Zinama Tumatumae 26:9-13

⁹Guana duduli rakihi pa limana sa tie vivirina sa zinama tumatumae pa ṉuzuna sa tie pekipeki.

¹⁰Guana tie gona tupi sapu gona hoboro mo, sa tie pu tabara hoboro tie pekipeki babe tie ene holadi.

¹¹Gua sa siki sapu taliri pule la ia sa luana, sa tie pekipeki sapu tavete pulei sari nana pinekipeki.

¹²Dogoria goi keke tie sapu gilaena, gua telena? Na tie pekipeki si boka tava tumatumae hola nia sapu asa.

¹³Na tie hakohako si zama, “Na laione si pa siraṉa, na laione variva matagutuna si ene pa siraṉa nomana!”