3Wenechar a emweni chokewe mi wenechar, nge chokewe resap allükülük ra feiengau ren ar tunorikirik.
4Än eman aramas wöümong esap alisi lon ewe ränin apwüng, nge pwüng a angasala eman seni mäla.
5Ekewe esap wor ar tipis ra fetal won efoch al mi sonosonöch pokiten ar pwüng, nge ekewe aramasangau ra feiengau ren püsin ar föför mi ngau.
6Chokewe mi wenechar ra küna ngas pokiten ar pwüng, nge chokewe resap allükülük ra tup ren püsin ar mochenia.
7Lupwen eman aramasangau a mäla, an apilükülüköch a pwal wesila, nge mine eman chon pwüngingau a witiwiti, esap fis.
8Eman chon pwüng a küna ngas seni osukosuk, nge eman aramasangau a chök tolong lon osukosuk.
9Eman chon pwüngingau a afeiengaua chon arun ren kapasen awan, nge ekewe chon pwüng ra ngasala ren ar silelap.
10Chon eu telinimw ra pwapwa, lupwen ekewe chon pwüng ra feiöch, nge lupwen ekewe aramasangau ra mäla, mi wor mweireiren pwapwa.
11Lupwen ekewe chon wenechar ra afeiöchü eu telinimw, a fefeitä, nge ren än ekewe aramasangau kapas ewe telinimw a tala.
12Eman mi tiparoch a aitengaua chon arun, nge eman mi mirit a fanafanala.
13Eman mi kukuloufeil o luapas a apworausa mine a monomon, nge ätewe mi allükülük a amonomona.
14Eu mwü epwe tala ika esap wor souemwen lon, nge anaie a wor ie chomong chon öüröür, a wor kinamwe.
15Eman mi pwon pwe epwe mönätiu än eman chon ekis liwinimang epwe fokun osupwang, nge ätewe mi oput ei sokun föför a feiöch.
16Eman fefin mi eäni kirikiröch aramas ra meniniti, nge ekewe mwän mi pwora ra chök pisekisekila.
17Eman mwän mi eäni kirikiröch a püsin feiöch ren, nge eman mi ariaföüü aramas a püsin feiengau ren.
18Eman aramasangau a angei winnen an angang nge esor iammürin, nge eman mi föri föför mi pwüng epwe angei liwinin mi nonomola.
19Eman mi chök föföri föför mi pwüng epwe manau, nge ätewe mi chök föri mine a ngau epwe mäla.
20Ewe Samol mi Lapalap a oput aramas mi rikirik leluker, nge a pwapwa ren chokewe mi föri mine a pwüng.
21A fokun let pwe eman aramasangau epwe wesewesen angei liwinin an föföringau, nge chokewe mi föri mine a pwüng repwe küna ngas.
22Eman fefin mi liöch, nge esap mirit, a usun chök efoch ring seni kolt lon pwötün eman piik.
23Än ekewe chon pwüng mochen a sopolong lon mine a mürina, nge mine ekewe aramasangau ra apilükülüküni a sopolong lon kapwüng.
24Mi wor aramas ra fangafangöch, nge ra chök pisekisekila. Mi pwal wor aramas ra fangangau, nge ra chök wöüngauala.
25Eman aramas mi kichiöch epwe pisekisekila, nge eman mi alisi aramas, aramas repwe pwal alisi.
26Aramas ra otteki ätewe mi amwöchü seniir wiich pokiten an mochen awattela liwinin, nge ra afeiöchü ätewe mi amömöla ngeniir wiich.
27Eman mi achocho le föri mine a mürina a kütta chenin me ren Kot, nge ätewe mi kütta mine a ngau epwe küna mine a ngau.
28Aramas mi apilükülükü püsin wöür repwe turula usun chök chön irä ra turutiu mürin leres, nge ekewe chon pwüng repwe manauöch usun chök chön irä mi arauarau.
29Eman mi tümwününgau ngeni chon leimwan esap wor mine epwe angei lesopolan, nge eman mi tiparoch epwe chon angang ngeni eman mi mirit.
30Pwüng a aworato manau, nge pwüngingau a angeala manau.