Tɛnɛ Faalaaliiti 14:2-21

²Zɔi é ziɛzu telebodai zu, naa ɠa ɗa ziɛ Ɠɔoɠɔ GALAGI ɠaazuluabai zu, kɛlɛ zɔi é ziɛzu ga yaava ʋeleiti, naa ɠa ɗa pɛlɛʋɛlɛ.

³Ɠimalala nui ɠa ɗa maaɠoloi zɔlɔɔ ga daawooiti maaʋele, ɠima nuiti ti-lakɔlɔgiti ta ɗa ti makɛ.

⁴Ʋɛ woza woli nikɛ la ná, daamianigi ɠa daamii ɲakai zu, kɛlɛ nikɛ zinɛi zuvikɛi ɠa a ɗa tɔnɔ golai ve.

⁵Zeelei sɔlegai, é la zɛɛ woga pɛ, kɛlɛ zɛɛ zeelei ɠa ɗa zɛɛ ɓɔɛiti bo.

⁶Anɛɛ ni ɲɛɛɠulasu nui ɠa ɠimalai ɠaiziɛ, é la sɔlɔɔga, kɛlɛ kidafaawu nui ɠa ɗa faaɠwɛgi zɔlɔɔ yɔɔɠɛ nɔ.

⁷Maaɠooza faaɠaaɠaalala nui ʋa, mazɔlɔɔ é la ɠi gila kpalaa fea è ʋɛ.

⁸Kidafaawu nui ɠa ɗa siɛ ʋelei ʋɛtɛ, tɔɔzei toɠa ga ɠima nui, faaɠaaɠaalala nuiti ta ɗa loo ya ta-ɠimalalai ʋɔ.

⁹Ɠimalala nuiti ta ɗa ɲɛɛɠula zɔɠɔzuɓɛtɛ vai zu, kɛlɛ undaanɛɛi ɠa ɗa ɠɛ sɔle nuiti saama.

¹⁰Ɛsɛ nɔ ɠa é ná-ziizoolɛi ɠwɛɛ, ta ná-koozunɛɛi, nu ɠili ge la zooga é ʋa nɔnɔ zɔlɔɔ naa zu.

¹¹Faa ɲɔu ɠɛ nuiti ta-ʋɛlɛi ɠa wolo, kɛlɛ sɔle nuiti ta-zeɠe ɠotai ɠaa ɠa wɔɔlɔ.

¹²Nu mɔinmɔin ka ɠisiɛzu ga pelei ti ma pagɛ, kɛlɛ tɔun, ta pelei ma, nii gaaɓelasu, é liizu ga tiye, é ti lɔ saai zu.

¹³Ɲɛɛi ɠa zoo é ziizoolɛi ɠaazumaalɔɔɠu, koozunɛɛi ɠa zoo é ɠaaɓela ga ziizoolɛi.

¹⁴Kɔzɔba nui ɠa ɗa ná-kɛɛwotiiti ma ɠulanumai zɔlɔɔ, kɛlɛ nu ʋagɔi ɠa ɠoozunɛ nɔnɔ ma ziɛ ʋeleiti ma ɠulanumai zu.

¹⁵Nui nii é la dɛ faa mɔinmɔin kwɛɛ, toɠa ɗa la naati kpein da, niiti ti wosu ma, kɛlɛ kidafaawu nui ɠa ɗa ziɛ ga keleɠele.

¹⁶Ɠima nui ɠa ɗa lua faa ɲɔi ʋa, é ʋoluave, kɛlɛ ɠimalala nui ɠa ɗa yiiɠaawana, é kɛ, tɔɔzei daave ɓɔɠɔ la.

¹⁷Ziiɠula nui ɠa ɗa ɠimalala vaiti kɛ, nui kigaiziɛ ɲɔi ziimaʋɛ, toɠa ɗa wɔinzeɠemai maaloli ɓɔɠɔ ma.

¹⁸Nuiti ti la dɛ faa mɔinmɔin kwɛɛ, naati ta-ʋoganii ɠa é ga ɠimalalai, kɛlɛ kidafaawu nuiti ta-masa bɔɔlɔgi ɠa é ga faaɠwɛgi.

¹⁹Nu ɲɔiti ta ɗa unmaayei nu ʋagɔiti bɛ, faa ɲɔu ɠɛ nuiti ɓalaa ta ɗa kɛ ɠana nɔ telebo nuiti ta-ʋɛlɛlaʋɛ.

²⁰Bala nui la nɛɛni nu nɔpɛ bɛ, anɛɛ seiɲɔɠɔiti, kɛlɛ kpɛtɛ nui wɔɔlaiti mɔinʋɛ gola.

²¹Zɔi é seiɲɔɠɔi wɔinzeɠezu, naa ɠa koto ɠɛɛzu, kɛlɛ undaanɛɛ nu ɠa ga naa, nii é maanɔɠɔ nuiti maawɔinɠaazu.