Än Salomon Fos 14:2-21

²Eman mi wenechar a niuokusiti ewe Samol mi Lapalap, nge eman mi rikirik a turunufasei i.

³Än ekewe chon tiparoch kapas a usun chök efoch wokun wichiwich fän iten püsin ir, nge än ekewe chon tipachem kapas a tümwünüür.

⁴Anaie esap wor ätemwänin kow ie mi tuw pwül, esap wor wiich, nge pöchökülen eman ätemwänin kow a aworato chomong föün wiich.

⁵Eman chon pwärätä mi allükülük a apasa mine a let, nge eman chon pwärätä mi mwäl a apasawu kapas chofana.

⁶Eman chon turunufas a kütta tipachem, nge esap küna. Nge eman aramas mi silelap a mecheres ngeni an epwe weweöch.

⁷Kosap chiechi ngeni eman mi tiparoch, pun kosap tongeni kaiö kapasen mirit seni.

⁸Eman aramas mi mirit a tipachem, pun a silei mine epwe föri, nge eman mi tiparoch a umwes, pun a püsin atupu i.

⁹Ekewe chon tiparoch resap ekieki pwe a ngau ar föri tipis, nge ekewe chon wenechar ra weweöchiti usun ingauen tipis.

¹⁰Eman aramas a püsin silei riaföün lelukan, nge eman chon ekis esap tongeni eti i lon an pwapwa.

¹¹Imwen ekewe aramasangau repwe tala, nge imwen ekewe chon wenechar repwe chök nonomola.

¹²Eman aramas a tongeni ekieki pwe ewe al a fetal won a pwüng, nge lesopolan ewe al a ale ngeni mäla.

¹³Inamwo ika eman a takir, a pwal tongeni wor lolilen lon lelukan, nge mürin än eman pwapwa a tongeni fis letipeta.

¹⁴Eman aramas mi rikirik epwe kini uän an föför, nge eman aramasöch epwe kini uän an angang.

¹⁵Eman mi wewemang a lükü mettoch meinisin, nge eman mi mirit a nenengeni ia epwe feila ie.

¹⁶Eman mwän mi tipachem a föröchü o kul seni mine a ngau, nge eman mi tiparoch a tümwününgau o müttir föri mine a mochen.

¹⁷Eman aramas mi songokai a föri föför mi umwes, nge eman mi mirit a mosonotam.

¹⁸Ekewe chon wewemang repwe angei mine a fich ngeniir lon ar tiparoch, nge ekewe mi mirit repwe angei silelap pwe liwiniir.

¹⁹Ekewe chon föföringau ra wisen rotiu me fän mesen ekewe aramasöch, nge ekewe aramasangau ra wisen rotiu me ünükün asamalapen imwen ekewe chon pwüng.

²⁰Eman chon wöüngau a koput me ren aramas, pwal mwo nge ren chon arun, nge eman chon wöümong a wor chomong chiechian.

²¹Eman mi oput chon arun a tipis, nge eman mi kirikriöch ngeni ekewe chon wöüngau epwe feiöch.