3Sa tie toṉoto si ta turaṉa koasa nana kinoa va ṉoṉo, ba na sinekesekei si ṉovalana sa tie kokoha.
4Na tinagotago si loke laena totoso tia ia goi sa minate, ba kinoa va leana kote harupigo pa minate.
5Sa tinoṉoto tanisa tie sapu loke tinazutuna si turaṉa va leanana si asa, ba sa tie kaleana si tasuna ni sari nana kinaleana.
6Sa tinoṉoto tanisa tie ṉoṉona si harupia si asa, ba sa tie lopu ta raṉena si ta sipata koari nana pinuhi.
7Pana mate sa tie kaleana, si beto tugo sari doduru nana inoko'okoro; doduru pu hiva ni sa pa nana ṉiniraṉira si loketoṉa mo.
8Sa tie toṉoto si ta harupu koari na tinasuna, ta kasie meke raza la tu koari na tie kaleadi.
9Koari nana zinama sa tie sapu lopu gilania sa Tamasa si boka ṉovalia sa sa turaṉana, ba pa ginilagilana si boka ta harupu sa tie toṉoto.
10Totoso koa va leana sari tie toṉoto, si qetu sari pa vasileana, totoso mate sari tie kaleadi si kukili qetuqetu si arini.
11Koari na minana tanisa tie ṉoṉo si ta ovulu sa vasileana, ba koari na zinama tanisa tie kaleana si ta huara sa popoa.
12Sa tie pu lopu tumae balabala si zama va gore turaṉana, ba sa tie gilagilana si kopu nia sa sa meana.
13Na nanae si hoke tozi vura ginugua tomedi, ba sa tie ta ronuna si kopu ni sari vivinei tadi votiki tie.
14Pude lopu ta turaṉa, si hoqa tugo sa butubutu, ba pana soku tie si vari tokae pa binalabala si koa sa minataqara.
15Asa pu va egoa pude hobea sa gale tana keke tie si kaqu kaleana nia tugo sa, ba asa pu korona tabaria sa lipulipu tana votiki tie si gulea nana.
16Sa barikaleqe pu koa ia tataru bulona si ta pamaṉae, ba sari na tie ṉoṉovala si na tinagotago mo si vagia sa.
17Sa tie tataru si na lineana si vagia sa, ba sa tie ṉoṉovala si va tinasuna pule nia.
18Sa tie kaleana si hoke vagi tinabara sapu kokohadi, ba asa pu letea sa tinoṉoto si kaqu paketia sa vua hinokarana.
19Sa tie sapu turu va nabu pa tinoṉoto si kaqu vagia sa tinoa, ba sa tie sapu luli sari tinavete kaleadi si hata mate.
20E Zihova si etuli na va kari saripu boni bulodi, ba qetu hola ni Sa saripu tavete va leana.
21Mi gilana valeania sapu hie: Sari tie kaleadi si kaqu tava kilasa, ba arini pu toṉoto si kaqu ta rupaha.
22Guana riṉi qolo pa isuna sa boko, sa barikaleqe leleana sapu lopu tumae balabala.
23Sari inokoro tadi tie toṉoto si hoke gorevura va leana, ba sari rinoverove tadi tie kaleadi si va bugori sari doduru tie.
24Keke tie si tataru meke vari poni, ba va gavoro soku si asa, keke si korokorona poni, si kamoa tu minalaṉa.
25Sa tie sapu variponi, si kote toa va leana meke bokaboka, meke asa pu toka ni sari tie si kote ta tokae tugo.
26Hoke ta levei sa tie pu puhi ni sari ginani, ba ta manae si asa pu va malumu pude holuholu ni.
27Asa pu hata ia pude leana si vagia tugo sa lineana, ba sa tinasuna si kote raza koasa pu hata ia.
28Asa pu raṉei sari nana tinagotago si kaqu hoqa guana elelo matena, ba sari tie toṉoto si kote toa va leana gua na linetelete vaqura.
29Asa pu vata tasuna i sari nana tatamana, si na givusu mo si kote tagoa sa, meke sa tie duvili si kote nabulu koasa tie gilae.
30Sa vua tanisa tie toṉoto, si na huda tinoa, meke asa pu harupi sari maqomaqo tie si na tie gilae.