe mi ariaföüür.

²⁴Kosap chiechi ngeni eman aramas mi songokai, kosap pwal eti eman mi lingeringerikai,

²⁵pwe kosap kaiö lapalapan o püsin afeiengauok.

²⁶Kosap pwon pwe kopwe mönätiu än eman liwinimang.

²⁷Pun are esap wor mine kopwe liwini ngeni, repwe mwo nge angei senuk kiom.

²⁸Kosap amwökütü kiännin eu fanü om kewe lewo ra fen förätiu me lomlom.