Proverbs 22:14-28

¹⁴Imet ko kuari ilak diram bagara mena mu ko den welang mu, mutim bo du biya wore iwita, se kari Yawe ko gomang magara bowa ningi bagoso, mu mutim umu ningi daguloso.

¹⁵Ikia ngualara mu kuriang gomang motam ningi aniso; bare bu te nukum tagira mu ikia mu karo saposo.

¹⁶Awiriya kituwura alo nunga melmasak giso ale noko melmasak mu karogo laguwuso, se awiriya kari melmasak suen biya ago wore gomang te kulukokko mel ningo ningo tuso, mu wete nunga melmasak mu mena namaruk se kari kituwura ko bagamonko.

¹⁷Degewa gurugu ale ikia sinar ko kari kuring te den aratuwoso wore iki ale, anapeya ka kasursam imi gemang motam ningi ilukuawurko,

¹⁸ale gemang motam te se kiring te mel yawara iwita amilmil te balu se lagerko.

¹⁹Mu awuk, ani ni Yawe te la ira sanami se lagerko owore te se, ani aitak ka kasursam.

²⁰Arikko! Ani nika bala ningo ningo 30 batagem, mu kiti guruga ko den se ikia ningo ko den.

²¹Se den nunguning ni te sanamirko mu ilukuawu se, awiriya nika isuok mu ko den koma ningo la balu tuiko.

²²Kariimet kituwura alo mu kituwura se ni me nunga bita maguwur ale nunga melmasak giko; ale biguwura motam te me nunga bitarko,

²³mu awuk, mu Yawe nunga ikup mu te nunga sanguk ale awiriya nunga bita maguwuso mu nu nunga bita maguwurokko.

²⁴Kari gomang motam tama ko kaniwara mu ilak me tiran bitar, ale kari gomang pasak ala magawara mu ilak me nimi giko.

²⁵Ni uwuta bitar ale noko kiwem memek mu arik ale keta nimi talipara ningi bitar bore ko.

²⁶Kari saki kari bo, bo kote dinau beteram umu sangarmon ale ko dinau kutuwumonko balmon, ale nunumi nuguting ilumon, mu ni nunga ningi me bagerko;

²⁷mu awuk, ni uwuta balu ale aking ikup bo arik ale dinau mu me dier mu, taimon ka melmasak suen la gimon ale ka anira kuwim ago gimon ago namamon bore ko.

²⁸Girakala taleng girigir alo ali ko tom beteman umu ni me baruku ale karogo kasu namar agi karogo utu tairko.